കിഫ്ബിക്കെതിരായ നീക്കം വികസനം തകർക്കാനെന്ന് എം.വി ഗോവിന്ദൻ; ആരോഗ്യ വകുപ്പിനെതിരെയും രൂക്ഷ വിമർശനം

സംസ്ഥാനത്തിന്റെ വികസന മുന്നേറ്റങ്ങളെ തടസ്സപ്പെടുത്തുന്നതിന്റെ ഭാഗമായാണ് കിഫ്ബിക്കെതിരെയുള്ള നടപടികൾ എന്ന് സിപിഐഎം സംസ്ഥാന സെക്രട്ടറി എം.വി ഗോവിന്ദൻ വ്യക്തമാക്കി. തിരുവനന്തപുരത്ത് മാധ്യമങ്ങളോട് സംസാരിക്കവെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.

കിഫ്ബിയെ തകർത്ത് കേരള വികസനത്തെ ദുർബലപ്പെടുത്താനാണ് കേന്ദ്ര ഏജൻസികൾ ശ്രമിച്ചത് ,അതിനെ അതിജീവിച്ചാണ് സർക്കാർ മുന്നോട്ട് പോയത് എന്ന് അദ്ദേഹം കൂട്ടിച്ചേർത്തു. കേന്ദ്രസർക്കാരിൻ്റെ താത്പര്യമാണ് ഇപ്പോൾ UDF സർക്കാർ നിർവഹിക്കുന്നതെന്നും കിഫ്ബിയുടെ ബാധ്യത സംബന്ധിച്ച വിദഗ്ധ സമിതി റിപ്പോർട്ടിലെ പരാമർശം ഒരു പരിശോധനയുമില്ലാതെയാണെന്നും എം.വി ഗോവിന്ദൻ വാർത്താസമ്മേളനത്തിൽ പ്രതികരിച്ചു.

കിഫ്ബി വഴി പ്രഖ്യാപിച്ച പല പ്രധാന പദ്ധതികളും ഇല്ലാതാകാൻ പോകുന്നു. ഭൂമി എറ്റെടുത്തത് കിഫ്ബിയുടെ നയ പ്രകാരമല്ല.2013-ലെ ഭൂമി ഏറ്റെടുക്കൽ നിയമപ്രകാരം മാത്രമാണ് ഭൂമി ഏറ്റെടുത്തിട്ടുള്ളതെന്നും അദ്ദേഹം പറഞ്ഞു.

കണ്ണൂരിലെ ഭൂമി ഏറ്റെടുക്കലിനെ മുഖ്യമന്ത്രി ഉൾപ്പെടെ ദുരുദ്ദേശത്തോടെ പരാമർശിച്ചു എന്നും അദ്ദേഹം കുറ്റപ്പെടുത്തി. ആരോഗ്യ മേഖലയുമായി ബന്ധപ്പെട്ട

വിഷയങ്ങളിലും അദ്ദേഹം കടുത്ത വിമർശനങ്ങൾ ഉന്നയിച്ചു. ജനകീയമായ ആരോഗ്യ മേഖലയെ തകർക്കാൻ യുഡിഎഫ് സർക്കാർ ശ്രമിക്കുന്നു.

മരുന്ന് ക്ഷാമം ആശുപത്രിയിൽ രൂക്ഷമാണ്. ഡോക്ടർമാരെ തലങ്ങും വിലങ്ങും സ്ഥലം മാറ്റുന്നു.

എല്ലാം സ്വകാര്യവൽക്കരിക്കുക എന്ന അജണ്ട ആരോഗ്യ മേഖലയിൽ നടപ്പിലാക്കാനാണ് ശ്രമം.

എല്ലാം സ്വകാര്യവൽക്കരിക്കുമെന്ന അജണ്ടയാണ് സർക്കാരിനുള്ളത് എം.വി ഗോവിന്ദൻ വ്യക്തമാക്കി. എസ്എംഎ മരുന്ന് വിവാദത്തിൽ ആരോ​ഗ്യമന്ത്രി കെ മുരളീധരന് വ്യക്തമായ ഉത്തരമില്ലെന്ന് അദ്ദേഹം കുറ്റപ്പെടുത്തി.

ആരോഗ്യ മേഖലയെ സ്വകാര്യ മേഖലക്ക് നൽകാനുള്ള നീക്കമാണ് നടക്കുന്നത്. യു പി ചീഫ് സെക്രട്ടറിയെ എന്തിനാണ് ടാക്സ് ഫോഴ്‌സിൽ ഉൾപ്പെടുത്തിയത്? എസ്എംഎ മരുന്നുമായി ബന്ധപ്പെട്ട് രക്ഷിതാക്കളുടെ ആശങ്ക പരിഹരിക്കണം.

കെ മുരളീധരൻ മുൻ ആരോഗ്യ മന്ത്രിമാരെ വ്യക്തിപരമായി അധിക്ഷേപിച്ചു. മറുപടി ഇല്ലാത്തതിനാലാണ് അവരെ ചീത്ത പറഞ്ഞത്.

ഉപയോഗിച്ച പദം ഞാനിവിടെ പറയുന്നില്ല. വൃത്തികെട്ട

രീതിയിലാണ് ആരോഗ്യമന്ത്രി നിലപാടെടുത്തതെന്നും അദ്ദേഹം വ്യക്തമാക്കി. മന്ത്രിയോട് പ്രധാനപ്പെട്ട

ചില ചോദ്യങ്ങളും അദ്ദേഹം ഉന്നയിച്ചു. ക്ലിനിക്കൽ ടെസ്റ്റിന് ഉള്ള മരുന്നുകൾ എങ്ങനെ ആശുപത്രിയിലെത്തി? കുഴപ്പമില്ലെങ്കിൽ എന്തിനാണ് മരുന്ന് പിൻവലിച്ചത്? ഈ മരുന്നിന്റെ ക്ലിനിക്കിൽ പരിശോധന പൂർത്തിയായിട്ടുണ്ടോ? രക്ഷിതാക്കൾക്ക് മുന്നറിയിപ്പ് നൽകിയിരുന്നു.

മെഡിക്കൽ സർവീസ് കോർപ്പറേഷൻ ഗുണപരിശോധന നടത്തിയിട്ടുണ്ടോ? ടെൻഡർ വിളിക്കാൻ കാലതാമസം വന്നത് എന്തിന്, ഒരു കമ്പനിക്ക് വേണ്ടി മാത്രം പ്രത്യേക ഇളവ് നൽകിയത് എന്തിന്? കുട്ടികൾക്ക് പാർശ്വഫലം സംഭവിച്ചാൽ ആര് ഉത്തരവാദിത്വം ഏറ്റെടുക്കും എന്നിങ്ങനെ നിരവധി ചോദ്യങ്ങളാണ് എം.വി ഗോവിന്ദൻ ഉന്നയിച്ചത്.