ആഗോള ക്രിപ്റ്റോ കറൻസി വിപണിയിൽ ബിറ്റ്കോയിന്റെ മൂല്യത്തിൽ കനത്ത ഇടിവ് രേഖപ്പെടുത്തി. ഏതാനും മാസങ്ങൾക്ക് മുൻപ് 1.26 ലക്ഷം ഡോളർ എന്ന റെക്കോർഡ് നിലവാരത്തിലുണ്ടായിരുന്ന ബിറ്റ്കോയിൻ വില, നിലവിൽ 60,000 ഡോളറിനും താഴേക്ക് കൂപ്പുകുത്തിയിരിക്കുകയാണ്.
കഴിഞ്ഞ ദിവസത്തെ വ്യാപാരത്തിനിടെ വില 58,000 ഡോളർ എന്ന നിലവാരത്തിലേക്ക് വരെ താഴ്ന്നു. 2025 ഒക്ടോബറിലായിരുന്നു ബിറ്റ്കോയിൻ 1.26 ലക്ഷം ഡോളർ എന്ന ചരിത്രനേട്ടം കൈവരിച്ചത്.
തുടർന്നുള്ള വിലയിടിവ് ക്രിപ്റ്റോ വിപണിയിൽ കനത്ത ആഘാതമാണ് ഏൽപ്പിച്ചത്. വിപണിയിൽ നിന്ന് ഏകദേശം 1.3 ട്രില്യൻ ഡോളറിലധികം മൂല്യമാണ് ഈ കാലയളവിനുള്ളിൽ അപ്രത്യക്ഷമായത്.
വിലയിടിവിന് കാരണമായ പ്രധാന ഘടകങ്ങൾ: ബിറ്റ്കോയിന്റെ മൂല്യം ഇടിയാൻ കാരണമായ വിവിധ ഘടകങ്ങൾ വിദഗ്ധർ ചൂണ്ടിക്കാട്ടുന്നു: നിക്ഷേപങ്ങൾ എഐ മേഖലയിലേക്ക്: ലോകമെമ്പാടുമുള്ള വൻകിട നിക്ഷേപകരും ധനകാര്യ സ്ഥാപനങ്ങളും ക്രിപ്റ്റോ വിപണിയിൽ നിന്നുള്ള തങ്ങളുടെ നിക്ഷേപങ്ങൾ പിൻവലിച്ച് ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യാ മേഖലയിലേക്ക് മാറ്റുകയാണ്.
യുഎസ് ടെക് ഭീമന്മാർ എഐ ഇൻഫ്രാസ്ട്രക്ചർ മേഖലയിൽ മാത്രം 700 ബില്യൻ ഡോളറിലധികം നിക്ഷേപം നടത്തുമെന്നാണ് പുറത്തുവരുന്ന കണക്കുകൾ വ്യക്തമാക്കുന്നത്. ഇടിഎഫുകളിൽ നിന്നുള്ള നിക്ഷേപ പിൻവലിക്കൽ: സ്പോട്ട് ബിറ്റ്കോയിൻ ഇടിഎഫുകളിൽ നിന്ന് തുടർച്ചയായ ഏഴാം ആഴ്ചയും വലിയ തോതിൽ പണം പിൻവലിക്കപ്പെടുന്ന പ്രവണത തുടരുന്നു.
കഴിഞ്ഞ ഒരു മാസത്തിനുള്ളിൽ മാത്രം ഈ ഫണ്ടുകളിൽ നിന്ന് 6 ബില്യൻ ഡോളറിലധികമാണ് പുറത്തേക്ക് പോയത്. യുഎസ് ഫെഡറൽ റിസർവിന്റെ നിലപാട്: പലിശനിരക്ക് കുറയ്ക്കുമെന്ന വിപണിയുടെ പ്രതീക്ഷകൾക്ക് വിരുദ്ധമായി, പലിശനിരക്കുകൾ ഉയരാനുള്ള സാധ്യത വർധിച്ചത് ബിറ്റ്കോയിന് തിരിച്ചടിയായി.
ഉയർന്ന പലിശനിരക്കുകൾ നിലനിൽക്കുമ്പോൾ, റിസ്ക് കൂടിയ ഡിജിറ്റൽ ആസ്തികളിൽ നിന്ന് മാറി സുരക്ഷിതമായ ഡോളറിലേക്കും ട്രഷറി ബോണ്ടുകളിലേക്കും നിക്ഷേപങ്ങൾ മാറ്റാൻ നിക്ഷേപകർ നിർബന്ധിതരാകുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
