ഇന്ത്യൻ വാഹന വിപണി പിടിക്കാൻ മഹീന്ദ്രയുടെ മിനി സ്കോർപിയോ; പുതിയ എസ്‌യുവികൾ 2027-ൽ എത്തും

ഇന്ത്യൻ വാഹന വിപണിയിൽ പുതിയ പദ്ധതികളുമായി മുന്നോട്ട് പോവുകയാണ് മഹീന്ദ്ര. ഇതിന്റെ ഭാഗമായി 2027ലും 2028ലുമായി രണ്ട് പുതിയ സബ്-4 മീറ്റർ എസ്‌യുവികൾ വിപണിയിലെത്തിക്കാനുള്ള തയ്യാറെടുപ്പിലാണ് കമ്പനി.

വിഷൻ എസ് കൺസെപ്റ്റിനെ അടിസ്ഥാനമാക്കി തയാറാക്കുന്ന കരുത്തുറ്റതും ബോക്സി രൂപകൽപ്പനയുള്ളതുമായ ഒരു വാഹനം ഈ നിരയിലുണ്ടാകും. മഹീന്ദ്രയുടെ പുതിയ എൻ.യു-ഐ.ക്യു മോഡുലാർ പ്ലാറ്റ്‌ഫോമിലാണ് ഈ എസ്‌യുവി നിർമിക്കുന്നത്.

സ്കോർപിയോ ബ്രാൻഡിന്റെ പാരമ്പര്യം നിലനിർത്തിക്കൊണ്ടായിരിക്കും ഈ പുതിയ മോഡലിന്റെ വരവ്. നിലവിൽ ഈ വാഹനത്തിന്റെ പരീക്ഷണയോട്ടം പുരോഗമിക്കുകയാണ്.

സ്കോർപിയോയെ ഓർമിപ്പിക്കുന്ന ഡിസൈൻ ശൈലിയാണ് വാഹനത്തിന് നൽകിയിരിക്കുന്നത്. പുറത്തുവന്ന സ്പൈ ചിത്രങ്ങൾ സൂചിപ്പിക്കുന്നത് ഉൽപ്പാദന പതിപ്പിന് വിഷൻ എസ് കൺസെപ്റ്റുമായി ഏറെ സാമ്യമുണ്ടാകുമെന്നാണ്.

ആധുനിക മോഡുലാർ പ്ലാറ്റ്‌ഫോമിലാണ് വാഹനം ഒരുങ്ങുന്നതെങ്കിലും, ചതുരാകൃതിയിലുള്ളതും നിവർന്നുനിൽക്കുന്നതുമായ ബോഡി ഡിസൈൻ വാഹനത്തിന് കൂടുതൽ കരുത്തുറ്റ ലുക്ക് നൽകുന്നുണ്ട്. പിന്നിൽ വിൻഡ്‌സ്‌ക്രീനിനോട് ചേർന്ന് നേർത്ത എൽ.ഇ.ഡി ടെയിൽ ലാമ്പ് ക്ലസ്റ്ററാണ് നൽകിയിട്ടുള്ളത്.

സ്കോർപിയോ ക്ലാസിക്കിന്റെയും സ്കോർപിയോ-എൻന്റെയും ടെയിൽ ലാമ്പുകളുമായി ഇതിന് സാമ്യമുണ്ട്. ടെയിൽഗേറ്റിൽ പൂർണ വലുപ്പത്തിലുള്ള സ്പെയർ വീലും വശത്ത് ഹിഞ്ച് ചെയ്ത പിൻ വാതിലും ഇതിൽ കാണാം.

വലുതും ചതുരാകൃതിയിലുള്ളതുമായ വീൽ ആർച്ചുകൾ, ഫ്ലഷ് ടൈപ്പ് ഡോർ ഹാൻഡിലുകൾ, കുത്തനെയുള്ള തൂണുകൾ, 16 ഇഞ്ച് അലോയ് വീലുകൾ എന്നിവയും വാഹനത്തിന്റെ പ്രധാന സവിശേഷതകളാണ്. വിഷൻ എസ് കൺസെപ്റ്റിനെ അടിസ്ഥാനമാക്കിയുള്ള ഈ എസ്‌യുവിയിൽ മഹീന്ദ്രയുടെ അടുത്ത തലമുറ ഇന്റീരിയർ ഡിസൈൻ പ്രതീക്ഷിക്കാവുന്നതാണ്.

പുറത്തുവന്ന ചിത്രങ്ങൾ പ്രകാരം ആധുനിക ഡിസ്പ്ലേകൾക്കും ഫിസിക്കൽ നിയന്ത്രണങ്ങൾക്കും പ്രാധാന്യം നൽകിയ ക്യാബിൻ ലേഔട്ടാണ് ഇതിലുള്ളത്. ഇൻഫോടെയ്ൻമെന്റ് സംവിധാനത്തിനും ഇൻസ്ട്രുമെന്റ് ക്ലസ്റ്ററിനുമായി ഏകദേശം 10.25 ഇഞ്ച് വീതമുള്ള രണ്ട് സ്ക്രീനുകൾ വാഹനത്തിൽ ഇടംപിടിച്ചേക്കും.

മഹീന്ദ്രയുടെ അടുത്ത തലമുറ അഡ്രിനോക്‌സ് സോഫ്റ്റ്‌വെയർ സംവിധാനത്തിലാകും സെൻട്രൽ ഇൻഫോടെയ്ൻമെന്റ് പ്രവർത്തിക്കുക. എ.സി വെന്റുകൾക്ക് താഴെയായി ഫിസിക്കൽ ക്ലൈമറ്റ് കൺട്രോൾ ഡയലുകളും എയർക്രാഫ്റ്റ് ശൈലിയിലുള്ള ടോഗിൾ സ്വിച്ചുകളും ഇതിൽ നൽകിയേക്കാം.

ഓട്ടോ ഹോൾഡോടുകൂടിയ ഇലക്ട്രോണിക് പാർക്കിംഗ് ബ്രേക്ക്, വയർലെസ് സ്മാർട്ട്‌ഫോൺ ചാർജിംഗ് പാഡ്, ഡ്രൈവ് മോഡ് സെലക്ടർ, മൾട്ടി ഫങ്ഷൻ ലെതറെറ്റ് സ്റ്റിയറിംഗ് വീൽ, പനോരമിക് സൺറൂഫ് തുടങ്ങിയ ഫീചറുകളും വാഹനത്തിൽ പ്രതീക്ഷിക്കുന്നുണ്ട്. കൂടാതെ പവർഡ്, വെന്റിലേറ്റഡ് ഫ്രണ്ട് സീറ്റുകൾ, ലെവൽ 2 എ.ഡി.എ.എസ്, 6 എയർബാഗുകൾ, ഇലക്ട്രോണിക് സ്റ്റബിലിറ്റി കൺട്രോൾ, ഹിൽ സ്റ്റാർട്ട് അസിസ്റ്റ് തുടങ്ങിയ സുരക്ഷാ സംവിധാനങ്ങളും വാഹനത്തിൽ ലഭ്യമാക്കിയേക്കും.

പുതിയ മിനി സ്കോർപിയോയിൽ 1.2 ലിറ്റർ എംസ്റ്റാലിയൻ ടർബോ പെട്രോൾ എൻജിനും 1.5 ലിറ്റർ ടർബോ ഡീസൽ എൻജിനും ലഭിച്ചേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. എൻ.യു-ഐ.ക്യു പ്ലാറ്റ്‌ഫോമിന് പെട്രോൾ, ഹൈബ്രിഡ്, ഇലക്ട്രിക് പവർട്രെയിനുകളെ പിന്തുണയ്ക്കാനുള്ള ശേഷിയുണ്ട്.

1.2 ലിറ്റർ ടർബോ പെട്രോൾ എൻജിൻ അടിസ്ഥാനമാക്കി ഹൈബ്രിഡ് പവർട്രെയിനും കമ്പനി വികസിപ്പിച്ചുകൊണ്ടിരിക്കുന്നുണ്ട്. കൂടുതൽ കരുത്തുറ്റതും ലൈഫ്‌സ്റ്റൈൽ കേന്ദ്രീകൃതവുമായ എസ്‌യുവി എന്ന നിലയിൽ എക്സ്.യു.വി 3എക്‌സ്ഒയ്ക്ക് ഒപ്പമായിരിക്കും പുതിയ മോഡലിന്റെ സ്ഥാനം.

വിപണിയിൽ ടാറ്റ നെക്‌സോൺ, മാരുതി ബ്രെസ്സ, ഹ്യുണ്ടായി വെന്യു, വരാനിരിക്കുന്ന റെനോ ബ്രിഡ്ജർ തുടങ്ങിയ മോഡലുകളുമായാകും ഈ വാഹനം മത്സരിക്കുക. മിനി സ്കോർപിയോ 2027ന്റെ തുടക്കത്തിൽ ഇന്ത്യ മൊബിലിറ്റി ഗ്ലോബൽ എക്‌സ്‌പോയിൽ അവതരിപ്പിച്ചേക്കുമെന്നാണ് വിവരം.