ഫിറ്റ്‌നസ് സർട്ടിഫിക്കറ്റ് ഇല്ല; സ്‌കൂൾ കുട്ടികളുമായി സർവീസ് നടത്തിയ വാൻ മോട്ടോർ വാഹന വകുപ്പ് പിടികൂടി

കൊച്ചി: പെർമിറ്റിന്‍റേയും ഫിറ്റ്നസ് സർട്ടിഫിക്കറ്റിന്‍റേയും കാലാവധി അവസാനിച്ചിട്ടും വിദ്യാർത്ഥികളുമായി സർവീസ് നടത്തിവന്ന മഹീന്ദ്ര വാഹനം മോട്ടോർ വാഹന വകുപ്പ് കസ്റ്റഡിയിലെടുത്തു. പൊന്നുരുന്നി സികെസിഎൽപി സ്കൂളിലെ കുട്ടികളുമായി സഞ്ചരിക്കുകയായിരുന്ന വാഹനമാണ് എറണാകുളം എൻഫോഴ്സ്മെന്‍റ് വിഭാഗം പിടികൂടിയത്.

തിങ്കളാഴ്ച പൊന്നുരുന്നി പ്രദേശത്ത് പതിവ് പരിശോധന നടത്തുന്നതിനിടയിലാണ് ഉദ്യോഗസ്ഥരുടെ ശ്രദ്ധയിൽ ഈ വാഹനം പെട്ടത്. വാഹനത്തിന്‍റെ വിവരങ്ങളിൽ സംശയം തോന്നിയതിനെ തുടർന്ന് ‘വാഹൻ’ ഡാറ്റാബേസ് പരിശോധിച്ചപ്പോൾ പെർമിറ്റും ഫിറ്റ്നസ് സർട്ടിഫിക്കറ്റും കാലാവധി കഴിഞ്ഞിട്ടുള്ളതാണെന്ന് വ്യക്തമായി.

തുടർന്ന് പരിശോധനയിൽ നിന്നും ഉദ്യോഗസ്ഥരിൽ നിന്നും രക്ഷപ്പെടാനായി ഡ്രൈവർ വാഹനം വേഗത്തിൽ ഓടിച്ചുപോകാൻ ശ്രമിച്ചു. എന്നാൽ ഉദ്യോഗസ്ഥർ ഉടൻ തന്നെ പിന്തുടർന്ന് വാഹനം തടഞ്ഞുനിർത്തുകയായിരുന്നു.

ഇതിനിടയിൽ പിടിയിലാകാതിരിക്കാൻ രണ്ട് കുട്ടികളെ വഴിയിൽ ഇറക്കിവിട്ടാണ് ഡ്രൈവർ കടന്നുകളയാൻ ശ്രമിച്ചതെന്ന് വാഹനത്തിലുണ്ടായിരുന്ന മറ്റു വിദ്യാർത്ഥികൾ ഉദ്യോഗസ്ഥർക്ക് മൊഴി നൽകി. ഉടൻതന്നെ വാഹനത്തിന്‍റെ സർവീസ് പൂർണ്ണമായി നിർത്തിവെപ്പിച്ച മോട്ടോർ വാഹന വകുപ്പ്, ഡ്രൈവർക്കും വാഹന ഉടമയ്ക്കുമെതിരെ കർശന നിയമനടപടികൾ സ്വീകരിക്കുകയും ഔദ്യോഗികമായി കേസ് രജിസ്റ്റർ ചെയ്യുകയും ചെയ്തു.

കൂടാതെ, വാഹനത്തിലുണ്ടായിരുന്ന മുഴുവൻ കുട്ടികളെയും യാതൊരു ബുദ്ധിമുട്ടുകളുമില്ലാതെ സുരക്ഷിതമായി വീടുകളിലെത്തിക്കുന്നതിനായി ഉദ്യോഗസ്ഥർ തന്നെ മറ്റൊരു വാഹനം ഏർപ്പാടാക്കി നൽകുകയും ചെയ്തു. എറണാകുളം എൻഫോഴ്സ്മെന്‍റ് ആർടിഒ ബിജു ഐസക്കിന്‍റെ കർശന നിർദേശത്തിന്‍റെ അടിസ്ഥാനത്തിൽ, അസിസ്റ്റന്‍റ് മോട്ടോർ വെഹിക്കിൾ ഇൻസ്പെക്ടർമാരായ വിഷ്ണു പ്രസാദ് എൻ ബി, എൽദോസ് തങ്കച്ചൻ എന്നിവരുടെ നേതൃത്വത്തിലുള്ള സംഘമാണ് ഈ പരിശോധന നടത്തിയത്.

സ്കൂൾ വാഹനങ്ങളുടെ സുരക്ഷയും നിയമപാലനവും കർശനമായി ഉറപ്പുവരുത്തുന്നതിനായി വരും ദിവസങ്ങളിലും പരിശോധനകൾ ശക്തമായി തുടരുമെന്ന് മോട്ടോർ വാഹന വകുപ്പ് അധികൃതർ അറിയിച്ചു.