ഇൻഷുറൻസ് ചെലവുകൾക്കും കമ്മിഷനും കടിഞ്ഞാണിടാൻ ഐആർഡിഎഐ; പ്രീമിയം കുറഞ്ഞേക്കും

ഇൻഷുറൻസ് കമ്പനികളുടെ പ്രവർത്തനച്ചെലവുകൾക്കും വിതരണ കമ്മിഷനും കർശന നിയന്ത്രണങ്ങൾ ഏർപ്പെടുത്താൻ ഇൻഷുറൻസ് റഗുലേറ്ററി ആൻഡ് ഡവലപ്മെന്റ് അതോറിറ്റി (ഐആർഡിഎഐ) തയ്യാറെടുക്കുന്നു. പോളിസി വിൽപനയുമായി ബന്ധപ്പെട്ട

ചെലവുകൾ വെട്ടിക്കുറയ്ക്കുന്നതിലൂടെ ഉപഭോക്താക്കൾക്ക് അടയ്ക്കേണ്ടിവരുന്ന പ്രീമിയത്തിലും മറ്റ് നിരക്കുകളിലും ആശ്വാസമുണ്ടാകുമെന്നാണ് അധികൃതരുടെ വിലയിരുത്തൽ. ഈ സുപ്രധാന മാറ്റവുമായി ബന്ധപ്പെട്ട

കൺസൽറ്റേഷൻ പേപ്പർ ഇതിനോടകം തന്നെ പൊതുജനാഭിപ്രായത്തിനായി പുറത്തിറക്കിയിട്ടുണ്ട്. വരുന്ന അഞ്ച് വർഷത്തിനുള്ളിൽ ലൈഫ് ഇൻഷുറൻസ് കമ്പനികളുടെ മാനേജ്മെന്റ് ചെലവ് പ്രീമിയത്തിന്റെ 12.5 ശതമാനമായും, ജനറൽ ഇൻഷുറൻസ് സ്ഥാപനങ്ങളുടേത് പ്രീമിയം വരുമാനത്തിന്റെ 20 ശതമാനമായും കുറയ്ക്കാനാണ് ലക്ഷ്യമിടുന്നത്.

ഇതിൽ കമ്പനികളുടെ ദൈനംദിന പ്രവർത്തനച്ചെലവുകൾ, വിതരണക്കാരുടെ കമ്മിഷൻ, ബ്രോക്കറേജ് തുകകൾ എന്നിവയെല്ലാം ഉൾപ്പെടും. 2023-ൽ ഇൻഷുറൻസ് കമ്മിഷൻ സംബന്ധിച്ച നിയന്ത്രണങ്ങൾ നീക്കം ചെയ്തതിനെ തുടർന്ന് വിതരണക്കാർക്കുള്ള പ്രതിഫലം കുത്തനെ ഉയർന്നിരുന്നു.

ഈ സാഹചര്യത്തിലാണ് പഴയ പരിധികൾ വീണ്ടും നടപ്പിലാക്കാൻ അധികൃതർ നീക്കം നടപ്പിലാക്കുന്നത്. പുതിയ തീരുമാനം ഏജന്റുമാർക്കും ഇടനിലക്കാർക്കും വലിയ തിരിച്ചടിയായേക്കുമെന്നാണ് സൂചന.

പോളിസി ഉൽപന്നങ്ങളുടെ സങ്കീർണതയും വിൽപനയ്ക്കായി ഏജന്റുമാർ നടത്തുന്ന പ്രയത്നവും അടിസ്ഥാനമാക്കിയായിരിക്കും പുതിയ കമ്മിഷൻ തുകകൾ നിശ്ചയിക്കുക. തേഡ് പാർട്ടി മോട്ടർ ഇൻഷുറൻസ് പോലെയുള്ള നിർബന്ധിത പദ്ധതികൾക്ക് വളരെ കുറഞ്ഞ നിരക്കിൽ മാത്രമായിരിക്കും കമ്മിഷൻ അനുവദിക്കുക.

അതേസമയം, ഗ്രാമീണ മേഖലകളിൽ നടക്കുന്ന ഇൻഷുറൻസ് വിൽപനകൾക്ക് കൂടുതൽ കമ്മിഷൻ നൽകാൻ വ്യവസ്ഥയുണ്ട്. ഗ്രൂപ്പ് ഇൻഷുറൻസ് പദ്ധതികൾക്ക് താരതമ്യേന കുറഞ്ഞ നിരക്കായിരിക്കും ലഭിക്കുക.

വായ്പകൾ പാസാക്കുന്നതോടൊപ്പം ഉപഭോക്താക്കളുടെ മേൽ ഇൻഷുറൻസ് നിർബന്ധിതമായി അടിച്ചേൽപ്പിക്കുന്ന രീതി പൂർണ്ണമായും നിരോധിക്കാനും ഐആർഡിഎഐ നിർദ്ദേശം നൽകിയിട്ടുണ്ട്. തെറ്റായ വാഗ്ദാനങ്ങൾ നൽകി പോളിസികൾ വിൽക്കുന്ന (മിസ്‌-സെല്ലിങ്) ജീവനക്കാരിൽ നിന്നും ഏജന്റുമാരിൽ നിന്നും കമ്മിഷൻ തുക തിരിച്ചുപിടിക്കുന്നതിനുള്ള വ്യവസ്ഥകളും കരടിൽ ഉൾപ്പെടുത്തിയിട്ടുണ്ട്.

പോളിസിച്ചെലവും കൊഴിഞ്ഞുപോക്കും കുറയും
ഇൻഷുറൻസ് മേഖലയിലെ പുതിയ നിയന്ത്രണ നീക്കങ്ങളെക്കുറിച്ച് എൽഐസി മുൻ മാനേജിങ് ഡയറക്ടർ ടി.സി.സുശീൽകുമാർ സംസാരിക്കുന്നു. ∙ എന്തുകൊണ്ടാണ് ഇൻഷുറൻസ് കമ്മിഷൻ വിതരണത്തിൽ ഐആർഡിഎഐ കൂടുതൽ നിയന്ത്രണങ്ങൾ കൊണ്ടുവരുന്നത്?
ഇൻഷുറൻസ് പോളിസികളിലേക്ക് ആളുകളെ ആകർഷിക്കുന്നതിനും ചേർക്കുന്നതിനുമുള്ള കമ്പനികളുടെ ചെലവ് പരമാവധി കുറയ്ക്കുക, ആ ലാഭം ഉപഭോക്താക്കൾക്ക് പ്രീമിയം തുക കുറച്ചുനൽകിക്കൊണ്ട് കൈമാറുക എന്നതാണ് ലക്ഷ്യം.

ഇതിന്റെ ഭാഗമായി വ്യക്തികളെ പോളിസികളിൽ ചേർക്കുമ്പോൾ ഏജന്റുമാർക്കും ബാങ്കുകൾക്കും ലഭിക്കുന്ന കമ്മിഷനിൽ സ്വാഭാവികമായും കുറവുണ്ടാകും. ∙ ഇതുകൊണ്ടുള്ള മറ്റ് പ്രധാന നേട്ടങ്ങൾ എന്തൊക്കെയാണ്?
പോളിസികളുടെ മൊത്തത്തിലുള്ള ചെലവ് ഗണ്യമായി കുറയും.

പോളിസികളുടെ കാലാവധി പൂർത്തിയാകുന്നതുവരെ കൂടുതൽ ആളുകൾ കൃത്യമായി പ്രീമിയം അടച്ചുതുടங்கும். ഇതുവഴി ഉപഭോക്താക്കളുടെ കൊഴിഞ്ഞുപോക്ക് ഫലപ്രദമായി തടയാൻ സാധിക്കും.

ഇടപാടുകളിലെ സുതാര്യത വർദ്ധിക്കുകയും പോളിസി ഉടമകൾക്ക് ലഭിക്കുന്ന സേവനങ്ങൾ കൂടുതൽ മെച്ചപ്പെടുകയും ചെയ്യും. ∙ ഈ പരിഷ്കാരങ്ങൾ എല്ലാത്തരം പോളിസികളെയും ബാധിക്കുമോ?
തീർച്ചയായും, ഈ നിയന്ത്രണങ്ങൾ ലൈഫ്, നോൺ-ലൈഫ് ഇൻഷുറൻസ് പദ്ധതികൾക്ക് ഒരുപോലെ ബാധകമായിരിക്കും.

കൂടാതെ ബാങ്കുകൾ, ബ്രോക്കർമാർ, എൻബിഎഫ്സികൾ, കോർപറേറ്റ് ഏജന്റുകൾ, വ്യക്തിഗത ഏജന്റുമാർ തുടങ്ങി ഇൻഷുറൻസ് വിപണിയുമായി ബന്ധപ്പെട്ട് പ്രവർത്തിക്കുന്ന എല്ലാ വിഭാഗങ്ങളുടെയും കമ്മിഷനെ പുതിയ നിർദ്ദേശങ്ങൾ ബാധിക്കും. ∙ പുതിയ നിയന്ത്രണങ്ങൾ എപ്പോഴാണ് നിലവിൽ വരുന്നത്?
ഇത് ഇതുവരെ അന്തിമ നിയമമായി മാറിയിട്ടില്ല.

നിലവിൽ ഐആർഡിഎഐ പുറത്തിറക്കിയ പ്രാഥമിക നിർദ്ദേശം മാത്രമാണിത്. ഇതിൽ പൊതുജനങ്ങൾക്കും വിദഗ്ദ്ധർക്കും തങ്ങളുടെ അഭിപ്രായങ്ങളും നിർദ്ദേശങ്ങളും സമർപ്പിക്കാവുന്നതാണ്.