തൃക്കരിപ്പൂരിൽ തെരുവുനായ്ക്കളുടെ അക്രമം രൂക്ഷം; ജീവൻരക്ഷിക്കാൻ കടലിൽ ചാടിയും വീടുകളിൽ ഒതുങ്ങിയും ജനങ്ങൾ

കാസർഗോഡ് ജില്ലയിലെ തൃക്കരിപ്പൂർ മേഖലയിൽ തെരുവുനായ്ക്കളുടെ ശല്യം അതിരൂക്ഷമായതായി ജനങ്ങളുടെ പരാതി. സംഘം ചേർന്നെത്തുന്ന നായ്ക്കളുടെ ആക്രമണ ഭയത്തിൽ പുറത്തിറങ്ങാൻ കഴിയാത്ത അവസ്ഥയിലാണ് പ്രദേശവാസികൾ.

കുട്ടികൾക്ക് അവധിക്കാലത്ത് പോലും പുറത്തിറങ്ങി കളിക്കാൻ സാധിക്കാത്ത വിധം ഭീതിയുടെ നിഴലിലാണ് ഗ്രാമങ്ങൾ. കന്നുകാലികളെ മേയാൻ വിടാൻ കഴിയാതെ തൊഴുത്തുകളിൽ തന്നെ അടച്ചിടേണ്ട

ഗതികേടിലാണ് കർഷകർ. ബസ് സ്റ്റാൻഡുകൾ മുതൽ വിജനമായ ഇടവഴികൾ വരെ ഇപ്പോൾ തെരുവുനായ്ക്കളുടെ ആധിപത്യത്തിലാണ്.

മുൻകാലങ്ങളിൽ മനുഷ്യരെ കണ്ടാൽ ഓടിമറഞ്ഞിരുന്ന നായ്ക്കൾ, നിലവിൽ ജനക്കൂട്ടത്തിന് നേരെ പോലും ആക്രമണത്തിന് ചാടിവീഴുന്ന സ്ഥിതിയുണ്ട്. കടലോര പ്രദേശമായ വലിയപറമ്പിൽ കഴിഞ്ഞ ദിവസങ്ങളിൽ രണ്ട് കുട്ടികൾക്കാണ് തെരുവുനായ്ക്കളുടെ ക്രൂരമായ ആക്രമണത്തിന് ഇരയാകേണ്ടി വന്നത്.

ചില ദിവസങ്ങൾക്ക് മുൻപ് വലിയപറമ്പിൽ വച്ച് തെരുവുനായ്ക്കളുടെ സംഘത്തിൽ നിന്നും രക്ഷപ്പെടാൻ ശ്രമിക്കുന്നതിനിടെ ഒരു പെൺകുട്ടിക്ക് ജീവൻരക്ഷിക്കാൻ കടലിൽ ചാടേണ്ടി വന്നു. ഈ വഴി കടന്നുപോയ ഒരു പ്രദേശവാസിയാണ് കുട്ടിയെ പരിക്കുകളോടെ രക്ഷപ്പെടുത്തിയത്.

ഏകദേശം രണ്ട് പതിറ്റാണ്ടു മുൻപ് വരെ തെരുവുനായ്ക്കളുടെ ശല്യമില്ലാത്ത ശാന്തമായ പ്രദേശമായിരുന്നു വലിയപറമ്പ്. ആടുകളെയും കോഴികളെയും വളർത്തി ജീവിച്ചിരുന്ന ഒട്ടനവധി കുടുംബങ്ങൾ നായ്ക്കളുടെ ആക്രമണം കാരണം ഈ മേഖലയിൽ നിന്നും പിന്മാറി.

കൂടുകൾ തകർത്ത് വളർത്തുമൃഗങ്ങളെ കൊന്നൊടുക്കുന്നത് പതിവായതോടെയാണ് പലരും ഉപജീവനമാർഗ്ഗം മാറ്റേണ്ടി വന്നത്. വീട്ടുമുറ്റങ്ങളിൽ പോലും നായ്ക്കൾ സ്വൈരവിഹാരം നടത്തുന്നതിനാൽ കുട്ടികളുടെ സുരക്ഷ ഉറപ്പാക്കാൻ മാതാപിതാക്കൾ നിരന്തരം നിരീക്ഷിക്കേണ്ട

അവസ്ഥയാണ്. തെരുവുനായ്ക്കളുടെ പെരുപ്പം ശാസ്ത്രീയമായി തടയുന്നതിനുള്ള എബിസി (ആനിമൽ ബർത്ത് കൺട്രോൾ) കേന്ദ്രങ്ങൾ പലയിടത്തും പ്രവർത്തനരഹിതമായി കിടക്കുന്നതാണ് നായ്ക്കളുടെ എണ്ണം ഇത്രയധികം വർദ്ധിക്കാൻ കാരണം.

ഫണ്ടുകളുടെ ലഭ്യതക്കുറവാണ് പ്രതിരോധ പ്രവർത്തനങ്ങൾക്ക് പ്രധാന തടസ്സമായി ചൂണ്ടിക്കാണിക്കപ്പെടുന്നത്. നായ്ക്കളെ പിടികൂടി വന്ധ്യംകരണവും വാക്സിനേഷനും നൽകി തിരികെ അതേ സ്ഥലത്ത് തന്നെ തുറന്നുവിടുന്ന പദ്ധതി ഒരു കാലത്ത് ഏറെ ഗുണം ചെയ്തിരുന്നു.

തൃക്കരിപ്പൂരിൽ എബിസി കേന്ദ്രം നിലവിലുണ്ടെങ്കിലും ആവശ്യത്തിന് ഫണ്ടോ മതിയായ കൂടുകളോ ഇല്ലാത്തത് കാരണം ഇത് പ്രവർത്തിക്കുന്നില്ല. ജില്ലാ പഞ്ചായത്താണ് ഇതിനായി ഫണ്ട് അനുവദിക്കേണ്ടത്.

2023ൽ തൃക്കരിപ്പൂരിലെ കേന്ദ്രത്തിന്റെ നവീകരണത്തിനായി 10 ലക്ഷം രൂപ അനുവദിച്ചിരുന്നുവെങ്കിലും അടിസ്ഥാന സൗകര്യങ്ങളുടെ കുറവ് പദ്ധതിയുടെ പ്രവർത്തനങ്ങളെ സ്തംഭിപ്പിച്ചു. ജില്ലയിലെ നിലവിലുള്ള എബിസി കേന്ദ്രങ്ങൾ കൂടുതൽ വിപുലീകരിക്കുന്നതിനുള്ള നടപടികൾ ഉടൻ സ്വീകരിക്കുമെന്ന് ജില്ലാ പഞ്ചായത്ത് സ്ഥിരസമിതി ചെയർപഴ്സൻ എം.മനു വ്യക്തമാക്കി.