ഇന്ത്യയിലെ മൊബൈൽ ഫോൺ ഉപയോക്താക്കൾക്കും വിപണിക്കും വലിയ ആശ്വാസമായി നികുതി നിരക്കുകളിൽ കുറവുണ്ടായേക്കുമെന്ന് സൂചന. നിലവിലുള്ള 18 ശതമാനം ജിഎസ്ടി നിരക്കിൽ നിന്നാണ് ഇളവുകൾക്ക് സാധ്യത തെളിയുന്നത്.
സെപ്റ്റംബർ 12ന് കേന്ദ്ര ധനമന്ത്രി നിർമല സീതാരാമന്റെ അധ്യക്ഷതയിൽ ചേരാനിരിക്കുന്ന ജിഎസ്ടി കൗൺസിൽ യോഗത്തിൽ നിർണ്ണായക തീരുമാനങ്ങളുണ്ടായേക്കുമെന്നാണ് റിപ്പോർട്ടുകൾ വ്യക്തമാക്കുന്നത്. ഇതിന്റെ ഭാഗമായി 25,000 രൂപ വരെയുള്ള സ്മാർട്ട്ഫോണുകളുടെ ജിഎസ്ടി നിരക്ക് 5 ശതമാനമായി വെട്ടിക്കുറച്ചേക്കുമെന്നാണ് വിലയിരുത്തപ്പെടുന്നത്.
അടുത്തിടെയായി വിപണിയിൽ അനുഭവപ്പെട്ട രൂക്ഷമായ വിലക്കയറ്റം തടയാനും ഉപഭോക്താക്കൾക്ക് ആശ്വാസം പകരാനും ഈ നീക്കം സഹായകരമാകും.
ആഗോളതലത്തിലുണ്ടായ സാമ്പത്തിക പ്രതിസന്ധികളും മെമ്മറി ചിപ്പുകളുടെ വില വർദ്ധനവും കാരണം സ്മാർട്ട്ഫോൺ നിർമ്മാതാക്കൾ കഴിഞ്ഞ കാലങ്ങളിൽ വില ഉയർത്താൻ നിർബന്ധിതരായി തീർന്നിരുന്നു. വിവിധ മോഡലുകൾക്ക് 500 രൂപ മുതൽ 12,000 രൂപ വരെയാണ് വിപണിയിൽ വില വർദ്ധിച്ചത്.
ഈ വിലക്കയറ്റം വിപണിയെ കനത്ത ആഘാതത്തിലേക്ക് നയിക്കുകയും ചെയ്തു. ഈ വർഷം ജനുവരി-മാർച്ച് കാലയളവിൽ സ്മാർട്ട്ഫോൺ വിപണിയിൽ 7.9 ശതമാനത്തിന്റെ ഇടിവാണ് രേഖപ്പെടുത്തിയത്.
എന്നാൽ ഏപ്രിൽ-ജൂൺ പാദമായപ്പോഴേക്കും ഈ നഷ്ടം 11.1 ശതമാനമായി വർദ്ധിക്കുകയാണുണ്ടായത്. ഈ സാഹചര്യത്തിലാണ് ഫോണുകളുടെ ജിഎസ്ടി നിരക്ക് കുറയ്ക്കുന്നത് സംബന്ധിച്ച ചർച്ചകൾ സജീവമായിരിക്കുന്നത്.
എങ്കിലും, ജിഎസ്ടി കൗൺസിലിന്റെ ഔദ്യോഗിക അജൻഡ ഇതുവരെ പ്രഖ്യാപിക്കപ്പെട്ടിട്ടില്ല. ഇതിനുപുറമെ, 2.5 ലക്ഷം രൂപ വരെ ഇൻപുട്ട് ടാക്സ് ക്രെഡിറ്റ് (ഐടിസി) ക്ലെയിം ചെയ്യുന്ന കമ്പനികളുടെ ജിഎസ്ടി റജിസ്ട്രേഷൻ ചട്ടങ്ങളിൽ വരുത്തേണ്ട
മാറ്റങ്ങളും കൗൺസിൽ യോഗം പരിശോധിച്ചേക്കും. മുൻവർഷം സെപ്റ്റംബറിലാണ് ഇതിന് മുൻപ് ജിഎസ്ടി കൗൺസിൽ യോഗം ചേർന്നിരുന്നത്.
ആ യോഗത്തിലായിരുന്നു രാജ്യത്ത് ജിഎസ്ടി 2.0 അവതരിപ്പിക്കുകയും നികുതി സ്ലാബ് ഘടനകളിൽ സമഗ്രമായ മാറ്റങ്ങൾ വരുത്തുകയും ചെയ്തത്. 2017-ൽ ജിഎസ്ടി സംവിധാനം പ്രാബല്യത്തിൽ വന്നതു മുതൽ 5%, 12%, 18%, 28% എന്നിങ്ങനെയായിരുന്നു പ്രധാന സ്ലാബുകൾ നിലവിലുണ്ടായിരുന്നത്.
എന്നാൽ കഴിഞ്ഞ വർഷത്തെ യോഗത്തിൽ 12%, 28% എന്നീ സ്ലാബുകൾ പൂർണ്ണമായും ഒഴിവാക്കുകയുണ്ടായി. ഈ സ്ലാബുകളുടെ കീഴിൽ വന്നിരുന്ന വിവിധ ഉൽപ്പന്നങ്ങളും സേവനങ്ങളും പിന്നീട് 5%, 18% സ്ലാബുകളിലേക്ക് പുനഃക്രമീകരിക്കപ്പെടുകയാണുണ്ടായത്.
അതേസമയം, മുൻപ് 28% സ്ലാബിൽ ഉൾപ്പെടുത്തിയിരുന്ന ആഡംബര വസ്തുക്കളും സേവനങ്ങളും, ഒപ്പം സിഗരറ്റ് പോലുള്ള ഉപയോഗം നിരുത്സാഹപ്പെടുത്തേണ്ട പ്രത്യേക ഉൽപ്പന്നങ്ങളും 40% എന്ന പ്രത്യേക നികുതി സ്ലാബിലേക്കും മാറ്റിയിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
