നഗരത്തിന് കൗതുകമായി പഴക്കമേറിയ ജലവിതരണ തുരങ്കം; തിരുവനന്തപുരത്തിന്റെ അപൂർവ്വ എൻജിനീയറിങ് വിസ്മയം

തലസ്ഥാന നഗരിയുടെ ഹൃദയഭാഗത്ത് ചരിത്രത്തിന്റെയും എൻജിനീയറിങ് വൈഭവത്തിന്റെയും ശേഷിപ്പായി വർഷങ്ങളുടെ പഴക്കമുള്ള തുരങ്കം ശ്രദ്ധ ആകർഷിക്കുന്നു. നഗരത്തിലേക്ക് കുടിവെള്ളം എത്തിക്കുന്ന പ്രധാന പൈപ്പ്‌ലൈനിന്റെ ഭാഗമായ ഈ തുരങ്കം, വെള്ളയമ്പലം ജലഭവനിൽ നിന്ന് തുടങ്ങി മ്യൂസിയം–വെള്ളയമ്പലം റോഡിനടിയിലൂടെയാണ് കടന്നുപോകുന്നത്.

ചരിത്രപ്രസിദ്ധമായ ഈ നിർമിതിക്ക് പിന്നിൽ ഒരു നൂറ്റാണ്ടിന്റെ പഴക്കമുണ്ട്. 1928ൽ രാജകുടുംബവും ബ്രിട്ടീഷ് വൈസ്രോയിയും ഉൾപ്പെടെയുള്ള പ്രമുഖർ ചേർന്നാണ് ഇത് നിർമ്മിച്ചത്.

ചുണ്ണാമ്പും കരിങ്കൽപ്പൊടിയും മറ്റു കൂട്ടുകളും ചേർത്തുള്ള സുർക്കി മിശ്രിതത്തിലാണ് ഈ തുരങ്കത്തിന്റെ നിർമാണം പൂർത്തിയാക്കിയിട്ടുള്ളത്. ഏകദേശം 170 മീറ്റർ നീളമുള്ള ഈ തുരങ്കത്തിലൂടെ ഇക്കാലയളവിലും തടസ്സങ്ങളൊന്നുമില്ലാതെ ജലവിതരണം നടക്കുന്നുവെന്നതാണ് ഏറ്റവും വലിയ പ്രത്യേകത.

ദിനംപ്രതി രാപകൽ ഭേദമില്ലാതെ അതിതീവ്ര ഗതാഗതത്തിരക്കുള്ള മ്യൂസിയം-വെള്ളയമ്പലം റോഡിന് അടിയിലൂടെയാണ് ഈ തുരങ്കം സ്ഥിതി ചെയ്യുന്നത്. എന്നാൽ, ഇതിന്റെ ഉള്ളിൽ നിൽക്കുമ്പോൾ മുകളിലെ റോഡിലെ വാഹനങ്ങളുടെ ശബ്ദമോ യാതൊരുവിധ ബഹളങ്ങളോ കേൾക്കാൻ സാധിക്കില്ല.

ആയിരത്തോളം കുടുംബങ്ങളുടെ കുടിവെള്ള ആവശ്യങ്ങൾ നിറവേറ്റുന്നതിനായാണ് ഈ സംവിധാനം അന്ന് രൂപകൽപ്പന ചെയ്തത്. റോഡിനടിയിലൂടെയുള്ള ഈ പൈപ്പ്‌ലൈനിൽ യാതൊരുവിധ യാന്ത്രിക പമ്പുകളുടെയും സഹായമില്ലാതെ, പൂർണ്ണമായും ഗുരുത്വാകർഷണ തത്വം ഉപയോഗിച്ചാണ് ജലം ഒഴുകിയെത്തുന്നത്.

വെള്ളയമ്പലം വാട്ടർ വർക്സും അരുവിക്കര ഡാമും തമ്മിലുള്ള 22 മീറ്റർ ഉയരവ്യത്യാസമാണ് ഈ ജലപ്രവാഹത്തിന് അടിസ്ഥാനമാകുന്നത്. നഗരത്തിന്റെ മറ്റു ഭാഗങ്ങളിൽ ഇത്തരം തുരങ്ക സംവിധാനങ്ങൾ ഇല്ലാതെ നേരിട്ട് റോഡിനടിയിലൂടെയാണ് പൈപ്പ്‌ലൈനുകൾ കടന്നുപോകുന്നത്.

ഒരു നൂറ്റാണ്ടോളം പഴക്കമുണ്ടെങ്കിലും യാതൊരുവിധ കേടുപാടുകളും കൂടാതെ ഇന്നും സുരക്ഷിതമായി നിലകൊള്ളുന്നത് പുരാതന എൻജിനീയറിങ് മികവിന്റെ വലിയ തെളിവായി മാറുന്നു.