സുരക്ഷാ വീഴ്ചയും അപായ സാധ്യതയും; കൊല്ലം ബീച്ച് മരണക്കെണിയാകുന്നു

സംസ്ഥാനത്തെ ഏറ്റവും അപകടകരമായ വിനോദസഞ്ചാര കേന്ദ്രങ്ങളിലൊന്നായി കൊല്ലം ബീച്ച് മാറിക്കൊണ്ടിരിക്കുകയാണ്. മറ്റു തീരങ്ങളിൽ നിന്നും വ്യത്യസ്തമായി കടലിലേക്ക് ചെറിയ ചരിവുള്ള ഭൂപ്രകൃതിയല്ല ഇവിടെയുള്ളത്.

മറിച്ച് ഒരു ‘കൊക്ക’ പോലെയാണ് ഇവിടുത്തെ കിടപ്പ്. വെള്ളത്തിലിറങ്ങുന്നിടത്തുതന്നെ കുത്തനെ രണ്ടാൾ താഴ്ചയും അതോടൊപ്പം ശക്തമായ തിരമാലകളുമാണ് സഞ്ചാരികളെ കാത്തിരിക്കുന്നത്.

കഴിഞ്ഞ അഞ്ചു വർഷത്തിനിടെ ഇവിടെ 40 പേർ മുങ്ങിമരിച്ചിട്ടുണ്ടെന്ന മുന്നറിയിപ്പ് ബോർഡ് ബീച്ചിൽ തന്നെ സ്ഥാപിച്ചിട്ടുണ്ട്. എന്നാൽ കഴിഞ്ഞ പത്തു വർഷത്തിനിടയിൽ നൂറിലേറെ മനുഷ്യരുടെ ജീവനാണ് ഇവിടെ കടൽ എടുത്തത്.

ഇതിന്റെ പതിന്മടങ്ങു പേരെയാണ് ലൈഫ് ഗാർഡുകളും മത്സ്യത്തൊഴിലാളികളും ചേർന്ന് മരണമുഖത്തുനിന്ന് രക്ഷപ്പെടുത്തിയത്. കടലിലേക്കിറങ്ങുന്നത് പൂർണ്ണമായി വിലക്കിക്കൊണ്ടും വടംകെട്ടി പ്രവേശനം നിയന്ത്രിച്ചുകൊണ്ടുമാണ് വർഷങ്ങളായി ഇവിടെ സുരക്ഷാ നടപടികൾ സ്വീകരിക്കുന്നത്.

ബീച്ച് മുതൽ തങ്കശ്ശേരി വരെയുള്ള തീരദേശ റോഡ് വികസിപ്പിച്ചതോടെ തുറമുഖ ഭാഗത്തേക്കും മറുവശത്തുള്ള വെടിക്കുന്ന് മേഖലയിലേക്കും ബീച്ചിന്റെ വ്യാപ്തി വർദ്ധിച്ചു. വിനോദത്തിനായി എത്തുന്നവർ ഈ പുതിയ ഭാഗങ്ങളിലൂടെ കടലിൽ ഇറങ്ങുന്നത് പതിവായിരിക്കുകയാണ്.

നിലവിലുള്ള ലൈഫ് ഗാർഡുകളുടെ നിയന്ത്രണ പരിധിക്കും വടംകെട്ടി തിരിച്ചിരിക്കുന്ന സുരക്ഷാ ബെൽറ്റിനും പുറത്താണ് ഈ പ്രദേശങ്ങൾ സ്ഥിതി ചെയ്യുന്നത്. അതിനാൽ തന്നെ ഭൂരിഭാഗം അപകടങ്ങളും നടക്കുന്നത് ഈ ‘പരിധിക്കപ്പുറമുള്ള’ സ്ഥലങ്ങളിലാണ്.

ഇതിനുപുറമേ കള്ളക്കടൽ പ്രതിഭാസവും പ്രദേശത്ത് വലിയ തോതിലുള്ള ഭീഷണി സൃഷ്ടിക്കുന്നുണ്ട്. തീരസുരക്ഷ ഉറപ്പാക്കുമെന്ന് പ്രഖ്യാപിച്ച പദ്ധതികളെല്ലാം വർഷങ്ങൾ കഴിഞ്ഞിട്ടും कागലാസിൽ മാത്രമായി ഒതുങ്ങുകയാണ്.

സന്ദർശകരുടെ ജീവൻ പൊലിയുന്ന സംഭവങ്ങൾ ഇവിടെ ആവർത്തിക്കുമ്പോൾ സുരക്ഷാ സംവിധാനങ്ങളിലെ വീഴ്ച വീണ്ടും ശക്തമായ ചർച്ചയാവുകയാണ്. ജലരേഖയായി മാറിയ പദ്ധതികൾ ബീച്ചും വെടിക്കുന്ന് മേഖലയും പൂർണ്ണമായും സുരക്ഷിതമാക്കുന്നതിനായി മുൻപ് രണ്ട് പ്രധാന പദ്ധതികൾ ആസൂത്രണം ചെയ്തിരുന്നു.

കടലിൽ ജിയോ ട്യൂബുകൾ സ്ഥാപിച്ചുകൊണ്ടുള്ള ഓഫ് ഷോർ ബ്രേക്ക് വാട്ടർ പദ്ധതിയും (സബ്മേർജ്ഡ് ബ്രേക്ക് വാട്ടർ പദ്ധതി), വെടിക്കുന്ന് മേഖലയിൽ പുലിമുട്ട് നിർമ്മിക്കുന്നതുമാണ് അവ. തീരത്തുനിന്ന് 100 മുതൽ 150 മീറ്റർ വരെ മാറി ബീച്ചിന് സമാന്തരമായി കടലിലെ ആഴം കുറഞ്ഞ ഭാഗത്ത് ജിയോ ട്യൂബുകൾ സ്ഥാപിക്കുന്നതാണ് ആദ്യ പദ്ധതി.

കടലിൽനിന്ന് ശേഖരിക്കുന്ന മണൽ നിറച്ച വലിയ സിന്തറ്റിക് ജിയോ-ടെക്സ്റ്റൈൽ ട്യൂബുകളാണ് ഇതിനായി ഉപയോഗിക്കുന്നത്. ഏകദേശം 200 മീറ്റർ നീളത്തിൽ, ഇടയിൽ 100 മീറ്റർ ഒഴിച്ചിട്ടുകൊണ്ട് 3 ജിയോ ട്യൂബുകളാണ് ഇവിടെ സ്ഥാപിക്കാൻ ലക്ഷ്യമിട്ടിരുന്നത്.

ഇതിന്റെ ഒരു കിലോമീറ്റർ പരിധിയിലെ രണ്ടു വശങ്ങളിലായി ചെറിയ പുലിമുട്ടുകളും നിർമ്മിക്കാൻ തീരുമാനിച്ചിരുന്നു. ജിയോ ട്യൂബുകൾ വെള്ളത്തിനടിയിൽ ഒരു കടൽഭിത്തിയെ പോലെ പ്രവർത്തിച്ച് തിരമാലകളുടെ വേഗതയും ശക്തിയും ഗണ്യമായി കുറയ്ക്കും.

തിരകളുടെ ശക്തി കുറയുന്നതിലൂടെ മണൽ സ്വാഭാവികമായി തീരത്തടിയുകയും അതുവഴി അപകടാവസ്ഥ പൂർണ്ണമായി ഇല്ലാതാവുകയും ചെയ്യും. 2013-ൽ ഈ പദ്ധതിക്ക് 10 കോടി രൂപയാണ് ചെലവ് കണക്കാക്കിയിരുന്നത്.

ഒരു വർഷം കൊണ്ട് ബീച്ചിന്റെ കുത്തനെയുള്ള ചരിവ് ക്രമീകരിക്കാനായിരുന്നു ലക്ഷ്യം. സംസ്ഥാന തീരദേശ വികസന കോർപറേഷനും (കെഎസ്‌സിഎഡിസി) ചെന്നൈ ഐഐടിയും ചേർന്ന് നടത്തിയ പഠനത്തിന്റെ അടിസ്ഥാനത്തിലാണ് ഈ വിശദമായ പദ്ധതി റിപ്പോർട്ട് തയ്യാറാക്കിയത്.

എന്നാൽ ഇതിൽ യാതൊന്നും തന്നെ യാഥാർത്ഥ്യമായില്ല. തീരസംരക്ഷണത്തിന് പുലിമുട്ട് മുണ്ടയ്ക്കൽ പാപനാശനം മുതൽ ബീച്ച് വരെയുള്ള വെടിക്കുന്ന് ഭാഗത്ത് പുലിമുട്ട് നിർമ്മിച്ചാൽ ഈ പ്രദേശത്തെ രൂക്ഷമായ കടലാക്രമണം ഒരുപരിധി വരെ കുറയ്ക്കാൻ സാധിക്കുമെന്നാണ് വിലയിരുത്തപ്പെടുന്നത്.

60 മീറ്റർ നീളമുള്ള രണ്ട് പുലിമുട്ടുകളും 30 മീറ്റർ നീളമുള്ള നാല് പുലിമുട്ടുകളുമാണ് ഈ പദ്ധതിയിൽ ഉൾപ്പെടുത്തിയിരിക്കുന്നത്. ഈ പുലിമുട്ടുകൾ ടെട്രാപോഡുകൾ ഉപയോഗിച്ച് സുരക്ഷിതമായി ആവരണം ചെയ്യും.

9.8 കോടി രൂപയുടെ ഈ പദ്ധതിക്ക് 2024-ൽ ഔദ്യോഗിക അനുമതി ലഭിച്ചിരുന്നെങ്കിലും ഇതുവരെയും നിർമ്മാണ പ്രവർത്തനങ്ങൾ ആരംഭിച്ചിട്ടില്ല. വിപുലമായ ബീച്ചും വർദ്ധിച്ച അപകടങ്ങളും പഴയതുപോലെയല്ല ഇന്നത്തെ കൊല്ലം ബീച്ച്.

ഇതിന്റെ നീളവും ഇവിടെയെത്തുന്ന ജനത്തിരക്കും ഒരുപോലെ വർദ്ധിച്ചിട്ടുണ്ട്. അവധി ദിവസങ്ങളിലും വിശേഷ ദിവസങ്ങളിലും ആയിരക്കണക്കിന് ആളുകളാണ് ഇവിടെയെത്തുന്നത്.

മുൻപ് ബീച്ചിന് 700 മീറ്റർ മാത്രം നീളമുണ്ടായിരുന്ന സ്ഥാനത്ത് ഇപ്പോൾ അത് ഒന്നര കിലോമീറ്ററോളമായി വളർന്നിരിക്കുന്നു. പരമ്പരാഗതമായി മത്സ്യത്തൊഴിലാളികൾ കമ്പവല വലിക്കുന്ന സ്ഥലങ്ങളിൽ പോലും സന്ദർശകരുടെ വലിയ തിരക്കാണ് അനുഭവപ്പെടുന്നത്.

എന്നാൽ പണ്ടേയുള്ള ആ 700 മീറ്റർ ചുറ്റളവിലാണ് പ്രധാനമായും ലൈഫ് ഗാർഡുകളെ വിന്യസിപ്പിച്ചിരിക്കുന്നത്. സന്ദർശകർ കടലിൽ ഇറങ്ങാതിരിക്കാൻ ഈ ഭാഗത്ത് വടം കെട്ടി കർശന നിയന്ത്രണവും ഏർപ്പെടുത്തിയിട്ടുണ്ട്.

എങ്കിലും വിനോദത്തിനായി എത്തുന്നവർ ഈ സുരക്ഷാ മേഖലയ്ക്ക് അപ്പുറത്തേക്ക് പോയി കടലിൽ ഇറങ്ങുന്നത് പതിവുകാഴ്ചയാണ്. ഇവിടെയെങ്ങാനും ആരെങ്കിലും അപകടത്തിൽപെട്ടാൽ ലൈഫ് ഗാർഡുകൾക്ക് അവിടെയെത്താൻ വളരെയധികം സമയം വേണ്ടിവരും.

മണലിലൂടെ അരകിലോമീറ്ററിലധികം ദൂരം ഓടിയെത്തേണ്ട അവസ്ഥയാണ് നിലവിലുള്ളത്.

ഇത്തരം സന്ദർഭങ്ങളിൽ മത്സ്യത്തൊഴിലാളികളുടെ സഹായമാണ് പലപ്പോഴും ജീവൻ രക്ഷിക്കുന്നത്. ജീവനക്കാരുടെ കുറവും ദുരിതങ്ങളും പതിനായിരത്തോളം സന്ദർശകർ ദിവസേനയെത്തുന്ന ബീച്ചിൽ ആകെ ഡ്യൂട്ടിക്കുള്ളത് ദിവസവേതനാടിസ്ഥാനത്തിൽ ജോലി ചെയ്യുന്ന നാല് ലൈഫ് ഗാർഡുകൾ മാത്രമാണ്.

ആകെ എട്ട് പേരുടെ തസ്തികയുണ്ടെങ്കിലും ഒന്നിടവിട്ട ദിവസങ്ങളിൽ നാല് പേർക്ക് വീതമാണ് ഡ്യൂട്ടി നൽകിയിട്ടുള്ളത്.

രാവിലെ 7 മുതൽ വൈകിട്ട് 7 വരെയാണ് ഇവർക്ക് ജോലി സമയം നിശ്ചയിച്ചിട്ടുള്ളത്. ജീവൻ പണയംവെച്ചാണ് ഇവർ ഈ സേവനം നൽകുന്നത് എങ്കിലും യാതൊരുവിധ ഇൻഷുറൻസ് പരിരക്ഷയും ഇവർക്ക് ഏർപ്പെടുത്തിയിട്ടില്ല.

അസുഖംമൂലമോ അതല്ലെങ്കിൽ രക്ഷാപ്രവർത്തനത്തിനിടയിൽ പരിക്കേറ്റോ ജോടിക്കു ഹാജരാകാൻ കഴിഞ്ഞില്ലെങ്കിൽ ആ ദിവസത്തെ വേതനം പോലും ഇവർക്ക് ലഭിക്കില്ല. ചില സന്ദർഭങ്ങളിൽ ഡ്യൂട്ടിയിലുള്ള ലൈഫ് ഗാർഡുകൾക്ക് സന്ദർശകരുടെ ഭാഗത്തുനിന്ന് മർദ്ദനമേൽക്കേണ്ടി വന്നിട്ടുണ്ടെന്നും ഗുരുതരമായ പരാതികൾ ഉയരുന്നുണ്ട്.