പസഫിക് സമുദ്രത്തിൽ മൂന്ന് മാസം; കുട്ടികളടക്കം അഞ്ചംഗ സംഘത്തിന്റെ അത്ഭുതകരമായ അതിജീവനം ലോകശ്രദ്ധയിൽ

പസഫിക് സമുദ്രത്തിൽ മൂന്ന് മാസത്തോളം അകപ്പെട്ടുപോയ, രണ്ട് കുട്ടികൾ ഉൾപ്പടെയുള്ള അഞ്ചംഗ സംഘത്തെ അത്ഭുതകരമായി രക്ഷപ്പെടുത്തിയ സംഭവമാണ് ഇപ്പോൾ വാർത്തകളിൽ ഇടം നേടുന്നത്. ഇത്തരത്തിലുള്ള അതിജീവനകഥകൾ ഇതിനോടകം തന്നെ വലിയ ചർച്ചയായിട്ടുണ്ട്.

ലഭ്യമായ വിവരങ്ങൾ പ്രകാരം, കഴിഞ്ഞ ദിവസം കിരിബാത്തിയിലെ ഫാനിങ് ദ്വീപിന് സമീപത്തുനിന്നാണ് ഗ്രാമവാസികൾ ഇവരെ സുരക്ഷിതമായി പുറത്തെടുത്തത്. ഫെഡറേറ്റഡ് സ്റ്റേറ്റ്സ് ഓഫ് മൈക്രോനേഷ്യയിൽനിന്ന് ഏകദേശം 5,400 കിലോമീറ്ററിലധികം ദൂരം താണ്ടി, വെറും 20 അടി മാത്രം നീളമുള്ള ചെറിയ ഒരു ബോട്ടിലാണ് ഇവർ പസഫിക് സമുദ്രത്തിലൂടെ ഒഴുകിയെത്തിയത്.

മൈക്രോനേഷ്യയിലെ മുരിലോ, റുവോ ദ്വീപുകൾക്കിടയിൽ ഒരു മണിക്കൂർ മാത്രം ദൈർഘ്യമുള്ള യാത്രയ്ക്കായി പുറപ്പെട്ടതായിരുന്നു ഈ സംഘം. എന്നാൽ, യാത്രാവേളയിൽ ശക്തമായ കൊടുങ്കാറ്റിൽപ്പെട്ടതോടെ ബോട്ടിന്റെ നിയന്ത്രണം നഷ്ടപ്പെടുകയും കടലിൽ അകപ്പെടുകയുമായിരുന്നു.

ജൂലൈ 30-ന് റുവോ ദ്വീപിൽ തിരിച്ചെത്തേണ്ട ബോട്ട് കാണാതായതിനെത്തുടർന്ന് ഗുവാമിലെ യുഎസ് കോസ്റ്റ് ഗാർഡ് തിരച്ചിൽ ഊർജിതമാക്കി.

ഒൻപതുപേരുമായി യാത്ര ചെയ്ത ബോട്ടിനായി 85,700 ചതുരശ്ര കിലോമീറ്റർ വിസ്തൃതിയിൽ പത്തുദിവസം തിരച്ചിൽ നടത്തിയെങ്കിലും ആദ്യഘട്ടത്തിൽ കണ്ടെത്താനായില്ല. ആകെ ഒൻപതുപേരിൽ അഞ്ചുപേരെയാണ് ഇതുവരെ രക്ഷപ്പെടുത്താൻ സാധിച്ചത്.

ബാക്കിയുള്ള നാലുപേരെക്കുറിച്ച് ഇപ്പോഴും യാതൊരു വിവരവും ലഭ്യമായിട്ടില്ല. കടലിൽ മാസങ്ങളോളം അകപ്പെട്ടുപോയിട്ടും ജീവൻ നിലനിർത്തിയ ഈ സംഭവം അതിജീവനത്തിന്റെ അസാധാരണമായ അധ്യായമാണ്.

എന്നാൽ, പസഫിക് സമുദ്രത്തിൽ മാസങ്ങളോളം കുടുങ്ങി അത്ഭുതകരമായി ജീവിതത്തിലേക്ക് തിരിച്ചെത്തിയ മറ്റ് ചില വ്യക്തികളുടെ അവിശ്വസനീയമായ അനുഭവങ്ങളും ഇതിനോടൊപ്പം ചർച്ച ചെയ്യപ്പെടുന്നുണ്ട്. ജോസ് സാൽവദോർ അൽവരേംഗ: കടലിൽ 13 മാസം 2014 ജനുവരിയിൽ മാർഷൽ ദ്വീപുകളിൽനിന്ന് രക്ഷപ്പെടുത്തിയതോടെയാണ് ജോസ് സാൽവദോർ അൽവരേംഗ ലോകശ്രദ്ധ നേടിയത്.

പസഫിക് സമുദ്രത്തിൽ ഒരു വർഷത്തിലേറെ ഒഴുകിനടന്നാണ് അദ്ദേഹം ജീവിതത്തിലേക്ക് തിരികെയെത്തിയത്. ഏകദേശം 13 മാസത്തോളം കടലിൽ കഴിഞ്ഞ അൽവരേംഗ 8,000 കിലോമീറ്ററോളം ദൂരം ഒരു ചെറിയ ഫൈബർഗ്ലാസ് ഫിഷിം​ഗ് ബോട്ടിലാണ് പിന്നിട്ടത്.

2012 ഡിസംബറിൽ മെക്സിക്കോയിൽനിന്ന് മത്സ്യബന്ധനത്തിനായി പുറപ്പെട്ടപ്പോഴാണ് അദ്ദേഹത്തിന്റെ ദുരിതയാത്ര ആരംഭിക്കുന്നത്. യാത്രയ്ക്കിടെ ശക്തമായ കൊടുങ്കാറ്റിൽപ്പെട്ട

ബോട്ടിന്റെ ദിശ തെറ്റുകയായിരുന്നു. മഴവെള്ളവും സ്വന്തം മൂത്രവും പക്ഷികളുടെ രക്തവും കുടിച്ചാണ് ജീവൻ നിലനിർത്തിയതെന്നാണ് അൽവരേംഗ പിന്നീട് വെളിപ്പെടുത്തിയത്.

അദ്ദേഹത്തോടൊപ്പം ബോട്ടിലുണ്ടായിരുന്ന സഹമത്സ്യത്തൊഴിലാളി എസെക്വിയേൽ കോർഡോബ അതിജീവനത്തിനായുള്ള പോരാട്ടത്തിനിടയിൽ മരണമടഞ്ഞു. മൂന്ന് മെക്സിക്കൻ മത്സ്യത്തൊഴിലാളികൾ: കടലിൽ ഒൻപത് മാസം 2006 ഓഗസ്റ്റിൽ ഏകദേശം ഒൻപത് മാസത്തോളം പസഫിക് സമുദ്രത്തിൽ ഒഴുകിനടന്ന മൂന്ന് മെക്സിക്കൻ മത്സ്യത്തൊഴിലാളികളെ സുരക്ഷിതമായി രക്ഷപ്പെടുത്തി.

ജീസസ് എഡ്വാർഡോ വിദാന, ലൂസിയോ റെൻഡൺ, സാൽവദോർ ഓർഡോണസ് എന്നിവരായിരുന്നു ആ സംഘത്തിൽ ഉണ്ടായിരുന്നത്. 2005 ഒക്ടോബറിൽ മെക്സിക്കോയിലെ സാൻ ബ്ലാസ് തുറമുഖത്തുനിന്ന് മത്സ്യബന്ധനത്തിനായി പുറപ്പെട്ടവരാണ് ഇവർ.

എന്നാൽ, ശക്തമായ കാറ്റിൽപ്പെട്ട ബോട്ട് കരയിൽനിന്ന് ഏറെ അകലേക്ക് ഒഴുകിപ്പോകുകയായിരുന്നു.

ഇന്ധനം പൂർണ്ണമായും തീർന്നതോടെ കടലിൽ യാതൊരു നിയന്ത്രണവുമില്ലാതെ ഒഴുകിനടക്കുകയല്ലാതെ മറ്റു മാർഗങ്ങളില്ലാതായി. പച്ചമത്സ്യവും പക്ഷികളെയും ഭക്ഷിച്ചും മഴവെള്ളം കുടിച്ചുമാണ് മൂവരും ജീവൻ നിലനിർത്തിയത്.

ഒടുവിൽ 2006 ഓഗസ്റ്റ് 9-ന് ദക്ഷിണ പസഫിക് സമുദ്രത്തിൽവെച്ച് തായ്‌വാനിൽനിന്നുള്ള ഒരു മത്സ്യബന്ധന കപ്പൽ ഇവരെ കണ്ടെത്തി രക്ഷപ്പെടുത്തുകയായിരുന്നു. ലപാഹെലെ സോപ്പിയും ടെലിയ പായും: കടലിൽ നാല് മാസം സമോവ സ്വദേശികളായ ലപാഹെലെ സോപ്പിയും ടെലിയ പായും ചെറിയ ലോഹബോട്ടിൽ നാലുമാസത്തോളം കടലിൽ ഒഴുകിനടന്നാണ് അതിജീവനം സാധ്യമാക്കിയത്.

2001-ലായിരുന്നു ഇവരെ പാപ്പുവ ന്യൂ ഗിനിയയിൽനിന്ന് രക്ഷപ്പെടുത്തിയത്. സ്വന്തം രാജ്യമായ സമോവയിൽനിന്ന് ഏകദേശം 4,000 കിലോമീറ്റർ അകലെയാണ് ഇവർ എത്തിപ്പെട്ടത്.

കടലിൽനിന്ന് മീൻ പിടിച്ചും മഴവെള്ളം ശേഖരിച്ചും ഇരുവരും ജീവൻ കാത്തുസൂക്ഷിച്ചു. ഒടുവിൽ പാപ്പുവ ന്യൂ ഗിനിയയിലെ മിൽനെ ബേയിലെ ഒരു ഗ്രാമവാസി ഇവരെ കണ്ടെത്തുകയായിരുന്നു.

തങ്ങളുടെ കൈവശമുണ്ടായിരുന്ന അവസാനത്തെ ഫ്ലെയർ ഉപയോഗിച്ച് സഹായം തേടിയതോടെയാണ് രക്ഷാപ്രവർത്തനത്തിന് വഴിയൊരുങ്ങിയത്. തുടർന്ന് ഗ്രാമവാസി തോണിയുമായി എത്തി ഇരുവരെയും സുരക്ഷിതമായി കരയിലെത്തിച്ചു.

മൗറീസും മർലിൻ ബെയ്‌ലിയും: പസഫിക് സമുദ്രത്തിൽ 117 ദിവസം 1973-ൽ ബ്രിട്ടീഷ് ദമ്പതികളായ മൗറീസും മർലിൻ ബെയ്‌ലിയും 117 ദിവസങ്ങളാണ് (ഏകദേശം 4 മാസം) പസഫിക് സമുദ്രത്തിൽ അതിജീവിച്ചത്. ഗ്വാട്ടിമാലയുടെ തീരത്തുവെച്ച് ഇവരുടെ ബോട്ടിൽ ഒരു തിമിംഗലം ഇടിച്ചതിനെത്തുടർന്നാണ് അപകടമുണ്ടായത്.

ബോട്ട് പൂർണ്ണമായും മറിഞ്ഞതോടെ ഇരുവരും റബ്ബർ കൊണ്ടുള്ള ചെറുവള്ളത്തിൽ അഭയം തേടുകയായിരുന്നു. പിന്നീട് ഏകദേശം നാലുമാസത്തോളം കടലിൽ ഒഴുകിനടന്ന ഇവരെ ഒടുവിൽ അധികൃതർ രക്ഷപ്പെടുത്തി.

അതിജീവനത്തിന്റെ മറ്റു ശ്രദ്ധേയ കഥകൾ ഗിന്നസ് വേൾഡ് റെക്കോർഡ്സിന്റെ കണക്കുകൾ പ്രകാരം, ജാപ്പനീസ് കപ്പിത്താൻ ഒഗുരി ജുക്കിച്ചിയും അദ്ദേഹത്തിന്റെ ഒരു നാവികനും 1813-നും 1815-നും ഇടയിൽ ഏകദേശം 484 ദിവസം കടലിൽ അതിജീവിച്ചിട്ടുണ്ട്. കടലിലെ അതിജീവനചരിത്രത്തിലെ ഏറ്റവും ദൈർഘ്യമേറിയ സംഭവങ്ങളിലൊന്നാണിത്.

1982-ൽ അമേരിക്കൻ നാവികയായ ഡെബോറ കീലിയും മറ്റൊരു ജീവനക്കാരനും കൊടുങ്കാറ്റിൽപ്പെട്ട ബോട്ടിൽനിന്ന് രക്ഷപ്പെട്ട് ലൈഫ് റാഫ്റ്റിൽ അഞ്ച് ദിവസം കടലിൽ കഴിച്ചുകൂട്ടി.

അമേരിക്കൻ തീരത്തുനിന്ന് അകലെയായിരുന്നു ഈ അപകടം. ഇവരുടെ ഭീതിജനകമായ അതിജീവനാനുഭവം പിന്നീട് പുറത്തിറങ്ങിയ Two Came Back എന്ന സിനിമയ്ക്ക് പ്രചോദനമായി മാറി.

1982-ൽ അമേരിക്കൻ സാഹസിക സഞ്ചാരിയായ സ്റ്റീവൻ കാലഹാൻ അറ്റ്ലാന്റിക് സമുദ്രത്തിൽ വീർപ്പിക്കാവുന്ന ലൈഫ് റാഫ്റ്റിൽ 76 ദിവസം ഒറ്റയ്ക്ക് കഴിഞ്ഞ് അത്ഭുതകരമായി അതിജീവിച്ചു. ഒരു തിമിംഗലം കപ്പലിൽ ഇടിച്ചതിനെത്തുടർന്ന് അത് മുങ്ങിയതോടെയാണ് അദ്ദേഹത്തിന്റെ ദുരിതയാത്ര ആരംഭിച്ചത്.

കടലിൽനിന്ന് മീൻ പിടിച്ചും മഴവെള്ളം ശേഖരിച്ചുമാണ് അദ്ദേഹം ആ ദിവസങ്ങൾ പിന്നിട്ടത്.