സംസ്ഥാനത്ത് പോലീസും മോട്ടോര് വാഹന വകുപ്പും കര്ശന പരിശോധനകള് തുടരുമ്പോഴും മലപ്പുറം ജില്ലയില് റോഡപകടങ്ങളുടെ നിരക്ക് ആശങ്കാജനകമായി തുടരുന്നു. കണക്കുകൾ പ്രകാരം ഈ വര്ഷത്തെ ആദ്യ ഏഴ് മാസത്തിനിടെ വിവിധ റോഡപകടങ്ങളിലായി 187 പേര്ക്കാണ് ജീവന് നഷ്ടമായത്.
അമിതവേഗതയും അപകടകരമായ രീതിയിലുള്ള ഓവര്ടേക്കിംഗുമാണ് ഭൂരിഭാഗം അപകടങ്ങള്ക്കും പ്രധാന കാരണമായി വിലയിരുത്തപ്പെടുന്നത്. ഇതിനുപുറമേ, റോഡുകളിലെ കുഴികളും അശാസ്ത്രീയമായ വളവുകളും സ്ഥിതി കൂടുതല് വഷളാക്കുന്നുണ്ട്.
ഈ വര്ഷം ജനുവരി മുതല് ജൂലൈ വരെയുള്ള കാലയളവില് ആകെ 2,320 റോഡപകടങ്ങളാണ് ജില്ലയില് മാത്രം രജിസ്റ്റര് ചെയ്തത്. ഈ അപകടങ്ങളില്പ്പെട്ട് 1,989 പേര്ക്ക് ഗുരുതരമായോ നിസ്സാരമായോ പരിക്കേറ്റിട്ടുണ്ട്.
ഇതുകൂടാതെ, വലിയ രീതിയിലുള്ള സാമ്പത്തിക നഷ്ടവും വാഹനങ്ങള്ക്ക് കനത്ത കേടുപാടുകളും സംഭവിച്ച 152 അപകടങ്ങളും റിപ്പോര്ട്ട് ചെയ്യപ്പെട്ടിട്ടുണ്ട്. ഡ്രൈവര്മാരുടെ ഭാഗത്തുനിന്നുള്ള ജാഗ്രതക്കുറവ് കാരണം കാല്നടയാത്രക്കാരുടെ ജീവന് പോലും റോഡുകളില് നഷ്ടപ്പെടുന്ന സ്ഥിതിയാണുള്ളത്.
അപകടങ്ങളില്പ്പെടുന്ന വാഹനങ്ങളില് ഭൂരിഭാഗവും ഇരുചക്ര വാഹനങ്ങളാണ്. ഇതിനുപുറമെ സ്വകാര്യ ബസുകള്, കാറുകള്, മറ്റ് വലിയ ഭാരവാഹനങ്ങള് എന്നിവ ഉള്പ്പെടുന്ന അപകടങ്ങളും ദിനംപ്രതി വര്ദ്ധിച്ചുവരികയാണ്.
ദേശീയപാതകളിലും സംസ്ഥാന പാതകളിലും രാത്രി സമയങ്ങളിലുണ്ടാകുന്ന അപകടങ്ങളുടെ എണ്ണത്തിലും വലിയ വര്ദ്ധനവാണ് രേഖപ്പെടുത്തിയിട്ടുള്ളത്. കഴിഞ്ഞ വര്ഷം ആകെ റിപ്പോര്ട്ട് ചെയ്ത 3,566 അപകടങ്ങളില് നിന്ന് 330 മരണവും 2,997 പരിക്കുകളുമാണ് രേഖപ്പെടുത്തിയിരുന്നത്.
എന്നാല് ഈ വര്ഷം ഏഴ് മാസം പിന്നിടുമ്പോള് തന്നെ കഴിഞ്ഞ വര്ഷത്തെ ആകെ മരണസംഖ്യയുടെ പകുതിയിലധികവും അപകടങ്ങളുടെ വലിയൊരു ഭാഗവും റിപ്പോര്ട്ട് ചെയ്തു കഴിഞ്ഞു. ഇതേ അവസ്ഥ തുടര്ന്നാല് വര്ഷാവസാനത്തോടെ ദുരന്തവ്യാപ്തി മുന്വര്ഷത്തേക്കാള് ഉയര്ന്നേക്കുമെന്ന വലിയ ആശങ്കയിലാണ് അധികൃതരും പൊതുജനങ്ങളും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
