കസ്റ്റഡിയിലെടുക്കുന്ന സമയം മുതൽ 24 മണിക്കൂർ പരിധി: സുപ്രീംകോടതിയുടെ സുപ്രധാന ഉത്തരവ്

അറസ്റ്റ് നടപടികളിലെ 24 മണിക്കൂർ സമയപരിധിയെക്കുറിച്ച് നിർണ്ണായകമായ ഉത്തരവുമായി സുപ്രീംകോടതി. ഒരാളെ പോലീസ് കസ്റ്റഡിയിൽ എടുക്കുന്ന നിമിഷം മുതൽ തന്നെ ഈ 24 മണിക്കൂർ കണക്കാക്കി തുടങ്ങണമെന്നാണ് കോടതിയുടെ കർശന നിർദ്ദേശം.

അറസ്റ്റ് രേഖപ്പെടുത്തുന്നത് വൈകിപ്പിച്ച് ഭരണഘടന ഉറപ്പുനൽകുന്ന അവകാശങ്ങളെ മറികടക്കാൻ ഉദ്യോഗസ്ഥർക്ക് സാധിക്കില്ലെന്നും കോടതി വ്യക്തമാക്കി. ജസ്റ്റിസുമാരായ ഉജ്ജൽ ഭുയാൻ, അതുൽ എസ്.

ചന്ദുർകർ എന്നിവരടങ്ങിയ ബെഞ്ചിന്റേതാണ് ഈ സുപ്രധാന നിരീക്ഷണം. ഭരണഘടനയുടെ ആർട്ടിക്കിൾ 22(2) പ്രകാരം, കസ്റ്റഡിയിലെടുക്കുന്ന സമയം മുതൽ 24 മണിക്കൂറിനുള്ളിൽ പ്രതിയെ മജിസ്ട്രേറ്റിന് മുന്നിൽ ഹാജരാക്കണം.

അറസ്റ്റും കസ്റ്റഡിയും വെവ്വേറെ കാണാനാകില്ലെന്നും കോടതി ചൂണ്ടിക്കാട്ടി. ഇതുമായി ബന്ധപ്പെട്ട

സുപ്രധാന മാർഗ്ഗനിർദ്ദേശങ്ങൾ താഴെ പറയുന്നവയാണ്: – കസ്റ്റഡിയിലെടുക്കുന്ന തീയതിയും സമയവും മജിസ്ട്രേറ്റുമാർ കൃത്യമായി രേഖപ്പെടുത്തണം.
– ഈ 24 മണിക്കൂർ കാലയളവ് കൃത്യമായി പാലിച്ചിട്ടുണ്ടോ എന്ന് മജിസ്ട്രേറ്റുമാർ ഉറപ്പുവരുത്തേണ്ടതാണ്.
– പ്രതിയെ മജിസ്ട്രേറ്റിന് മുന്നിലെത്തിക്കുന്നതിനുള്ള യാത്രാസമയം മാത്രമാണ് ഈ 24 മണിക്കൂറിൽ നിന്ന് ഒഴിവാക്കാൻ അനുവാദമുള്ളൂ.
– അന്വേഷണത്തിന്റെയോ ചോദ്യം ചെയ്യലിന്റെയോ പേരിൽ പ്രതിയെ കസ്റ്റഡിയിൽ വെക്കുന്ന സമയം ഈ പരിധിയിൽ നിന്ന് ഒഴിവാക്കാനാവില്ല.
– നിശ്ചിത സമയത്തിനുള്ളിൽ ഹാജരാക്കുന്നതിൽ വീഴ്ച വരുത്തിയാൽ പ്രതിയെ ഉടൻ മോചിപ്പിക്കണമെന്നും കോടതി നിർദ്ദേശിച്ചു. അറസ്റ്റ് രേഖപ്പെടുത്തിയ സമയം മുതൽ 24 മണിക്കൂർ കണക്കാക്കിയാൽ മതിയെന്ന വാദം ഭരണഘടനാ വിരുദ്ധമാണെന്ന് കോടതി നിരീക്ഷിച്ചു.

ഒരു എൻഡിപിഎസ് (NDPS) കേസിലെ പ്രതികൾ സമർപ്പിച്ച ഹർജി പരിഗണിച്ചുകൊണ്ടാണ് കോടതിയുടെ ഈ ഉത്തരവ്.