സാമ്പത്തിക യുദ്ധം പ്രഖ്യാപിച്ചാൽ അമേരിക്കൻ ക്യാമ്പുകൾ ആക്രമിക്കുമെന്ന് ഇറാന്‍റെ മുന്നറിയിപ്പ്; ഒമാനുമായി ചർച്ച നടത്തി

മേഖലയിൽ സാമ്പത്തിക യുദ്ധം ആരംഭിച്ചാൽ അമേരിക്കയുടെ സൈനിക ക്യാമ്പുകൾ ലക്ഷ്യമിട്ട് ആക്രമണം നടത്തുമെന്ന് ഇറാൻ മുന്നറിയിപ്പ് നൽകി. സാമ്പത്തിക യുദ്ധത്തിൽ മറ്റ് രാജ്യങ്ങൾ പങ്കാളികളാകരുതെന്ന് ടെഹ്‌റാൻ വ്യക്തമാക്കി.

പേർഷ്യൻ ഗൾഫ് മേഖല വഴി ഒരു തുള്ളി എണ്ണ പോലും പുറത്തേക്ക് കടക്കില്ലെന്നും, എല്ലാ എണ്ണ കയറ്റുമതി മാർഗങ്ങളും പൂർണ്ണമായി തടയുമെന്നും ഇറാൻ ഭീഷണി മുഴക്കിയിട്ടുണ്ട്. ടെഹ്‌റാൻ കേന്ദ്രീകരിച്ച് പുറത്തുവരുന്ന റിപ്പോർട്ടുകൾ പ്രകാരം വലിയൊരു പ്രതിസന്ധിയുടെ സൂചനയാണ് മേഖലയിൽ നിലവിലുള്ളത്.

ഈ പശ്ചാത്തലത്തിൽ, സമാധാന ചർച്ചകൾ പുനരാരംഭിക്കാനുള്ള സാദ്ധ്യതകൾ തേടി ഇറാനും പാകിസ്ഥാനും തമ്മിൽ കൂടിയാലോചനകൾ നടക്കുന്നുണ്ട്. അമേരിക്ക സാമ്പത്തിക യുദ്ധം പ്രഖ്യാപിച്ചതിന് പിന്നാലെ, സമാധാന ചർച്ചകൾ വീണ്ടും ആരംഭിക്കാനുള്ള വഴികളെക്കുറിച്ച് ഒമാനും ഇറാനും തമ്മിലും ചർച്ചകൾ നടന്നു.

ഇരു രാഷ്ട്രങ്ങളുടെയും വിദേശകാര്യ മന്ത്രിമാർ ടെലിഫോണിലൂടെയാണ് ആശയവിനിമയം നടത്തിയത്. ചർച്ചകൾ പുനരാരംഭിക്കുന്നതിനുള്ള അനുകൂല സാഹചര്യങ്ങൾ വിലയിരുത്തിയതായി ഒമാനും ഇറാനും ഔദ്യോഗികമായി സ്ഥിരീകരിച്ചു.

തന്ത്രപ്രധാനമായ ഹോർമുസ് കടലിടുക്കിലെ നാവിക ഗതാഗതവും ചർച്ചാവിഷയമായി. എല്ലാ കക്ഷികളുടെയും താൽപര്യങ്ങൾ സംരക്ഷിച്ചുകൊണ്ട് സമാധാനപരമായ ഒരു പരിഹാരത്തിലെത്താനാണ് ശ്രമിക്കുന്നതെന്ന് ഒമാൻ വിദേശകാര്യ മന്ത്രാലയം വ്യക്തമാക്കി.

നിലവിലെ സാഹചര്യത്തിൽ നയതന്ത്ര ചർച്ചകൾ തുടരേണ്ടത് അനിവാര്യമാണെന്ന് ഇരു രാജ്യങ്ങളുടെയും നേതാക്കൾ അടിവരയിട്ടു പറഞ്ഞു. ഒമാൻ വിദേശകാര്യ മന്ത്രി ബദർ അൽ ബുസൈദിയും ഇറാൻ വിദേശകാര്യ മന്ത്രി സയ്യിദ് അബ്ബാസ് അരാഗ്ച്ചിയുമാണ് നിർണ്ണായകമായ ഈ ടെലിഫോൺ ചർച്ചകൾ നടത്തിയത്.