പ്രവാസികളുടെ ഡോളർ നിക്ഷേപങ്ങളിൽ പുതിയ നീക്കവുമായി റിസർവ് ബാങ്ക്; എഫ്സിഎൻആർ(ബി) പദ്ധതിയിലെ പ്രത്യേക ഇളവുകൾ നേരത്തെ അവസാനിപ്പിക്കാൻ തീരുമാനം

പ്രവാസികൾക്ക് ഡോളർ നിക്ഷേപങ്ങളിൽ ഉയർന്ന പലിശ നേടാൻ വഴിയൊരുക്കിയ എഫ്സിഎൻആർ(ബി) പദ്ധതിയിലെ പ്രത്യേക ഓഫർ പെട്ടെന്ന് തന്നെ നിർത്തലാക്കാൻ റിസർവ് ബാങ്ക് ഓഫ് ഇന്ത്യ (ആർബിഐ) ഒരുങ്ങുന്നു. പ്രതീക്ഷിച്ചതിലും വളരെ വേഗത്തിൽ വൻതോതിൽ നിക്ഷേപങ്ങൾ എത്തിച്ചേർന്നതിനെ തുടർന്നാണ് കേന്ദ്ര ബാങ്കിന്റെ ഈ സുപ്രധാന തീരുമാനം.

ബാങ്കുകൾക്ക് ഈ നിക്ഷേപങ്ങൾ സ്വീകരിക്കുമ്പോഴുണ്ടാകുന്ന അധിക ബാധ്യത സെപ്റ്റംബർ 30 വരെ മാത്രമേ ഏറ്റെടുക്കാൻ കഴിയൂ എന്ന് ആർബിഐ വ്യക്തമാക്കിയിട്ടുണ്ട്. പദ്ധതി കാലാവധി അവസാനിക്കും മുൻപ് നിർത്തലാക്കുന്ന കാര്യം നിലവിൽ ചിന്തയിലില്ലെന്ന് കഴിഞ്ഞ ദിവസം ആർബിഐ ഗവർണർ സഞ്ജയ് മൽഹോത്ര വ്യക്തമാക്കിയിരുന്നു.

ഈ ആഴ്ച തന്നെ എഫ്സിഎൻആർ(ബി) വഴിയുള്ള നിക്ഷേപങ്ങൾ 5000 കോടി ഡോളർ കടക്കുമെന്നാണ് വിലയിരുത്തപ്പെടുന്നത്. ഇതോടെ നിലവിലുള്ള ആനുകൂല്യങ്ങൾ അവസാനിപ്പിക്കുന്ന കാര്യത്തിൽ ആർബിഐയും കേന്ദ്ര സർക്കാരും തമ്മിൽ ചർച്ചകൾ ആരംഭിക്കും.

തുടക്കത്തിൽ 5000-7000 കോടി ഡോളർ വരെ സമാഹരിക്കാനായിരുന്നു ആർബിഐ ലക്ഷ്യമിട്ടത്. എന്നാൽ ഇത്രയും ചുരുങ്ങിയ സമയത്തിനുള്ളിൽ ഇത്രയും വലിയ തുകയെത്തുമെന്ന് ആരും കണക്കുകൂട്ടിയിരുന്നില്ല.

ജൂൺ 5 മുതൽ ജൂലൈ 31 വരെയുള്ള 58 ദിവസത്തിനുള്ളിൽ രാജ്യത്തേക്ക് ഒഴുകിയെത്തിയത് 3672 കോടി ഡോളറാണ്. ഓഗസ്റ്റ് 6 ലെ കണക്കുകൾ പരിശോധിക്കുമ്പോൾ ഇത് 4278 കോടി ഡോളറായി ഉയർന്നു.

പദ്ധതി സെപ്റ്റംബർ 30 വരെ നീണ്ടുപോയാൽ നിക്ഷേപം 8000 കോടി ഡോളർ വരെയാകുമെന്ന് എസ്ബിഐ റിസർച്ച് അടക്കമുള്ളവരുടെ വിലയിരുത്തൽ വ്യക്തമാക്കുന്നു. ഈ തിയതി വരെ തുടർന്നാൽ ഇത് 10,000 കോടി ഡോളറിലേക്ക് എത്തിയേക്കാമെന്ന് പ്രമുഖ സാമ്പത്തിക സ്ഥാപനമായ ജെഫ്രീസിന്റെ റിപ്പോർട്ടിലും ചൂണ്ടിക്കാണിക്കുന്നുണ്ട്.

നിലവിൽ 3, 5 വർഷ കാലാവധിയുള്ള നിക്ഷേപങ്ങൾക്കാണ് ബാങ്കുകൾ ഈ പദ്ധതിയിലൂടെ മികച്ച പലിശ നൽകുന്നത്. കാലാവധി പൂർത്തിയാകുമ്പോൾ ഈ തുക തിരികെ നൽകേണ്ടി വരുന്നത് ഭാവിയിൽ വലിയ സാമ്പത്തിക ബാധ്യതയായി മാറുമോ എന്ന ആശങ്ക വിദഗ്ധർ പങ്കുവയ്ക്കുന്നുണ്ട്.

ഇത്തരം നിക്ഷേപങ്ങൾക്ക് രാജ്യത്ത് ഇളവുകൾ പ്രഖ്യാപിക്കുന്നത് ഇത് മൂന്നാം തവണയാണ്. ഇതിനു മുൻപ് 1993, 2013 വർഷങ്ങളിലും സമാനമായ രീതിയിൽ ഇളവുകൾ നൽകിയിട്ടുണ്ട്.

2013-ൽ 2600 കോടി ഡോളറിന്റെ നിക്ഷേപമാണ് ലഭിച്ചത്. എന്നാൽ ആ തുക തിരികെ നൽകേണ്ടി വന്ന സമയത്ത് രാജ്യത്തിന്റെ വിദേശ നാണ്യശേഖരത്തിന് അത് വലിയ ഭീഷണി സൃഷ്ടിച്ചിരുന്നു.

മുൻകൂട്ടി ഡോളർ വാങ്ങി വിപണിയിൽ ഇടപെടലുകൾ നടത്തിയാണ് അന്ന് ആർബിഐ ആ പ്രതിസനിയെ തരണം ചെയ്തത്. സമാനമായ ഒരു സാഹചര്യം വീണ്ടും ഉണ്ടാകാതിരിക്കാനാണ് പദ്ധതിയിലെ ഇളവുകൾ മുൻകൂട്ടി അവസാനിപ്പിക്കാൻ ആർബിഐ ഇപ്പോൾ തയാറെടുക്കുന്നത്.

കഴിഞ്ഞ ആഴ്ചകളിൽ ഇന്ത്യയുടെ വിദേശനാണ്യശേഖരം വർധിച്ചതും ഡോളറിനെതിരെ രൂപയുടെ വിനിമയ നിരക്കിലുണ്ടായ മുന്നേറ്റവും ആർബിഐ അനുകൂല ഘടകങ്ങളായി കാണുന്നുണ്ട്. വരും ആഴ്ചകളിൽ തന്നെ രാജ്യത്തിന്റെ വിദേശനാണ്യശേഖരം പുതിയ റെക്കോർഡിലെത്തുമെന്നാണ് കരുതപ്പെടുന്നത്.

ജൂലൈ 31 വരെയുള്ള കണക്കുകൾ പ്രകാരം 1050 കോടി ഡോളർ വർധിച്ച് വിദേശനാണ്യശേഖരം 69,890 കോടി ഡോളറിലെത്തിയിട്ടുണ്ട്. ഇതോടെ ഈ വർഷം ഫെബ്രുവരിയിൽ രേഖപ്പെടുത്തിയ 72,850 കോടി ഡോളർ എന്ന സർവകാല റെക്കോർഡ് ഭേദിക്കുമെന്ന പ്രതീക്ഷയും ശക്തമായിട്ടുണ്ട്.

പ്രവാസികൾക്ക് വിദേശ കറൻസിയിൽ തന്നെ ഇന്ത്യയിലെ ബാങ്കുകളിൽ നിക്ഷേപം നടത്താൻ സഹായിക്കുന്ന സംവിധാനമാണ് എഫ്സിഎൻആർ(ബി). മുൻകാലങ്ങളിൽ ഇത്തരം നിക്ഷേപങ്ങൾക്ക് ബാങ്കുകൾ 3.5 മുതൽ 4 ശതമാനം വരെ മാത്രമായിരുന്നു പലിശ നൽകിയിരുന്നത്.

എന്നാൽ രാജ്യത്തിന്റെ വിദേശ നാണ്യശേഖരം മെച്ചപ്പെടുത്തുന്നതിന്റെ ഭാഗമായി ഈ അക്കൗണ്ടുകൾ കൈകാര്യം ചെയ്യുന്നതിനുള്ള അധിക ബാധ്യത കഴിഞ്ഞ ജൂണിൽ റിസർവ് ബാങ്ക് ഏറ്റെടുക്കുകയായിരുന്നു. ഇതോടെ ബാങ്കുകൾ ഉയർന്ന പലിശ നൽകാൻ മുന്നോട്ടുവന്നു.

നിലവിൽ 6 മുതൽ 7.5 ശതമാനം വരെയാണ് ഈ പദ്ധതിയിലെ പലിശ നിരക്ക്. ഈ സുവർണ്ണാവസരം പ്രയോജനപ്പെടുത്തി നിരവധി പ്രവാസികളാണ് തങ്ങളുടെ സമ്പാദ്യം നാട്ടിലേക്ക് അയച്ചത്.

ഇതിൽ ഏറ്റവും കൂടുതൽ പണമെത്തിയത് യുഎഇയിൽ നിന്നാണെന്നാണ് കണക്കുകൾ വ്യക്തമാക്കുന്നത്. എന്നാൽ യുഎസ്, യുകെ തുടങ്ങിയ രാജ്യങ്ങളിൽ നിന്ന് ഈ പദ്ധതിയിലേക്ക് വലിയ തോതിലുള്ള ആവശ്യക്കാരുണ്ടായിരുന്നില്ല.