മുംബൈയിലെ മഴയുടെ അളവും ഗതിയും അടിസ്ഥാനമാക്കി രാജ്യത്തെ ആദ്യത്തെ ‘വെതർ ഡെറിവേറ്റീവ്’ വ്യാപാര സംവിധാനം അവതരിപ്പിക്കാൻ നാഷനൽ കമ്മോഡിറ്റി ആൻഡ് ഡെറിവേറ്റീവ്സ് എക്സ്ചേഞ്ച് (NCDEX) തയ്യാറെടുക്കുന്നു. ജൂൺ ഒന്നുമുതൽ ഈ നൂതന സംവിധാനം പ്രവർത്തനസജ്ജമാകും.
നിക്ഷേപകർക്കും വിവിധ ബിസിനസ് സ്ഥാപനങ്ങൾക്കും കാലാവസ്ഥാ വ്യതിയാനവുമായി ബന്ധപ്പെട്ട സാമ്പത്തിക ഇടപാടുകളിൽ ഏർപ്പെടാൻ ഇതിലൂടെ അവസരം ലഭിക്കും.
സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയുടെ (SEBI) അംഗീകാരത്തോടെ ‘RAINMUMBAI’ എന്ന പേരിലാണ് ഈ വിപണി അവതരിപ്പിക്കുന്നത്. ഓഹരി വിപണിയിലെ കമ്മോഡിറ്റി, ബോണ്ട്, കറൻസി ഇടപാടുകളിൽ നിന്ന് വിഭിന്നമായി, ഇവിടെ ഭൗതികമായ ചരക്കുകൈമാറ്റം ഉണ്ടായിരിക്കില്ല.
പകരം, മഴയുടെ അളവിനെ മാനദണ്ഡമാക്കി നിശ്ചയിക്കുന്ന ലാഭനഷ്ടങ്ങൾ പണമായി തീർപ്പാക്കുന്ന രീതിയാണ് അവലംബിക്കുന്നത്. കേന്ദ്ര കാലാവസ്ഥാ വകുപ്പ് (IMD) മുംബൈയിലെ സാന്താക്രൂസ്, കൊളാബ സ്റ്റേഷനുകളിൽ നിന്ന് ലഭ്യമാക്കുന്ന വിവരങ്ങളെ അടിസ്ഥാനമാക്കിയായിരിക്കും വ്യാപാരങ്ങൾ ക്രമീകരിക്കുക.
ഒരു മില്ലിമീറ്റർ മഴയ്ക്ക് 50 രൂപ എന്ന നിരക്കിലായിരിക്കും ലോട്ടുകൾ നിശ്ചയിക്കുന്നത്. 50 ലോട്ടുകളായോ അതിന്റെ ഗുണിതങ്ങളായോ നിക്ഷേപകർക്ക് കരാറുകളിൽ പങ്കാളികളാകാം.
രാജ്യത്തിന്റെ സാമ്പത്തിക തലസ്ഥാനമായ മുംബൈയിൽ മഴക്കെടുതികൾ മൂലം ലോജിസ്റ്റിക്സ്, കൃഷി, ബാങ്കിങ്, എഫ്എംസിജി, വൈദ്യുതി വിതരണം തുടങ്ങിയ മേഖലകളിൽ വലിയ തോതിലുള്ള സാമ്പത്തിക തടസ്സങ്ങൾ ഉണ്ടാകാറുണ്ട്. ഇത്തരം സന്ദർഭങ്ങളിൽ ബിസിനസ് സ്ഥാപനങ്ങൾക്ക് തങ്ങളുടെ നഷ്ടങ്ങൾ ലഘൂകരിക്കാൻ ഈ വിപണി സഹായകമാകും.
കാലാവസ്ഥാ പ്രവചനങ്ങളെ മുൻനിർത്തി ബിസിനസ് തന്ത്രങ്ങൾ ആവിഷ്കരിക്കാനും സാമ്പത്തിക പ്രതിസന്ധികളിൽ നിന്ന് സംരക്ഷണം നേടാനും ഈ സംവിധാനത്തിലൂടെ സാധിക്കും. സാധാരണ ട്രേഡർമാർക്കും ഈ പുതിയ വിപണിയിൽ ഇടപാടുകൾ നടത്തുന്നതിന് അവസരമുണ്ടാകും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
