പരീക്ഷാഹോളിൽ മൊബൈൽ ഫോണുമായി പിടിക്കപ്പെട്ടതിനെ തുടർന്ന് മുംബൈ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (**IIT Bombay**) വിദ്യാർഥി ആത്മഹത്യ ചെയ്തു. എനർജി സയൻസ് ആൻഡ് എൻജിനീയറിങ് വിഭാഗത്തിലെ രണ്ടാം വർഷ വിദ്യാർഥിയായ **സാഹിൽ വക്കോഡ്** ആണ് ജീവനൊടുക്കിയത്.
ചാറ്റ്ജിപിടി വഴി ഉത്തരങ്ങൾ കണ്ടെത്താൻ ശ്രമിക്കുന്നതിനിടെയാണ് വിദ്യാർഥി പിടിയിലായത്. അതേസമയം, പരീക്ഷാക്രമക്കേടുമായി ബന്ധപ്പെട്ട് വിദ്യാർത്ഥിക്കെതിരെ യാതൊരുവിധ ശിക്ഷാനടപടികളും സ്വീകരിച്ചിട്ടില്ലെന്ന് അധികൃതർ വ്യക്തമാക്കി.
സംഭവത്തിനു പിന്നാലെ വിദ്യാർത്ഥിക്ക് കൗൺസലിങ് നൽകുകയും വകുപ്പ് മേധാവി നേരിട്ട് സംസാരിക്കുകയും ചെയ്തിരുന്നു. യാതൊരുവിധ നടപടിയും ഉണ്ടാവില്ലെന്ന് അധികൃതർ ഉറപ്പുനൽകിയെങ്കിലും, ഹോസ്റ്റലിലേക്ക് മടങ്ങിയ **സാഹിൽ വക്കോഡിനെ** വൈകുന്നേരത്തോടെ മരിച്ച നിലയിൽ കണ്ടെത്തുകയായിരുന്നു.
എന്നാൽ ഈ സംഭവത്തിന് പിന്നാലെ ക്യാംപസിൽ വിദ്യാർഥികളുടെ വൻ പ്രതിഷേധം ആരംഭിച്ചിട്ടുണ്ട്. **സാഹിൽ വക്കോഡിനെ** ക്യാംപസിൽ നിന്നും സസ്പെൻഡ് ചെയ്യുമെന്ന് അധികൃതർ ഭീഷണിപ്പെടുത്തിയതായി വിദ്യാർഥികൾ ആരോപിക്കുന്നു.
കടുത്ത ഭയവും മാനസിക സമ്മർദ്ദവുമാണ് ആത്മഹത്യയിലേക്ക് നയിച്ചതെന്നാണ് പ്രതിഷേധക്കാരുടെ വാദം. കഴിഞ്ഞ ആറുമാസത്തിനിടെ ക്യാംപസിൽ നടക്കുന്ന മൂന്നാമത്തെ വിദ്യാർത്ഥി മരണമാണിത്.
