വറ്റാത്ത ജലസമൃദ്ധി: ഭൂമിക്കടിയിലെ വിസ്മയമായി പെർമുദെ കുണ്ടേരിയിലെ സുരങ്കകൾ

പെർമുദെ ∙ കത്തുന്ന വേനലിൽ ചുട്ടുപൊള്ളുമ്പോഴും വറ്റാത്ത ജലസമൃദ്ധിയുമായി വിസ്മയമാകുകയാണ് പെർമുദെ കുണ്ടേരിയിലെ സുരങ്കകൾ. ആധുനിക എൻജിനീയറിങ് സംവിധാനങ്ങളെ പോലും അമ്പരപ്പിക്കുന്ന ഈ ജലസ്രോതസ്സ്, മനുഷ്യന്റെ കഠിനപ്രയത്നത്തിന്റെയും ക്ഷമയുടെയും അടയാളമാണ്.
ഭൂമിക്കടിയിലൂടെ മീറ്ററുകളോളം നീളുന്ന ഈ തുരങ്കങ്ങൾ നിർമിച്ച കഥ പറഞ്ഞാൽ ഒരുപക്ഷേ വരുംതലമുറ വിശ്വസിച്ചെന്നുവരില്ല.

അത്രയും സാഹസികവും ക്ലേശകരവുമാണ് ഇതിന്റെ നിർമാണ രീതി. സാധാരണ കിണറുകൾ ഭൂമിക്ക് ലംബമായി താഴേക്ക് കുഴിക്കുമ്പോൾ, സുരങ്കകൾ കുന്നിൻചെരിവുകളിൽ നിന്ന് ഭൂമിക്ക് സമാന്തരമായി തുരന്നാണു നിർമിക്കുന്നത്.

കാലുകൾ മടക്കി ​കുനിഞ്ഞിരുന്ന് നിർമിക്കുന്ന ഇവ വെളിച്ചം കടന്നുചെല്ലാത്ത ഭൂമിക്കടിയിലെ വിസ്‌മയമാണ്. യന്ത്രസഹായമില്ലാതെ വെറും കൈക്കോട്ടും പിക്കാസും ഉപയോഗിച്ച് കടുപ്പമേറിയ ചെങ്കല്ല് തുരന്നുള്ള ഈ അധ്വാനം മാസങ്ങളോളം നീളുന്നതാണ്.

ശ്വസിക്കാൻ പോലും പ്രയാസമുള്ള തുരങ്കത്തിനുള്ളിൽ വായുവിനായി മെഴുകുതിരി കത്തിച്ചുവച്ച് മണിക്കൂറുകളോളം കുനിഞ്ഞിരുന്ന് മണ്ണുനീക്കി ഉറവ കണ്ടെത്തുന്ന ഈ വിദ്യ ഇന്ന് അന്യമാകുന്നു.
എത്ര കടുത്ത വേനലിലും പെർമുദെയിലെ ഈ സുരങ്ക വറ്റാറില്ല. മലയുടെ ആഴങ്ങളിൽ ഒളിഞ്ഞിരിക്കുന്ന തെളിനീർ ഉറവകളെ കണ്ടെത്തി അവയെ പുറത്തെത്തിക്കുന്നതോടെ കാർഷിക ആവശ്യങ്ങൾക്കും കുടിവെള്ളത്തിനും ഈ പ്രദേശം സ്വയംപര്യാപ്തമാകുന്നു.

വൈദ്യുതിയുടെയോ പമ്പുകളുടെയോ സഹായമില്ലാതെ ഗുരുത്വാകർഷണ ബലത്താൽ സുരങ്കയിൽനിന്നു തെളിനീർ ഒഴുകിയെത്തുന്നു. ​ പരമ്പരാഗത അറിവുകളും കഠിനമായ ശാരീരിക അധ്വാനവും ചേർന്ന ഈ ജലസംഭരണ രീതി പരിസ്ഥിതി സൗഹൃദത്തിന്റെ ഉത്തമ മാതൃകയാണ്.

ജലക്ഷാമം നേരിടുന്ന വർത്തമാനകാലത്ത്, പൈതൃകമായി ലഭിച്ച ഈ സുരങ്കകളെ സംരക്ഷിക്കേണ്ടത് നാടിന്റെ നിലനിൽപിന് അനിവാര്യമാണെന്നു പൈവളിഗെ പഞ്ചായത്തംഗം കെ.എച്ച്.ശ്രീനിവാസൻ പറഞ്ഞു. …