ബിസിനസ് ആവശ്യങ്ങള്‍ക്കായി കുറഞ്ഞ ചെലവില്‍ ഉപയോഗിക്കാന്‍ സാധിക്കുന്ന പുതിയ ആര്‍ട്ടിഫിഷ്യല്‍ ഇന്റലിജന്‍സ് മോഡലുകള്‍ പ്രമുഖ ടെക് കമ്പനികളായ ഓപ്പണ്‍ എഐയും ആന്ത്രോപിക്കും വിപണിയിലെത്തിച്ചു. ഓപ്പണ്‍ എഐ ‘ജിപിടി-6 സോള്‍’, ‘ജിപിടി-6 ലൂണ’ എന്നീ മോഡലുകൾ അവതരിപ്പിച്ചപ്പോള്‍, ‘ക്ലോഡ് ഓപസ് 5.5’ എന്ന പുതിയ പതിപ്പാണ് ആന്ത്രോപിക് പുറത്തിറക്കിയത്.
അതിനൂതന സാങ്കേതികവിദ്യകള്‍ക്കപ്പുറം, ദൈനംദിന ബിസിനസ് ആവശ്യങ്ങള്‍ക്ക് മുന്‍ഗണന നല്‍കിയാണ് ഈ പുതിയ സംരംഭങ്ങള്‍ രൂപകല്‍പ്പന ചെയ്തിരിക്കുന്നത്. മണിക്കൂറുകളുടെ വ്യത്യാസത്തിലാണ് പ്രമുഖ കമ്പനികള്‍ തങ്ങളുടെ പുതിയ എഐ മോഡലുകള്‍ പ്രഖ്യാപിച്ചത്.
എഐ വികസനത്തിന് അല്‍പ്പം വേഗത കുറഞ്ഞ സമീപനം വേണമെന്ന് ഇരു കമ്പനികളും ആവശ്യപ്പെട്ട് അധികം വൈകാതെയാണ് പുതിയ മോഡലുകളുടെ കടന്നുവരവ് എന്നത് ശ്രദ്ധേയമാണ്. അതീവ നവീനമായ സാങ്കേതികവിദ്യകള്‍ക്കപ്പുറം കുറഞ്ഞ ചെലവിലും ഉയര്‍ന്ന കാര്യക്ഷമതയിലുമാണ് ആഗോള വിപണിയില്‍ കമ്പനികള്‍ ഇപ്പോള്‍ മത്സരിക്കുന്നത് എന്നാണ് ഈ മാറ്റങ്ങള്‍ വ്യക്തമാക്കുന്നത്.
സങ്കീര്‍ണ്ണമായ കോഡിങ് ഉള്‍പ്പെടെയുള്ള പ്രവര്‍ത്തനങ്ങള്‍ക്കായാണ് ‘ജിപിടി-6 സോള്‍’ രൂപകല്‍പ്പന ചെയ്തിരിക്കുന്നത്. എന്നാല്‍ വലിയ തോതിലുള്ള വിവരങ്ങള്‍ വേര്‍തിരിച്ചെടുക്കുന്നതിനും ഡോക്യുമെന്റുകള്‍ ചുരുക്കി എഴുതുന്നതിനുമുള്ള ജോലികള്‍ക്ക് ഏറ്റവും അനുയോജ്യമായ മാതൃകയാണ് ‘ജിപിടി-6 ലൂണ’ എന്ന് ഓപ്പണ്‍ എഐ ഔദ്യോഗിക ബ്ലോഗ് പോസ്റ്റിലൂടെ വ്യക്തമാക്കി.
മുന്‍പത്തെ ജിപിടി-5.6 മോഡലുകളുടെ പ്രൊമോഷണല്‍ നിരക്കുകളേക്കാള്‍ 50 ശതമാനം വിലക്കുറവാണ് ഈ രണ്ട് പുതിയ മോഡലുകള്‍ക്കും കമ്പനി വാഗ്ദാനം ചെയ്യുന്നത്. ക്യാഷിങ്, ഇന്‍ഫറന്‍സ് തുടങ്ങിയ മേഖലകളിലുണ്ടായ സാങ്കേതിക മുന്നേറ്റങ്ങളാണ് ഈ വലിയ വിലക്കുറവിന് അടിസ്ഥാനം.
അതേസമയം, ആന്ത്രോപിക്കിന്റെ പുതിയ 5.5 സീരീസിലെ ആദ്യ മോഡലാണ് ‘ക്ലോഡ് ഓപസ് 5.5’. ഇതിന് മുന്‍പുള്ള ക്ലോഡ് ഫേബിള്‍ 5.1 മോഡലിന് സമാനമായ പ്രകടനം കാഴ്ചവെക്കാന്‍ ഇതിന് സാധിക്കുമെങ്കിലും, പ്രവര്‍ത്തിപ്പിക്കാന്‍ ഓപസ് 5.1-നെക്കാള്‍ 40 ശതമാനം ചെലവ് കുറവാണ് എന്ന പ്രത്യേകതയുമുണ്ട്.
പത്ത് ലക്ഷം ഇന്‍പുട്ട് ടോക്കണുകള്‍ക്ക് 4 ഡോളറും ഔട്ട്പുട്ട് ടോക്കണുകള്‍ക്ക് 20 ഡോളറുമാണ് വില നിശ്ചയിച്ചിരിക്കുന്നത്. ഇതിന് പുറമെ സോണറ്റ് 5.5, ഹൈക്കു 5.5 എന്നീ മോഡലുകളും വരുന്ന ആഴ്ചകളിൽ പുറത്തിറക്കുമെന്ന് ആന്ത്രോപിക് അറിയിച്ചിട്ടുണ്ട്.
വലിയ തുക മുതല്‍മുടക്കുന്നതിന് പകരം എഐ സാങ്കേതികവിദ്യയില്‍ നിന്നും ലഭിക്കുന്ന ഉല്‍പ്പാദനക്ഷമത കണക്കാക്കി കുറഞ്ഞ ചെലവില്‍ സേവനങ്ങള്‍ ലഭ്യമാക്കാനാണ് ഇപ്പോള്‍ കമ്പനികള്‍ ശ്രമിക്കുന്നത്. ഓപ്പണ്‍ എഐയും ആന്ത്രോപിക്കും തമ്മിലുള്ള ഈ ആരോഗ്യകരമായ മത്സരം ആഗോള എഐ വിപണിയില്‍ വലിയൊരു വിലയുദ്ധത്തിന് വഴിവെക്കുമെന്നും ഇത് മോഡലുകളുടെ മൊത്തത്തിലുള്ള ലാഭക്ഷമതയെ ബാധിച്ചേക്കാമെന്നും സാമ്പത്തിക വിദഗ്ധര്‍ വിലയിരുത്തുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
