കേരള സർവകലാശാലയിലെ വിവാദ കരട് മാർഗ്ഗരേഖ ഉപേക്ഷിച്ചു; പുതിയ നിർദേശങ്ങൾ തേടുമെന്ന് സിൻഡിക്കേറ്റ് ഉപസമിതി

തിരുവനന്തപുരം: കലാലയ രാഷ്ട്രീയത്തിന് തടയിടാൻ ലക്ഷ്യമിട്ട് തയ്യാറാക്കിയ വിവാദ കരട് മാർഗ്ഗരേഖ നടപ്പാക്കില്ലെന്ന് കേരള സർവകലാശാല. വിഷയം വലിയ ചർച്ചയായ പശ്ചാത്തലത്തിൽ പുതിയ നിർദേശങ്ങൾ തയ്യാറാക്കാൻ നിലവില്‍ തീരുമാനമായിട്ടുണ്ട്.

ഇതുമായി ബന്ധപ്പെട്ട് വിദ്യാർത്ഥികളിൽ നിന്നും അഭിപ്രായം തേടിയ ശേഷം ഇക്കാര്യം ഹൈക്കോടതിയെ ഔദ്യോഗികമായി അറിയിക്കും. ക്യാമ്പസ്സിൽ രാഷ്ട്രീയ സമരങ്ങൾ പാടില്ല, രാഷ്ട്രീയത്തിന്റെ ഭാഗമായി ധർണയോ ഉപരോധമോ പാടില്ല, ക്യാമ്പസ്സിൽ രാഷ്ട്രീയ മുദ്രാവാക്യങ്ങൾ വിളിക്കരുത്, ദേശവിരുദ്ധ പശ്ചാത്തലം ഉള്ളവരെ ക്ഷണിച്ചുള്ള പരിപാടികൾ നടത്തരുത്, ഡിജിറ്റൽ പ്ലാറ്റ്ഫോം വഴിയും രാഷ്ട്രീയ പ്രചാരണം പാടരുത് എന്നിങ്ങനെയായിരുന്നു കരട് രേഖയിലെ നിർദേശങ്ങൾ.

ഈ നിർദേശങ്ങൾക്കെതിരെ ഇടത്, വലത് വിദ്യാർത്ഥി സംഘടനകൾ ശക്തമായ എതിർപ്പുമായി രംഗത്തെത്തിയിരുന്നു. സംഭവത്തിൽ ജനാധിപത്യ വിരുദ്ധമെന്നായിരുന്നു പ്രതിപക്ഷ നേതാവ് പിണറായി വിജയൻറെ പ്രതികരണം.

പുറത്തുവന്ന വിവാദ കരട് മാർഗ്ഗരേഖ ബോധപൂർവം പ്രചരിപ്പിച്ചതാണെന്നും 2005-ലെ എംജി സർവകലാശാലയുടെ മാർഗ്ഗരേഖ പേര് മാറ്റി ഇറക്കുകയായിരുന്നുവെന്നും, അതാണ് ഉപസമിതിക്ക് തന്നതെന്നും സിൻഡിക്കേറ്റ് ഉപസമിതി അധ്യക്ഷൻ അജയ് ജുവൽ കുര്യാക്കോസ് വ്യക്തമാക്കി. യോഗത്തിൽ എതിർപ്പ് അറിയിച്ചിട്ടും മാർഗ്ഗരേഖ വിതരണം ചെയ്യുകയായിരുന്നുവെന്നും, ഇതിൽ കർശന നടപടി ആവശ്യപ്പെടുമെന്നും അദ്ദേഹം കൂട്ടിച്ചേർത്തു.

വിവാദം ശക്തമായതോടെ ഉന്നത വിദ്യാഭ്യാസ മന്ത്രി റോജി എം ജോൺ കഴിഞ്ഞ ദിവസം പ്രതികരണവുമായി രംഗത്തെത്തിയിരുന്നു. കാളപെറ്റെന്ന് കേൾക്കുമ്പോഴേക്കും കയറെടുക്കുന്ന രീതിയിലാണ് തെറ്റിദ്ധാരണ പരത്തുന്ന പ്രചാരണങ്ങൾ നടക്കുന്നതെന്ന് മന്ത്രി അഭിപ്രായപ്പെട്ടു.

വിദ്യാർത്ഥി രാഷ്ട്രീയം അവസാനിപ്പിക്കാൻ കേരള സർവകലാശാല യാതൊരു തീരുമാനവും കൈക്കൊണ്ടിട്ടില്ലെന്നും, കലാലയ രാഷ്ട്രീയത്തെ പ്രോത്സാഹിപ്പിക്കണമെന്നതാണ് സർക്കാരിന്‍റെ നയമെന്നും അദ്ദേഹം ഓർമ്മിപ്പിച്ചു. കോടതി നിർദ്ദേശപ്രകാരമാണ് കേരള സർവകലാശാല സിൻഡിക്കേറ്റിന്‍റെ ഉപസമിതിയെ നിയമിച്ചത്.

ഈ ഉപസമിതിയുടെ ചർച്ചകൾക്കായി നിയമ സമിതി തയ്യാറാക്കിയ ഒരു രേഖ മാത്രമാണ് ഇപ്പോൾ പുറത്തുവന്നിട്ടുള്ളതെന്നും മന്ത്രി വിശദീകരിച്ചു. വിദ്യാർത്ഥി സംഘടനകൾക്ക് ഈ രേഖ അയച്ച് അവരിൽ നിന്നും അഭിപ്രായം തേടിയ ശേഷം വീണ്ടും ചർച്ച ചെയ്ത് അംഗീകരിച്ചാൽ മാത്രമേ ഇത് സർവകലാശാലയുടെ മാർഗ്ഗനിർദ്ദേശമായി കണക്കാക്കുകയുള്ളൂ.

പ്രതിപക്ഷ നേതാവ് പിണറായി വിജയൻ പ്രസ്താവന നടത്തുന്നതിന് മുൻപ് സ്വന്തം സംഘടനയിലുള്ള ഉപസമിതി അംഗങ്ങളോടെങ്കിലും ചോദിച്ചു കാര്യങ്ങൾ മനസ്സിലാക്കണമായിരുന്നുവെന്നും മന്ത്രി കുറ്റപ്പെടുത്തി. അതേസമയം, കലാലയ രാഷ്ട്രീയത്തിന് തടയിടാനുള്ള കരട് രേഖയിൽ വിശദീകരണവുമായി കേരള സർവ്വകലാശാല വൈസ് ചാൻസിലർ മോഹൻ കുന്നുമ്മൽ നേരത്തെ രംഗത്തെത്തിയിരുന്നു.

പുറത്തുവന്നത് ഒറിജിനൽ രേഖ അല്ലെന്നും അത്തരം ഒരു രേഖ തയാറാക്കിയിട്ടില്ലെന്നുമായിരുന്നു അദ്ദേഹത്തിൻ്റെ പ്രതികരണം. കേരള സർവ്വകലാശാല സിൻഡിക്കേറ്റ് തീരുമാനത്തിന് വിരുദ്ധമായാണ് കരട് രേഖയെന്നും വൈസ് ചാൻസിലർമാർ മാത്രം തീരുമാനം എടുത്താൽ അത് അംഗീകരിക്കില്ലെന്നും കായിക മന്ത്രി ഒ ജെ ജനീഷ് വ്യക്തമാക്കി.

സിൻഡിക്കേറ്റ് അംഗങ്ങളുമായി പോലും ചർച്ച ചെയ്യാതെയാണ് കരട് രേഖ പുറത്തിറക്കിയത്. സർക്കാർ അതിന് അനുകൂലമല്ലെന്നും സർക്കാരിന് കൃത്യമായ അഭിപ്രായം ഉണ്ടെന്നും യൂത്ത് കോൺഗ്രസും ഇതിനെ അനുകൂലിക്കില്ലെന്നും അദ്ദേഹം പറഞ്ഞു.

കേരളത്തിൽ വിദ്യാർഥി രാഷ്ട്രീയം തെറ്റല്ലെന്നും പ്രധാന നേതാക്കൾ വന്നത് വിദ്യാർത്ഥി രാഷ്ട്രീയത്തിലൂടെ ആണെന്നും മന്ത്രി ഒ ജെ ജനീഷ് ഓർമ്മിപ്പിച്ചു.