തെന്നിന്ത്യൻ സിനിമാലോകത്തെ പ്രതിഭയായ മുതിർന്ന നടി സൗകാർ ജാനകി (94) അന്തരിച്ചു. ചെന്നൈയിൽ ആയിരുന്നു അന്ത്യം.
വാർധക്യസഹജമായ അസുഖങ്ങളെ തുടർന്ന് ചികിത്സയിൽ കഴിയുകയായിരുന്നു അവർ. നടികർ സംഘം പ്രസിഡന്റാണ് വിയോഗവാർത്ത പുറത്തുവിട്ടത്.
തെലുങ്ക്, തമിഴ്, മലയാളം, കന്നഡ തുടങ്ങിയ വിവിധ ഭാഷകളിലായി നാനൂറിലധികം സിനിമകളിൽ അവർ അഭിനയിച്ചിട്ടുണ്ട്. മലയാളത്തിൽ മമ്മൂട്ടി നായകനായ ‘സൂര്യമാനസം’ എന്ന ചിത്രത്തിൽ അദ്ദേഹത്തിന്റെ അമ്മയായി വേഷമിട്ട് സൗകാർ ജാനകി മലയാളികളുടെ പ്രിയങ്കരിയായി മാറി.
ഈ ചിത്രത്തിലെ പ്രകടനം ഏറെ പ്രേക്ഷക പ്രശംസ നേടിയിരുന്നു. രാജ്യത്തിന്റെ പരമോന്നത ബഹുമതികളിലൊന്നായ പത്മശ്രീയും കലൈമാമണി പുരസ്കാരവും നൽകി അവർ ആദരിക്കപ്പെട്ടിട്ടുണ്ട്.
1950-ൽ എൽ.വി. പ്രസാദ് സംവിധാനം ചെയ്ത തെലുങ്ക് ചലച്ചിത്രമായ ‘ഷാവുകരു’വിലൂടെയാണ് ജാനകി അഭിനയലോകത്തേക്ക് കടന്നുവരുന്നത്.
പിന്നീട് 1952-ൽ ‘വലയപതി’ എന്ന ചിത്രത്തിലൂടെ അവർ തമിഴ് സിനിമാരംഗത്തും അരങ്ങേറ്റം കുറിച്ചു. ചലച്ചിത്രങ്ങൾക്ക് പുറമേ മൂവായിരത്തിലധികം സ്റ്റേജ് നാടകങ്ങളിലും അഭിനയിച്ച പാരമ്പര്യമുള്ളയാളാണ് അന്തരിച്ച താരം.
