തിരുവനന്തപുരത്ത് കെഎസ്ആർടിസി ബസിൽ വച്ച് യുവതിക്ക് നേരെ ലൈംഗികാതിക്രമം നടത്തിയ കേസിലെ ഒളിവിലായിരുന്ന പ്രതി ഒടുവിൽ നിയമത്തിന് മുന്നിൽ. സംഭവത്തിന് ശേഷം നീണ്ട
11 മാസങ്ങൾക്ക് ശേഷമാണ് പ്രതി ചെന്നൈയിൽ നിന്നും പൊലീസിന്റെ പിടിയിലാകുന്നത്. കന്യാകുമാരി സ്വദേശിയായ മഷുക് മുഹമ്മദ് അലിയാണ് വിളപ്പിൽശാല പൊലീസ് സംഘത്തിന്റെ പിടിയിലായത്.
കഴിഞ്ഞ വർഷം ഒക്ടോബർ അഞ്ചിനാണ് കേസിന് ആസ്പദമായ വിവാദ സംഭവം അരങ്ങേറിയത്. തിരുവനന്തപുരത്തു നിന്ന് വെള്ളറടയിലേക്ക് സർവീസ് നടത്തുകയായിരുന്ന കെഎസ്ആർടിസി ബസിൽ പേയാടിനടുത്ത് വെച്ചാണ് യുവതിക്ക് നേരെ അതിക്രമം ഉണ്ടായത്.
തനിക്ക് നേരിടേണ്ടി വന്ന അപമാനകരമായ ദുരനുഭവം യുവതി തന്റെ മൊബൈൽ ഫോണിൽ പകർത്തിയെടുക്കുകയും ഇത് പിന്നീട് സാമൂഹ്യ മാധ്യമങ്ങളിൽ പങ്കുവെക്കുകയുമായിരുന്നു. ഈ ദൃശ്യങ്ങൾ സമൂഹമാധ്യമങ്ങളിൽ അതിവേഗം പ്രചരിച്ചതോടെ സംഭവം വലിയ ജനരോഷത്തിനും വിവാദത്തിനും വഴിയൊരുക്കി.
തുടർന്ന് യുവതി നൽകിയ ഔദ്യോഗിക മൊഴിയുടെയും സമൂഹമാധ്യമങ്ങളിൽ പ്രചരിച്ച ദൃശ്യങ്ങളുടെയും അടിസ്ഥാനത്തിൽ വിളപ്പിൽശാല പൊലീസ് കേസെടുത്ത് അന്വേഷണം ആരംഭിച്ചു. എങ്കിലും, യുവതി ചിത്രീകരിച്ച ദൃശ്യങ്ങളിൽ നിന്ന് പ്രതിയുടെ മുഖം വ്യക്തമായി തിരിച്ചറിയാൻ അന്വേഷണ സംഘത്തിന് സാധിച്ചിരുന്നില്ല.
തുടർന്ന് പൊലീസ് അത്യാധുനിക സാങ്കേതിക സംവിധാനങ്ങളുടെ സഹായത്തോടെ നടത്തിയ നീക്കത്തിലാണ് പ്രതി കന്യാകുമാരി സ്വദേശിയായ മഷൂക്കാണെന്ന് ഉറപ്പുവരുത്തിയത്. ഇയാളെ കണ്ടെത്താൻ പൊലീസ് ലുക്കൌട്ട് നോട്ടീസ് പുറപ്പെടുവിച്ചെങ്കിലും മാസങ്ങളോളം ഒളിവിൽ കഴിയുകയായിരുന്നു.
തുടർന്ന് നടത്തിയ രഹസ്യ അന്വേഷണത്തിനൊടുവിൽ പ്രതി ചെന്നൈയിൽ ഒളിവിലുണ്ടെന്ന കൃത്യമായ വിവരം പൊലീസിന് ലഭിക്കുകയായിരുന്നു. ഈ രഹസ്യ വിവരത്തിന്റെ അടിസ്ഥാനത്തിൽ ഉടൻ തന്നെ ചെന്നൈയിലേക്ക് പുറപ്പെട്ട
പൊലീസ് സംഘം പ്രതിയായ മഷൂക്കിനെ കസ്റ്റഡിയിലെടുക്കുകയായിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
