പാർട്ടിയിൽ ഈഗോ വച്ചുപുലർത്തുന്ന സെക്രട്ടറിയാകില്ല: വി. ചെന്താമരാക്ഷൻ

പാലക്കാട്: പാർട്ടിയെന്ന വലിയ കുടുംബത്തിൽ ഒരിക്കലും ‘ഈഗോ’ ഉള്ള സെക്രട്ടറിയായി പ്രവർത്തിക്കില്ലെന്ന് സിപിഎം ജില്ലാ സെക്രട്ടറി വി. ചെന്താമരാക്ഷൻ വ്യക്തമാക്കി.

വിശാല ജില്ലാ കമ്മിറ്റിയുടെ തിരുത്തൽനടപടികളുടെ ഭാഗമായാണ് അദ്ദേഹം ഈ പദവി ഏറ്റെടുത്തത്. സമൂഹത്തിലെ നാനാതുറകളിലുള്ള ജനങ്ങളെയാകെ അണിനിരത്തിക്കൊണ്ടുള്ള വിശാലമായ സംഘടനാ പ്രവർത്തനമാണ് ലക്ഷ്യമിടുന്നതെന്നും അദ്ദേഹം വ്യക്തമാക്കി.

പാർട്ടിയിൽ നിലവിൽ വിഭാഗീയതയൊന്നുമില്ലെന്നും, സംഘടനാപരമായ അഭിപ്രായവ്യത്യാസങ്ങൾ ചർച്ചകളിലൂടെ പരിഹരിക്കുമെന്നും അദ്ദേഹം പറഞ്ഞു. ശരീരത്തിലെ രക്തപ്രവാഹം പോലെ പാർട്ടിപ്രവർത്തനം സജീവമായി നടക്കുന്ന ഒരിടത്തും സിപിഎം പരാജയപ്പെട്ടിട്ടില്ലെന്നും അദ്ദേഹം ഓർമ്മിപ്പിച്ചു.

ഈയിടെ പല നേതാക്കളും പാർട്ടിയുമായി ബന്ധം വേർപെടുത്തിയത് ചിലരുടെ ഈഗോ മൂലമാണെന്ന ആക്ഷേപത്തെക്കുറിച്ച് ചോദിച്ചപ്പോൾ, പാർട്ടിയിൽ ഈഗോയ്ക്ക് സ്ഥാനമില്ലെന്നും എന്നാൽ ചില ഘട്ടങ്ങളിൽ കടുത്ത സംഘടനാപരമായ നിലപാടുകൾ സ്വീകരിക്കേണ്ടി വന്നിട്ടുണ്ടെന്നുമാണ് അദ്ദേഹം മറുപടി നൽകിയത്. പി.കെ.

ശശിയും മലമ്പുഴയിലെ എ. സുരേഷും സീറ്റ് ഉറപ്പിച്ചുകൊണ്ട് മറുഭാഗത്തേക്ക് കൂറുമാറാൻ വേണ്ടി മാത്രം പുറത്തുപോയവരാണ്.

പി.കെ. ശശിക്കെതിരെ നേരത്തെത്തന്നെ അച്ചടക്ക നടപടി സ്വീകരിക്കേണ്ടിയിരുന്നുവെന്നാണ് പ്രവർത്തകരുടെ പൊതുവികാരം.

ശശിയുടെ സാന്നിധ്യം തിരഞ്ഞെടുപ്പിൽ യാതൊരുവിധ സ്വാധീനവും ഉണ്ടാക്കിയിട്ടില്ല. ഇനി അദ്ദേഹത്തെ പാർട്ടിസഹകരണത്തിലേക്ക് തിരികെ എടുക്കാൻ കഴിയില്ല.

എങ്കിലും, തെറ്റിദ്ധാരണ മൂലം വഴിതെറ്റിപ്പോയ സാധാരണ പ്രവർത്തകർക്ക് കാര്യങ്ങൾ തിരുത്തി മുന്നോട്ടുവരാൻ അവസരമുണ്ട്. അവരുടെ അഭിപ്രായങ്ങൾ പാർട്ടി കേൾക്കുമെന്നും അദ്ദേഹം കൂട്ടിച്ചേർത്തു.

സീറ്റുകളുടെ എണ്ണത്തിൽ മുന്നിലായിരുന്നിട്ടും പാലക്കാട് ജില്ലയിൽ പാർട്ടിക്ക് കനത്ത നഷ്ടം നേരിടാൻ ഉണ്ടായ കാരണങ്ങളെക്കുറിച്ചും അദ്ദേഹം വിശദീകരിച്ചു. ഇടതുപക്ഷം കാഴ്ചവച്ച മികച്ച ഭരണത്തിന്റെ പേരിൽ ജനം വീണ്ടും വിജയിപ്പിക്കുമെന്ന അമിതപ്രതീക്ഷ പാർട്ടിക്കുണ്ടായിരുന്നു.

എന്നാൽ യുഡിഎഫ് എല്ലാവിധ കുതന്ത്രങ്ങളും പയറ്റി. കേന്ദ്രസർക്കാരിന്റെ ഭാഗത്തുനിന്നുള്ള ഗുരുതരമായ വീഴ്ചകളുടെ തുടർച്ചയെന്നോണം നെല്ലുസംഭരണത്തിലുണ്ടായ പാളിച്ചകൾ ചില മണ്ഡലങ്ങളിൽ തിരിച്ചടിയായി മാറി.

കാർഷികമേഖലയിലെ നെല്ലുസംഭരണം കൂടുതൽ കാര്യക്ഷമമാക്കുക, രൂക്ഷമായ വന്യമൃഗശല്യത്തിന് ശാശ്വതമായ പരിഹാരം കാണുക തുടങ്ങിയ ജനകീയ വിഷയങ്ങൾ പൊതുജനങ്ങളുടെ പിന്തുണയോടെ ഏറ്റെടുത്ത് നടപ്പാക്കാനാണ് പുതിയ തീരുമാനം. കൊങ്ങാട്, തൃത്താല, ചിറ്റൂർ എന്നീ മണ്ഡലങ്ങൾ നഷ്ടപ്പെടാൻ വിഭാഗീയതയാണോ കാരണമായത് എന്ന ചോദ്യത്തിന് അദ്ദേഹം മറുപടി നൽകി ഇങ്ങനെയാണ്: തൃത്താലയിൽ പാർട്ടിക്ക് ഉള്ളിൽ ചെറിയ തോതിലുള്ള പ്രശ്നങ്ങൾ ഉണ്ടായിരുന്നു എന്നത് ശരിയാണ്.

എന്നാൽ, ന്യൂനപക്ഷ വോട്ടുകളുടെ ഏകീകരണം യുഡിഎഫിന് അനുകൂലമായി മാറിയതും, ബിജെപിയിൽ നിന്ന് വ്യാപകമായി വോട്ടുകൾ അവർക്ക് ലഭിച്ചതുമാണ് അവിടെ തിരിച്ചടിയുണ്ടാക്കിയത്. കൊങ്ങാട്ടെ യുഡിഎഫ് വിജയത്തിൽ പി.കെ.

ശശി ഒരു ഫാക്ടറേ ആയിരുന്നില്ല. അവിടെയും ബിജെപി വോട്ടുകൾ യുഡിഎഫിന്റെ പെട്ടിയിലേക്കാണ് വീണത്.

ചിറ്റൂരിൽ ഇടതുമുന്നണി സ്ഥാനാർത്ഥിയുടെ അപരൻ വ്യാപകമായി വോട്ട് പിടിച്ചതാണ് പരാജയത്തിന് കാരണം. ചിറ്റൂരിൽ യുഡിഎഫിന് അനുകൂലമായ രീതിയിൽ തിരഞ്ഞെടുപ്പ് കമ്മീഷന്റെ ഭാഗത്തുനിന്ന് ഇടപെടലുകൾ ഉണ്ടായിട്ടുണ്ടോ എന്ന് സംശയമുണ്ട്.

പാലക്കാട് നഗരസഭയിൽ വീണ്ടും മൂന്നാം സ്ഥാനത്തേക്ക് പിന്തള്ളപ്പെട്ടത് വലിയൊരു തിരിച്ചടിയല്ലേ എന്ന ചോദ്യത്തിന്, പാലക്കാട് മണ്ഡലത്തിൽ തുടർച്ചയായി മൂന്നാം സ്ഥാനത്താണ് എന്നത് യാഥാർത്ഥ്യമാണെന്നാണ് അദ്ദേഹം പ്രതികരിച്ചത്. ആ സ്ഥിതിവിശേഷം മറികടക്കാൻ പലവിധ പരിശ്രമങ്ങൾ നടത്തിയിട്ടും വിജയം കണ്ടില്ല.

തിരഞ്ഞെടുപ്പുകളിൽ ന്യൂനപക്ഷ, ഭൂരിപക്ഷ ധ്രുവീകരണങ്ങൾ ശക്തമായി നടക്കുന്നുണ്ട്. ഈ സാഹചര്യം മുതലെടുത്തുള്ള യുഡിഎഫിന്റെ തന്ത്രങ്ങളാണ് അവരെ വിജയിപ്പിക്കുന്നത്.

ഈ പ്രവണതയെ പ്രതിരോധിക്കാൻ ശക്തമായ ജനകീയ ഇടപെടലുകൾ സംഘടിപ്പിക്കും. നിരവധി വിവാദങ്ങൾക്കിടയിലാണ് പുതിയ സെക്രട്ടറിയുടെ ചുമതല ഏറ്റെടുക്കുന്നത് എന്നതിനാൽ പ്രവർത്തനത്തോടൊപ്പം ശക്തമായ പ്രതിരോധവും തീർക്കേണ്ടതുണ്ട്.

ഈ വെല്ലുവിളിയെ എങ്ങനെ നേരിടും എന്ന ചോദ്യത്തിന് തന്റെ അനുഭവസമ്പത്ത് അദ്ദേഹം ഓർമ്മിപ്പിച്ചു. 1980 മുതൽ പാർട്ടി അംഗമായ വ്യക്തിയാണ് താൻ.

എസ്എഫ്ഐ കാലഘട്ടം മുതൽ തന്നെ മുഴുവൻ സമയ പാർട്ടി പ്രവർത്തകനാണ്. എത്രയോ വലിയ പ്രതിസന്ധിഘട്ടങ്ങളെയാണ് ഇതുവരെ തരണം ചെയ്തിട്ടുള്ളത്.

ഈ വെല്ലുവിളികളെയും തനിക്ക് വിജയകരമായി നേരിടാൻ സാധിക്കുമെന്നും അദ്ദേഹം വ്യക്തമാക്കി. വിശാല കമ്മിറ്റി: റിപ്പോർട്ടിങ് 23ന്
സംസ്ഥാന, ജില്ലാ വിശാല കമ്മിറ്റി യോഗങ്ങൾക്ക് ശേഷം സംസ്ഥാന സെക്രട്ടേറിയറ്റ് അംഗങ്ങൾ പങ്കെടുക്കുന്ന പാർട്ടി റിപ്പോർട്ടിങ് യോഗങ്ങൾ ഈ മാസം 23ന് നടക്കും.

ജില്ലയെ നാലു മേഖലകളാക്കി തിരിച്ചാണ് റിപ്പോർട്ടിങ് നടത്തുന്നത്. വിവിധ മേഖലകളിൽ പങ്കെടുക്കുന്ന പ്രമുഖർ: പാലക്കാട് – സംസ്ഥാന സെക്രട്ടറി എം.വി.

ഗോവിന്ദൻ, കുഴൽമന്ദം – എം. സ്വരാജ്, കുളപ്പുള്ളി – സി.എൻ.

മോഹനൻ, കൊങ്ങാട് – പി.കെ. ബിജു.