മദ്യലഹരിയിൽ ഗതാതഗത തടസ്സമുണ്ടാക്കി; എക്സൈസ് ഉദ്യോഗസ്ഥരെ ഭീഷണിപ്പെടുത്തി സിപിഎം ജനപ്രതിനിധി ആര്യങ്കാവിൽ

ആര്യങ്കാവ് മേഖലയിൽ മദ്യലഹരിയിൽ കാർ ഓടിയെത്തി ചെക്പോസ്റ്റിൽ രാത്രികാല ഗതാഗതം തടസ്സപ്പെടുത്തിയ സംഭവത്തിൽ ഗ്രാമപ്പഞ്ചായത്തംഗത്തിനെതിരെ എക്സൈസ് ഉദ്യോഗസ്ഥരുടെ പരാതി. ഗ്രാമപ്പഞ്ചായത്തംഗമായ മനു മത്തായിയാണ് ചെക്പോസ്റ്റ് ജീവനക്കാർക്കെതിരെ പ്രകോപനപരമായി പെരുമാറുകയും ഭീഷണിപ്പെടുത്തുകയും ചെയ്തത്.

കഴിഞ്ഞദിവസം രാത്രി 9 മണിക്കായിരുന്നു ഈ വിവാദ സംഭവം അരങ്ങേറിയത്. ചെക്പോസ്റ്റിനു മുൻപിൽ കാർ നിർത്തിയിട്ടത് മൂലം ഗതാഗതം തടസ്സപ്പെട്ടതോടെ, വാഹനം മാറ്റിയിടണമെന്ന് എക്സൈസ് ചെക്പോസ്റ്റ് ജീവനക്കാർ ആവശ്യപ്പെടുകയായിരുന്നു.

ഇതിൽ പ്രകോപിതനായ മനു മത്തായി പാതയിൽ നിർത്തിയിട്ടിരുന്ന കാറിൽ നിന്നും പുറത്തിറങ്ങി ചെക്പോസ്റ്റ് പരിസരത്തേക്ക് അതിക്രമിച്ചു കയറി. തുടർന്ന് താൻ ഗ്രാമപ്പഞ്ചായത്തംഗമാണെന്ന് ആവർത്തിച്ച് ജീവനക്കാരെ ഭീഷണിപ്പെടുത്താൻ ആരംഭിക്കുകയായിരുന്നു.

സംഭവസമയത്ത് ഒരു എക്സൈസ് സിഐയും മറ്റ് 4 ജീവനക്കാരുമാണ് ചെക്പോസ്റ്റിൽ ഔദ്യോഗിക ജോലികൾക്കായി ഉണ്ടായിരുന്നത്. മനു മത്തായിയുടെ പ്രകോപനപരമായ സംഭാഷണങ്ങളും ഭീഷണികളും ചെക്പോസ്റ്റിന്റെ പ്രവർത്തനങ്ങളെ ബാധിച്ചതിനാൽ ജീവനക്കാർ ദൃശ്യങ്ങൾ ക്യാമറയിൽ പകർത്താൻ ശ്രമിച്ചു.

ഇതിൽ കൂടുതൽ പ്രകോപിതനായ പ്രതി ജീവനക്കാരനെതിരെയും അധിക്ഷേപവുമായി തിരിഞ്ഞു. തുടർന്ന് ഉദ്യോഗസ്ഥർ ഉടൻതന്നെ തെന്മല പൊലീസിൽ വിവരമറിയിച്ചു.

എന്നാൽ പൊലീസ് സ്ഥലത്തെത്തുന്നതിന് മുൻപ് തന്നെ പ്രതി തന്റെ കാറുമായി സ്ഥലം വിടുകയായിരുന്നു. “പിരിവ് നിർത്തിയില്ലെങ്കിൽ കാർ ഇനിയും ചെക്പോസ്റ്റിനു മുൻപിൽ കൊണ്ടിടുമെന്നു” ഭീഷണി മുഴക്കിയ ശേഷമാണ് ഇയാൾ അവിടെ നിന്നും രക്ഷപ്പെട്ടത്.

ഈ സംഭവത്തിൽ എക്സൈസ് ചെക്പോസ്റ്റ് സിഐ ഇന്നലെ രാവിലെ തെന്മല പൊലീസിൽ ഔദ്യോഗികമായി പരാതി നൽകിയിട്ടുണ്ട്. ഉദ്യോഗസ്ഥരുടെ മൊഴിയെടുത്ത ശേഷം പ്രതിക്കെതിരെ ശക്തമായ നിയമനടപടികൾ സ്വീകരിക്കുമെന്ന് പൊലീസ് അറിയിച്ചു.

ചെക്പോസ്റ്റിലെ ജീവനക്കാരുടെ ഔദ്യോഗിക കൃത്യനിർവഹണം തടസ്സപ്പെടുത്തിയതിനും, അനധികൃതമായി പരിസരത്തേക്ക് കടന്നുകയറി ഭീഷണി മുഴക്കിയതിനും പ്രതിക്കെതിരെ കേസെടുക്കുമെന്ന് അധികൃതർ വ്യക്തമാക്കി. സിപിഎമ്മിന്റെ പേരിൽ ഫണ്ട് പിരിവിന് എത്തിയപ്പോൾ പണം നൽകാത്തതിലുള്ള വിരോധമാണ് ഈ നിരന്തര ഭീഷണികൾക്ക് കാരെന്നാണ് ചെക്പോസ്റ്റ് ജീവനക്കാരുടെ പ്രധാന പരാതി.

എന്നാൽ സംഭവം വിവാദമായതോടെ തന്റെ ഭാഗം ന്യായീകരിച്ചുകൊണ്ട് മനു മത്തായി രംഗത്തെത്തി. ചെക്പോസ്റ്റിലെ പരിശോധനകളിലെ ക്രമക്കേടുകൾ ചോദ്യം ചെയ്യുകയാണ് താൻ ചെയ്തതെന്നും, തെന്മല പൊലീസ് 4 കിലോഗ്രാം കഞ്ചാവ് പിടികൂടിയിട്ടും ചെക്പോസ്റ്റിൽ സമാനമായ രീതിയിൽ കഞ്ചാവ് കടത്തുകൾ കണ്ടെത്താത്തത് എന്തുകൊണ്ടാണെന്ന് ചോദിക്കുക മാത്രമാണ് ഉണ്ടായതെന്നുമാണ് ഇയാളുടെ വാദം.

ആര്യങ്കാവ് ക്ഷേത്രം കവലയിൽ പൊലീസ് എയ്ഡ് പോസ്റ്റ് പ്രവർത്തിക്കുന്നുണ്ടെങ്കിലും ആവശ്യത്തിന് ഉദ്യോഗസ്ഥർ ഇല്ലാത്തതിനാൽ രാത്രികാലങ്ങളിലെ ക്രമസമാധാന പ്രശ്നങ്ങളിൽ സമയബന്ധിതമായി ഇടപെടാൻ കഴിയുന്നില്ലെന്ന് പ്രദേശത്ത് പരാതി ഉയരുന്നുണ്ട്. 8 മണിക്കൂർ വീതമുള്ള ഡ്യൂട്ടിയിൽ ആകെ 3 പൊലീസുക മാത്രമാണ് എയ്ഡ് പോസ്റ്റിലുള്ളത്.

അതിർത്തി മേഖലയിലെ സുരക്ഷാ സാഹചര്യങ്ങൾ മുൻനിർത്തി കുളത്തൂപ്പുഴയിലെ സിഐ ഓഫിസ് കഴിഞ്ഞ മാസം 15-ാം തീയതി തെന്മലയിലേക്ക് മാറ്റിസ്ഥാപിച്ചിരുന്നു.