മലയിൻകീഴ് കൊലപാതകം: കുഞ്ഞു ഇവാനയ്ക്ക് അന്ത്യാഞ്ജലി, അമ്മ ക്രിസ്റ്റി ആന്റണിയുടെ അറസ്റ്റ് രേഖപ്പെടുത്തി

മലയിൻകീഴ് മേഖലയെ നടുക്കിയ കൊലപാതകത്തിൽ ക്രൂരമായി കൊല്ലപ്പെട്ട ഒരു വയസ്സുകാരി ഇവാനയ്ക്ക് വികാരനിർഭരമായ യാത്രാമൊഴി.

വീടിനുള്ളിലെ മുറിയിൽ തീർത്ത കുടീരത്തിലാണ് പ്രിയപ്പെട്ടവരുടെ അന്ന എന്ന ഇവാന അന്ത്യനിദ്രയിലേക്ക് വടവാങ്ങിയത്. പോസ്റ്റ്മോർട്ടം നടപടികൾ പൂർത്തിയായി ഇന്നലെ വൈകിട്ട് അഞ്ച மணியോടെയാണ് മൃതദേഹം വിളവൂർക്കൽ പൊറ്റയിലെ വീട്ടിൽ എത്തിച്ചത്.

ചേതനയറ്റ കുഞ്ഞുമകളുമായി ആശുപത്രിയിൽ നിന്നും പിതാവ് അഭിജിത്ത് എത്തിയത് സങ്കടം നിറഞ്ഞ കാഴ്ചയായി മാറി. ആൾക്കൂട്ടത്തിനിടയിലൂടെ കൊണ്ടുവന്ന മൃതദേഹം വീട്ടുമുറ്റത്ത് സജ്ജീകരിച്ച കട്ടിലിൽ കിടത്തി.

വെള്ള ഫ്രോക്കിന് മുകളിലുണ്ടായിരുന്ന ചുവന്ന റോസാപ്പൂക്കളെക്കാൾ നിഷ്കളങ്കമായിരുന്നു ആ കുഞ്ഞു മുഖം. അന്തിമോപചാരം അർപ്പിക്കാനെത്തിയവരിൽ പലരുടെയും കണ്ണുകൾ നിറഞ്ഞൊഴുകി.

രാഷ്ട്രീയ-സാമൂഹിക രംഗത്തെ പ്രമുഖരും ജനപ്രതിനിധികളും ആദരാഞ്ജലി അർപ്പിക്കാനെത്തി. എം.ആർ.ബൈജു എംഎൽഎ, ജില്ലാ, ബ്ലോക്ക്, ഗ്രാമ പഞ്ചായത്തംഗങ്ങൾ തുടങ്ങിയവർ വീട്ടിലെത്തിയിരുന്നു.

പിതാവ് അഭിജിത്തിന്റെയും ബന്ധുക്കളുടെയും അന്ത്യചുംബനം ഏറ്റുവാങ്ങി വീടിനുള്ളിലെ അമ്മൂമ്മയുടെ കിടപ്പുമുറിയിലെ മൂന്നടി മണ്ണിലേക്ക് ഇവാന മടങ്ങി. എന്നാൽ ഇതിന് എതിർവശത്ത് അടച്ചുപൂട്ടിയ നിലയിലുള്ള ആ മുറി ഈ ദുരന്തത്തിന് സാക്ഷിയായി നിന്നു; അമ്മയുടെ കൈകളാൽ കുഞ്ഞു ഇവാന ക്രൂരമായി മുറിവേറ്റ് കിടന്ന സ്വന്തം കിടപ്പുമുറിയായിരുന്നു അത്.

അമ്മയുടെ അറസ്റ്റ് രേഖപ്പെടുത്തി ഒരു വയസ്സുള്ള കുഞ്ഞിനെ കഴുത്തറത്തു കൊലപ്പെടുത്തിയ കേസിൽ മാതാവിന്റെ അറസ്റ്റ് ഔദ്യോഗികമായി രേഖപ്പെടുത്തി. വിളവൂർക്കൽ പൊറ്റയിൽ പുലവന്നിയൂർക്കോണം കിഴക്കുംകര പുത്തൻവീട്ടിൽ ക്രിസ്റ്റി ആന്റണിയെയാണ് (29) മലയിൻകീഴ് പോലീസ് അറസ്റ്റ് ചെയ്തത്.

സംഭവത്തിനു ശേഷം ജീവനൊടുക്കാൻ ശ്രമിച്ച ക്രിസ്റ്റി നിലവിൽ മെഡിക്കൽ കോളജ് ആശുപത്രിയിൽ ചികിത്സയിലാണ്. മജിസ്ട്രേട്ട് ആശുപത്രിയിലെത്തി പ്രതിയെ റിമാൻഡ് ചെയ്തെങ്കിലും, ശാരീരിക അവശതകൾ ഉള്ളതിനാൽ മൂന്ന് ദിവസം കൂടി ആശുപത്രിയിൽ തുടരണമെന്നാണ് ഡോക്ടർമാരുടെ നിർദേശം.

ഇതിനുശേഷമാകും ജയിലിലേക്ക് മാറ്റുക. കഴിഞ്ഞ വ്യാഴാഴ്ച വൈകിട്ടാണ് നാടിനെ ഞെട്ടിച്ച ഈ ദാരുണ സംഭവം അരങ്ങേറിയത്.

ഭർത്താവ് അഭിജിത്തും മാതാപിതാക്കളും വീട്ടിലില്ലാത്ത സമയത്താണ് കിടപ്പുമുറിയിൽ വെച്ച് ക്രിസ്റ്റി സ്വന്തം മകൾ ഇവാനയെ കൊലപ്പെടുത്തിയത്. സംഭവസ്ഥലമായ വിളവൂർക്കൽ പൊറ്റയിലെ വീട്ടിൽ ഫൊറൻസിക് സംഘം പരിശോധന നടത്തി.

കുഞ്ഞിനെ ആക്രമിക്കാൻ ഉപയോഗിച്ച കത്തി കിടപ്പുമുറിയിൽ നിന്ന് കണ്ടെടുത്തിട്ടുണ്ട്. ഭർത്താവിനും ബന്ധുക്കൾക്കും തന്നോടുള്ള സംശയവും അകൽച്ചയുമാണ് കൊലപാതകത്തിലേക്കും ആത്മഹത്യാ ശ്രമത്തിലേക്കും നയിച്ചതെന്ന മൊഴിയിൽ പ്രതി ഉറച്ചുനിൽക്കുന്നതായി പോലീസ് വ്യക്തമാക്കി.

സംഭവത്തിൽ മറ്റാർക്കും പങ്കില്ലെന്നാണ് പ്രാഥമിക നിഗമനം. കഴുത്തിലേറ്റ ആഴത്തിലുള്ള മുറിവാണ് കുഞ്ഞിന്റെ മരണകാരണമായതെന്ന് പോസ്റ്റ്മോർട്ടത്തിനു ശേഷം ഡോക്ടർമാർ പോലീസിനെ അറിയിച്ചു.