ചങ്ങനാശേരി – വേളാങ്കണ്ണി കെഎസ്ആർടിസി സർവീസ് റൂട്ട് മാറ്റം യാത്രക്കാരെ വലച്ചു

നീണ്ട ഇടവേളയ്ക്ക് ശേഷം പഴയ റൂട്ടിലേക്ക് മടങ്ങിയെത്തുമെന്ന് പ്രഖ്യാപിച്ചിരുന്ന ചങ്ങനാശേരി – വേളാങ്കണ്ണി കെഎസ്ആർടിസി സൂപ്പർഫാസ്റ്റ് സർവീസ് യാത്രാക്കാരുടെ പ്രതിഷേധത്തിന് ഇടയാക്കി.

കുറവിലങ്ങാട് വഴി സർവീസ് നടത്തുമെന്നറിയിച്ച് ഓൺലൈൻ ബുക്കിങ് ഉൾപ്പെടെ സ്വീകരിച്ചിരുന്നെങ്കിലും, ബസ് അവസാന നിമിഷം പാലാ, തൊടുപുഴ വഴി കടന്നുപോകുകയായിരുന്നു. രണ്ട് പതിറ്റാണ്ടിലേറെയായി ചങ്ങനാശേരിയിൽ നിന്ന് കുറവിലങ്ങാട് – കൂത്താട്ടുകുളം വഴി നടത്തിയിരുന്ന ഈ സർവീസ്, വരുമാനം ലക്ഷ്യമിട്ട് മാസങ്ങൾക്ക് മുൻപാണ് പാലാ – തൊടുപുഴ റൂട്ടിലേക്ക് മാറ്റിയത്.

എന്നാൽ ഈ തീരുമാനം തിരിച്ചടിയാവുകയും പ്രതീക്ഷിച്ച വരുമാനം ലഭിക്കാതിരിക്കുകയും ചെയ്തതോടെയാണ് പഴയ റൂട്ടിലേക്ക് തന്നെ മടങ്ങാൻ അധികൃതർ തീരുമാനിച്ചത്. എന്നാൽ ഇന്നലെ മുതൽ കുറവിലങ്ങാട്– കൂത്താട്ടുകുളം വഴി സർവീസ് പുനരാരംഭിക്കുമെന്ന് അറിയിച്ചിരുന്നതിനാൽ, ബസിനെ സ്വീകരിക്കാൻ കുറവിലങ്ങാട്ട് വിവിധ സംഘടനകളുടെ നേതൃത്വത്തിൽ ആളുകൾ കാത്തുനിന്നിരുന്നു.

ഈ യാത്രക്കാരെയെല്ലാം നിരാശരാക്കിയാണ് ബസ് മുൻപത്തെ പോലെ വഴിമാറിപ്പോയത്. പാലാ, തൊടുപുഴ റൂട്ടിൽ യാത്രാദൂരവും സമയവും കൂടുതലാണ്.

കുറവിലങ്ങാട്–കൂത്താട്ടുകുളം വഴി മൂവാറ്റുപുഴയിലേക്ക് നേരിട്ട് സർവീസ് നടത്തിയാൽ യാത്രാസമയം ഗണ്യമായി കുറയ്ക്കാനും യാത്രക്കാരുടെ ദുരിതം ഒഴിവാക്കാനും സാധിക്കുമെന്നാണ് പ്രദേശവാസികളുടെ വിലയിരുത്തൽ.