പാലക്കാട് നഗരത്തിൽ ഇന്ന് ഗതാഗത നിയന്ത്രണം; യാത്രാ ക്രമീകരണങ്ങൾ പ്രഖ്യാപിച്ചു

സിപിഎം വിശാല ജില്ലാ കമ്മിറ്റി യോഗത്തിന്റെ ഭാഗമായി പൊതുയോഗം സംഘടിപ്പിക്കുന്നതിന്റെ പശ്ചാത്തലത്തിൽ, പാലക്കാട് നഗരത്തിൽ ഇന്ന് ഒക്ടോബര്‍ 4 വൈകിട്ട് 3.30 മുതൽ പ്രത്യേക ഗതാഗത ക്രമീകരണങ്ങൾ ഏർപ്പെടുത്തിയതായി ട്രാഫിക് എൻഫോഴ്സ്മെന്റ് യൂണിറ്റ് അറിയിച്ചു. പൊതുജനങ്ങളുടെ യാത്രാസൗകര്യം മുൻനിർത്തിയാണ് പുതിയ റൂട്ട് മാറ്റങ്ങൾ നടപ്പിലാക്കിയിരിക്കുന്നത്.

വിവിധ ഭാഗങ്ങളിൽ നിന്നെത്തുന്ന വാഹനങ്ങൾക്കായി നിശ്ചയിച്ചിട്ടുള്ള ക്രമീകരണങ്ങൾ താഴെ പറയുന്നവയാണ്: ∙ തൃശൂർ, ആലത്തൂർ, കുഴൽമന്ദം ഭാഗത്തു നിന്നുള്ള ബസുകൾ കാടാങ്കോട്, ചന്ദ്രനഗർ, കൽമണ്ഡപം വഴി സ്റ്റേഡിയം സ്റ്റാൻഡിലെത്തി തിരിച്ചുപോകണം. ∙ ചിറ്റൂർ, വാളയാർ, കൊഴിഞ്ഞാമ്പാറ, പൊള്ളാച്ചി ഭാഗത്തു നിന്നുള്ള ബസുകൾ ചന്ദ്രനഗർ കൽമണ്ഡപം വഴി സ്റ്റേഡിയം സ്റ്റാൻഡിലെത്തി പോകണം.

∙ ഒറ്റപ്പാലം, പട്ടാമ്പി, ഷൊർണൂർ, കോട്ടായി ഭാഗത്തു നിന്നുള്ള ബസുകൾ ടൗൺ സ്റ്റാൻഡിൽ എത്തി തിരിച്ചുപോകണം. ∙ കോഴിക്കോട്, മണ്ണാ‍ർക്കാട്, കോങ്ങാട്, ചെർപ്പുളശ്ശേരി, ശ്രീകൃഷ്ണപുരം ഭാഗത്തു നിന്നുള്ള ബസുകൾ താരേക്കാട് വഴി മുനിസിപ്പൽ സ്റ്റാൻഡിലെത്തി തിരിച്ചുപോകണം.

∙ മലമ്പുഴ, റെയിൽവേ കോളനി, കോട്ടേക്കാട് ഭാഗത്തു നിന്നുള്ള ബസുകൾ മണലി കൽമണ്ഡപം– കുന്നത്തൂർമേട്–സൗത്ത് പൊലീസ് സ്റ്റേഷൻ–കോട്ടമൈതാനം –ടൗൺ സ്റ്റാൻഡ് വഴി പോകണം. ∙ തൃശൂർ ഭാഗത്തു നിന്നുള്ള കെഎസ്ആർടിസി ബസുകൾ കാടാങ്കോട്, മണപ്പുള്ളിക്കാവ്, കോട്ടമൈതാനം വഴി കെഎസ്ആർടിസി സ്റ്റാൻഡിൽ എത്തി തിരിച്ച് യാക്കര റോഡ് കാഴ്ചപ്പറമ്പ് വഴി പോകണം.

∙ കോയമ്പത്തൂർ, പൊള്ളാച്ചി ഭാഗത്തു നിന്നുള്ള കെഎസ്ആർടിസി ബസുകൾ കാടാങ്കോട്, കോട്ടമൈതാനം വഴി കെഎസ്ആർടിസി സ്റ്റാൻഡിൽ എത്തി തിരിച്ച് ഡിപിഒ റോഡ്–യാക്കര, കാഴ്ചപ്പറമ്പ് വഴി സർവീസ് നടത്തണം. ∙ ഷൊർണൂർ, ഗുരുവായൂർ, പട്ടാമ്പി ഭാഗത്തു നിന്നുള്ള കെഎസ്ആർടിസി ബസുകൾ സ്ഥിരം റൂട്ടിൽ കെഎസ്ആർടിസി സ്റ്റാൻഡ‍ിലെത്തി തിരിച്ചു പോകണം.

∙ കോഴിക്കോട്, മണ്ണാർക്കാട് ഭാഗത്തു നിന്നുള്ള കെഎസ്ആർടിസി ബസുകൾ ഒലവക്കോട്, കാവിൽപ്പാട്, പേഴുങ്കര, മേപ്പറമ്പ്, മേഴ്സി കോളജ് വഴി കെഎസ്ആർടിസി സ്റ്റാൻഡിലെത്തി ഇതേ വഴി തന്നെ തിരിച്ചുപോകണം.