കോർപറേഷനിൽ ഉദ്യോഗസ്ഥർക്കും കരാറുകാർക്കും കർശന മുന്നറിയിപ്പുമായി മേയർ വി.വി.രാജേഷ്

തിരുവനന്തപുരം നഗരസഭയിലെ അനാസ്ഥകൾക്കും ക്രമക്കേടുകൾക്കും എതിരെ കർശന നടപടികളുമായി മേയർ വി.വി.രാജേഷ്. കൗൺസിലർമാരുടെയും കരാറുകാരുടെയും ഉദ്യോഗസ്ഥരുടെയും സംയുക്ത യോഗത്തിൽ സംസാരിക്കുകയായിരുന്നു അദ്ദേഹം.

ഫയലുകൾ മനഃപൂർവം വൈകിപ്പിക്കുകയും ബില്ലുകൾ തടഞ്ഞുവെക്കുകയും ചെയ്യുന്ന ഉദ്യോഗസ്ഥർക്ക് മേലിൽ കോർപറേഷനിൽ തുടരാൻ അവസരമുണ്ടാകില്ലെന്ന് അദ്ദേഹം വ്യക്തമാക്കി. ഉദ്യോഗസ്ഥരുടെ വീഴ്ചകൾ
രേഖകളിൽ കൃത്രിമം കാണിക്കുന്ന ഉദ്യോഗസ്ഥരുടെ നടപടികളെ മേയർ രൂക്ഷമായി വിമർശിച്ചു.

“പൂജ്യത്തിനു പകരം 8 എന്ന് രേഖപ്പെടുത്തിയും ആറിനെ 9 ആക്കിയും ചില ഉദ്യോഗസ്ഥർ നടത്തുന്ന തട്ടിപ്പ് കണ്ടെത്തിയിട്ടുണ്ട്” എന്ന് അദ്ദേഹം യോഗത്തിൽ അറിയിച്ചു. കരാറുകാർക്കുള്ള നിർദേശങ്ങൾ
ടെൻഡർ നടപടികളിലും പദ്ധതി നടത്തിപ്പിലും സുതാര്യത ഉറപ്പാക്കുമെന്ന് മേയർ മുന്നറിയിപ്പ് നൽകി.

കുറഞ്ഞ തുകയ്ക്ക് ടെൻഡർ ഏറ്റെടുത്ത ശേഷം കരാർ തുക പിന്നീട് വർധിപ്പിക്കുന്ന തന്ത്രങ്ങൾ കോർപറേഷനിൽ അനുവദിക്കില്ല. പദ്ധതി സ്ഥലങ്ങൾ നേരിട്ട് സന്ദർശിക്കാതെ ടെൻഡർ നടപടികളിൽ പങ്കെടുക്കുന്നത് കർശനമായി നിയന്ത്രിക്കും.

നിശ്ചിത കാലാവധിക്കുള്ളിൽ തന്നെ പ്രവൃത്തികൾ പൂർത്തിയാക്കണം. “ജൂണിൽ ടെൻഡർ ചെയ്യുന്ന പ്രവൃത്തികൾ നവംബറിൽ പൂർത്തിയാക്കണം” എന്ന് അദ്ദേഹം നിർദേശിച്ചു.

ഭാവി നടപടികൾ
പദ്ധതികൾ അടുത്ത സാമ്പത്തിക വർഷത്തിലേക്ക് നീട്ടിക്കൊണ്ടുപോകുന്ന (സ്പിൽ ഓവർ) പ്രവണതയ്ക്ക് കടിഞ്ഞാണിടും. ഉദ്യോഗസ്ഥ നിയമനങ്ങളിൽ കരാറുകാർ നടത്തുന്ന ഇടപെടലുകളെയും അനാവശ്യ ശുപാർശകളെയും ശക്തമായി എതിർക്കുമെന്ന് മേയർ വ്യക്തമാക്കി.

ഡപ്യൂട്ടി മേയർ ജി.എസ്.ആശാനാഥ് അധ്യക്ഷത വഹിച്ച യോഗത്തിൽ വിവിധ സ്ഥിരം സമിതി അധ്യക്ഷന്മാരും ഉദ്യോഗസ്ഥരും പങ്കെടുത്തു.