സംസ്ഥാനത്തെ സർക്കാർ ആശുപത്രികളിൽ മുഴുവൻ സമയ സ്പെഷ്യലിസ്റ്റ് സേവനം ഉറപ്പാക്കുന്നതുമായി ബന്ധപ്പെട്ട് സർക്കാരും ഡോക്ടർമാരുടെ സംഘടനയും തമ്മിൽ ധാരണയായി. ആരോഗ്യമന്ത്രിയുടെ നേതൃത്വത്തിൽ കെജിഎംഒഎയുമായി (KGMOA) നടത്തിയ നിർണായക ചർച്ചയിലാണ് ഈ സമവായത്തിലെത്തിയത്.
സ്പെഷ്യാലിറ്റി ഡോക്ടർമാരുടെ നിലവിലുള്ള ഒഴിവുകൾ വേഗത്തിൽ നികത്തുമെന്നും പ്രമോഷൻ നടപടികൾ വേഗത്തിലാക്കുമെന്നും സർക്കാർ ചർച്ചയിൽ ഉറപ്പുനൽകി. ജില്ലാ, ജനറൽ ആശുപത്രികളിൽ 24 മണിക്കൂർ സ്പെഷ്യലിസ്റ്റ് ഡോക്ടർമാരുടെ സേവനം ലഭ്യമാക്കാനുള്ള തീരുമാനത്തിൽ, ഒഴിവുകൾ നികത്തണമെന്നും കൂടുതൽ നിയമനങ്ങൾ നടത്തണമെന്നുമായിരുന്നു കെജിഎംഒഎയുടെ പ്രാരംഭ നിലപാട്.
എന്നാൽ, സിസ്റ്റത്തിനുള്ളിൽ തന്നെ ആവശ്യത്തിന് ഡോക്ടർമാർ ഉണ്ടെന്നും പ്രാഥമിക ആരോഗ്യകേന്ദ്രങ്ങളിൽ നിന്ന് സ്പെഷ്യലിസ്റ്റുകളെ പുനർവിന്യസിച്ച് പദ്ധതി നടപ്പാക്കാമെന്നുമായിരുന്നു സർക്കാർ നിലപാട്. ഇതിനെതിരെ സംഘടന എതിർപ്പ് പ്രകടിപ്പിച്ചിരുന്നു.
ഇതിന്റെ തുടർച്ചയായാണ് ആരോഗ്യ മന്ത്രി സംഘടനയുമായി ചർച്ച നടത്തിയത്. ചർച്ചയിലെ പ്രധാന തീരുമാനങ്ങൾ താഴെ പറയുന്നവയാണ്:
* പ്രാഥമിക ആരോഗ്യകേന്ദ്രങ്ങളിൽ നിന്ന് സ്പെഷ്യലിസ്റ്റ് ഡോക്ടർമാരെ പുനർവിന്യസിക്കുമ്പോൾ അവരോട് സമ്മതം തേടും.
* പുനർവിന്യസിക്കുന്ന സ്പെഷ്യലിസ്റ്റുകൾക്ക് പകരം മറ്റ് ഡോക്ടർമാരുടെ സേവനം ഉറപ്പാക്കും.
* പുനർവിന്യസിക്കുന്ന സ്പെഷ്യലിസ്റ്റുകൾക്ക് പ്രത്യേക അലവൻസ് വേണമെന്ന കെജിഎംഒഎയുടെ ആവശ്യം അനുഭാവപൂർവ്വം പരിഗണിക്കാമെന്ന് സർക്കാർ അറിയിച്ചു.
പ്രശ്നങ്ങൾക്ക് പരിഹാരമായതോടെ പുനലൂർ ആശുപത്രിയിൽ പദ്ധതി ഉടൻ തന്നെ പൂർണതോതിൽ പ്രവർത്തനക്ഷമമാകും. പുതിയ ക്രമീകരണപ്രകാരം ഓർത്തോ, ഗൈനക്കോളജി, പീഡിയാട്രിക്സ്, ജനറൽ മെഡിസിൻ, സർജറി എന്നീ വിഭാഗങ്ങളിൽ രാവിലെ 8 മുതൽ രാത്രി 8 വരെ മുഴുവൻ സമയവും ഓരോ സ്പെഷ്യലിസ്റ്റ് ഡോക്ടറുടെ സേവനം ലഭ്യമാകും.
കൂടാതെ രാത്രി 8 മുതൽ ഓൺ കോൾ ഡ്യൂട്ടിയുടെ അടിസ്ഥാനത്തിലും സ്പെഷ്യലിസ്റ്റ് സേവനം ഉറപ്പാക്കുമെന്ന് അധികൃതർ വ്യക്തമാക്കി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
