ലയണൽ മെസ്സി തട്ടിപ്പ് കേസ്: ആന്റോ അഗസ്റ്റിനെ ഉടൻ അറസ്റ്റ് ചെയ്യാൻ ഉദ്ദേശ്യമില്ലെന്ന് പൊലീസ്

അർജന്റീന ഫുട്ബോൾ താരം ലയണൽ മെസ്സിയെ കേരളത്തിലെത്തിക്കാമെന്ന് വാഗ്ദാനം നൽകി വഞ്ചന നടത്തിയെന്ന കേസിൽ ഒന്നാം പ്രതിയായ ആന്റോ അഗസ്റ്റിനെ നിലവിൽ അറസ്റ്റ് ചെയ്യാൻ ഉദ്ദേശ്യമില്ലെന്ന് പൊലീസ് വ്യക്തമാക്കി. എറണാകുളം പ്രിൻസിപ്പൽ സെഷൻസ് കോടതിയിൽ പ്രതി നൽകിയ മുൻകൂർ ജാമ്യഹർജി പരിഗണിക്കുന്ന വേളയിലാണ് പൊലീസ് ഇക്കാര്യം ഔദ്യോഗികമായി അറിയിച്ചത്.

നിയമപരമായ നോട്ടീസ് നൽകി ചോദ്യം ചെയ്യാനാണ് അന്വേഷണ സംഘം ലക്ഷ്യമിട്ടിരുന്നതെന്ന് പൊലീസ് കോടതിയെ അറിയിച്ചു. ഈ നിലപാട് വ്യക്തമാക്കിയതിനെ തുടർന്ന് കോടതി മുൻകൂർ ജാമ്യഹർജി തീർപ്പാക്കുകയാണുണ്ടായത്.

കേസിൽ ആന്റോ അഗസ്റ്റിൻ ഒന്നാം പ്രതിയും റിപ്പോർട്ടർ ബ്രോ‍ഡ്കാസ്റ്റിങ് കമ്പനി രണ്ടാം പ്രതിയുമാണ്. പൊലീസിന്റെ ചോദ്യം ചെയ്യൽ നടപടികൾ ഉണ്ടാകുമെന്ന ഘട്ടത്തിലാണ് പ്രതി മുൻകൂർ ജാമ്യത്തിനായി കോടതിയെ സമീപിച്ചത്.

അതേസമയം, മെസ്സി ബന്ധപ്പെട്ട തട്ടിപ്പ് കേസിന് പുറമെ മറ്റ് വിവാദങ്ങളിലും പ്രതിക്കെതിരെ നിയമനടപടികൾ പുരോഗമിക്കുകയാണ്.

മുഖ്യമന്ത്രി വി.ഡി.സതീശന്‍ രണ്ടാം വിവാഹം കഴിച്ചെന്ന തരത്തിലുള്ള പ്രചാരണങ്ങൾ നടത്തുന്നതിനായി വ്യാജരേഖകൾ ചമച്ചുവെന്നാരോപിച്ചും ആന്റോ അഗസ്റ്റിനെതിരെ മറ്റൊരു കേസ് നിലവിലുണ്ട്. കെപിസിസി വക്താവ് രാജു പി.നായർ നൽകിയ പരാതിയുടെ അടിസ്ഥാനത്തിൽ കളമശേരി പൊലീസാണ് ഈ കേസ് രജിസ്റ്റർ ചെയ്തിട്ടുള്ളത്.

ഈ കേസിലും പ്രതി മുൻകൂർ ജാമ്യത്തിനായി അപേക്ഷ സമർപ്പിച്ചിട്ടുണ്ട്.