ലോക കത്തെഴുത്ത് ദിനത്തിൽ മുഖ്യമന്ത്രിക്ക് കത്തെഴുതി ഉദയഗിരി സ്കൂളിലെ കുട്ടികൾ; സ്നേഹോഷ്മള മറുപടിയുമായി വി.ഡി.സതീശൻ

ലോക കത്തെഴുത്ത് ദിനത്തിന്റെ ഭാഗമായി മുഖ്യമന്ത്രിക്ക് കത്തയച്ച ഉദയഗിരി പ്രത്യാശ യുപി സ്കൂൾ വിദ്യാർത്ഥികൾക്ക് സ്നേഹം തുളുമ്പുന്ന മറുപടി ലഭിച്ചു. തങ്ങളുടെ പ്രിയപ്പെട്ട

നേതാവിന്റെ ചിരിയെയും വിശേഷങ്ങളെയും കുറിച്ച് വാചാലരായ കുട്ടികൾക്ക് മുഖ്യമന്ത്രി നേരിട്ടാണ് മറുപടി നൽകിയത്. സ്കൂളിലെ കുട്ടികളുടെ പ്രധാന ആവശ്യമായ സ്മാർട്ട് ക്ലാസ് മുറികൾ യാഥാർത്ഥ്യമാക്കുന്നത് സംബന്ധിച്ച് സജീവ് ജോസഫ് എംഎൽഎയുമായി ചർച്ച നടത്തിയിട്ടുണ്ടെന്നും, നേരിട്ടെത്തി ആവശ്യങ്ങൾ പരിഗണിക്കുമെന്നും മുഖ്യമന്ത്രി കത്തിലൂടെ ഉറപ്പ് നൽകി.

മന്ത്രി റോജി എം.ജോൺ ഈ വിദ്യാലയത്തിലെ പൂർവ വിദ്യാർഥിയാണെന്ന കാര്യം കുട്ടികൾ കത്തിൽ പ്രത്യേകം സൂചിപ്പിച്ചിരുന്നു. സ്വന്തം സ്കൂളിൽ പഠിച്ചയാൾ മന്ത്രിസഭയിലെ അംഗമായതിൽ വിദ്യാർത്ഥികൾക്കുള്ള അഭിമാനം പൂർണ്ണമായും മനസ്സിലാക്കുന്നുവെന്ന് മുഖ്യമന്ത്രി തന്റെ കത്തിൽ വ്യക്തമാക്കുകയും ചെയ്തു.

മുഖ്യമന്ത്രിയുടെ കത്ത് ലഭിച്ചതിലുള്ള അതിയായ സന്തോഷം സ്കൂൾ പ്രധാനാധ്യാപിക സാലി.കെ മാധ്യമങ്ങളോട് പങ്കുവെച്ചു. “ലോക കത്തെഴുത്ത് ദിനത്തോടനുബന്ധിച്ച് മുഖ്യമന്ത്രിക്ക് കത്തയയ്ക്കുമ്പോൾ അതിന് ഇങ്ങനെ ഒരു മറുപടി ലഭിക്കുമെന്ന് പ്രതീക്ഷിച്ചിരുന്നില്ല.

മറുപടി ലഭിച്ചതിൽ വലിയ സന്തോഷം. കുട്ടികളും വളരെ സന്തോഷത്തിലാണ്.

നേരിൽ കാണാം എന്ന് അദ്ദേഹം കത്തിൽ എഴുതിയിട്ടുണ്ട്. അതിനുവേണ്ടി കാത്തിരിക്കുകയാണ്.

അദ്ദേഹത്തിന്റെ സന്ദർശനം കുട്ടികൾക്ക് വലിയ ആവേശം നൽകും”, പ്രധാനാധ്യാപിക പറഞ്ഞു. മുഖ്യമന്ത്രി അയച്ച കത്തിന്റെ പൂർണരൂപം: പ്രിയപ്പെട്ട

കുഞ്ഞുങ്ങളെ, ലോക കത്തെഴുത്ത് ദിനത്തിൽ നിങ്ങൾ എല്ലാവരും ചേർന്ന് അയച്ച മനോഹരമായ കത്ത് ലഭിച്ചു. മനോഹരമായ കൈയ്യക്ഷരത്തിൽ, നിറയെ സ്നേഹവും നിഷ്കളങ്കമായ വാക്കുകളും നിറച്ച ആ കത്ത് വായിച്ചപ്പോൾ വലിയ സന്തോഷം തോന്നി.

ഒരു കത്ത് വായിക്കുകയായിരുന്നില്ല; പ്രിയപ്പെട്ട കുറെ കുട്ടികൾ നേരിട്ട് സംസാരിക്കുന്നതുപോലെയാണ് എനിക്ക് അനുഭവപ്പെട്ടത്.

‘മുഖ്യമന്ത്രിയെ ഒത്തിരി ഇഷ്ടമാണ്’ എന്നും ‘സാറിന്റെ ചിരി കാണാൻ നല്ല രസമാണ്’ എന്നും നിങ്ങൾ എഴുതിയിരിക്കുന്നത് വായിച്ചപ്പോൾ അറിയാതെ എന്റെ മുഖത്തും ഒരു ചിരി വിടർന്നു. മുഖ്യമന്ത്രിയെന്ന നിലയിൽ ഒരുപാട് ഉത്തരവാദിത്വങ്ങൾക്കിടയിലും കുട്ടികളുടെ ഈ സ്നേഹവും വാക്കുകളും വലിയ സന്തോഷം നൽകുന്നതാണ്.

‘ഭക്ഷണം ഒക്കെ സമയത്തിന് കഴിക്കണേ’ എന്ന് നിങ്ങൾ നൽകിയ സ്നേഹോപദേശം ഞാൻ പ്രത്യേകം ഓർത്തുവച്ചു. മുഖ്യമന്ത്രിയെക്കുറിച്ച് ഇത്രയും കരുതലോടെ ചിന്തിക്കുന്ന കുട്ടികളുള്ളപ്പോൾ സമയത്തിന് ഭക്ഷണം കഴിക്കാതിരിക്കാൻ എങ്ങനെ കഴിയും? റോജി എം.

ജോൺ പ്രത്യാശ സ്കൂളിലെ പൂർവവിദ്യാർഥിയാണെന്ന് അദ്ദേഹം തന്നെ സ്കൂളിൽ വന്നപ്പോൾ പറഞ്ഞിരുന്ന കാര്യവും നിങ്ങൾ ഓർമിപ്പിച്ചിട്ടുണ്ട്. സ്വന്തം സ്കൂളിലെ പൂർവവിദ്യാർഥി മന്ത്രിസഭയിലെ അംഗമായതിൽ നിങ്ങൾക്കുള്ള അഭിമാനം എനിക്ക് മനസ്സിലാക്കാം.

നിങ്ങൾക്കും നിങ്ങളുടെ സ്കൂളിനും അഭിമാനിക്കാവുന്ന തരത്തിൽ ഉയരങ്ങളിലെത്താൻ ഓരോരുത്തർക്കും കഴിയട്ടെ. നിങ്ങളുടെ കത്തിലെ ഒരു പ്രധാന ആവശ്യം സ്മാർട്ട് ക്ലാസ് മുറികളുടേതാണ്.

നഗരത്തിലെ സ്കൂളുകളിലെ കുട്ടികൾക്ക് ലഭിക്കുന്ന ആധുനിക പഠനസൗകര്യങ്ങൾ നിങ്ങളുടെയും പഠനത്തിന് ലഭിക്കണമെന്ന നിങ്ങളുടെ ആഗ്രഹം വളരെ ന്യായമാണ്. നിങ്ങളുടെ ഈ ആവശ്യം ഗൗരവത്തോടെ കാണുന്നു.

ഇതു സംബന്ധിച്ച് ഇരിക്കൂർ എംഎൽഎ സജീവ് ജോസഫുമായി ഞാൻ സംസാരിച്ചിട്ടുണ്ട്. സ്കൂൾ സന്ദർശിച്ച് നിങ്ങളെ നേരിൽ കാണുകയും സ്മാർട്ട് ക്ലാസ് മുറികൾ ഉൾപ്പെടെയുള്ള നിങ്ങളുടെ ആഗ്രഹങ്ങൾ സാധിച്ചു നൽകുന്നതിന് ആവശ്യമായ ഉചിതമായ നടപടികൾ സ്വീകരിക്കുകയും ചെയ്യുമെന്ന് അദ്ദേഹം അറിയിച്ചിട്ടുണ്ട്.

നിങ്ങളുടെ മുഖത്തെ ആ സന്തോഷം നേരിൽ കാണാൻ കഴിയുമെന്ന പ്രതീക്ഷ എനിക്കുമുണ്ട്. ലോക കത്തെഴുത്ത് ദിനത്തിൽ എനിക്ക് എഴുതിയ നിങ്ങളുടെ കത്ത് ഞാൻ സൂക്ഷിച്ചുവച്ചു.

നിങ്ങളുടെ മനോഹരമായ കൈയ്യക്ഷരവും സ്നേഹം നിറഞ്ഞ വാക്കുകളും എനിക്ക് എന്നും സന്തോഷം നൽകുന്ന ഓർമയായിരിക്കും.