ഫുക്കറ്റിൽ നിന്നും ന്യൂഡൽഹിയിലേക്ക് സർവീസ് നടത്തിയ എയർ ഇന്ത്യ വിമാനം അന്തരീക്ഷത്തിലെ ആകാശച്ചുഴിയിൽപ്പെട്ട് പൊടുന്നനെ 300 അടി താഴേക്ക് പതിച്ച സംഭവത്തിന്റെ ഭീതിജനകമായ ദൃശ്യങ്ങൾ പുറത്തുവന്നു. തായ്ലൻഡിലെ ഫുക്കറ്റിൽ നിന്ന് ഓഗസ്റ്റ് 4-ന് രാവിലെ 8.41-ന് പുറപ്പെട്ട
എഐ2379 (എയർബസ് എ320 നിയോ) വിമാനമാണ് ഒഡീഷയ്ക്ക് മുകളിൽ വച്ച് വലിയ അപകടത്തിൽപ്പെട്ടത്. 137 യാത്രക്കാരും 8 ജീവനക്കാരുമാണ് സംഭവസമയത്ത് വിമാനത്തിൽ ഉണ്ടായിരുന്നത്.
അപ്രതീക്ഷിതമായുണ്ടായ ഈ അപകടത്തിൽ 13 യാത്രക്കാർക്കും 4 ജീവനക്കാർക്കും പരുക്കേറ്റു. ഇതിൽ ഒരാളുടെ ആരോഗ്യനില ഗുരുതരമാണെന്ന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) അറിയിച്ചു.
സംഭവത്തിൽ ഡിജിസിഎ ഔദ്യോഗിക അന്വേഷണം പ്രഖ്യാപിച്ചിട്ടുണ്ട്. അപകടത്തെത്തുടർന്ന് വിമാനം പിന്നീട് സുരക്ഷിതമായി ഡൽഹി വിമാനത്താവളത്തിൽ ലാൻഡ് ചെയ്തു.
ഏകദേശം 3 മിനിറ്റോളം നീണ്ടുനിന്ന അതിശക്തമായ കുലുക്കത്തിൽ വിമാനത്തിന്റെ കാബിൻ സീലിങ് തകരുകയും ലഗേജ് കാരിയറുകൾക്ക് കേടുപാടുകൾ സംഭവിക്കുകയും ചെയ്തു. ആകാശച്ചുഴിയിൽപ്പെട്ട
നിമിഷത്തിൽ യാത്രക്കാർ സീറ്റുകളിൽ നിന്ന് തെറിച്ച് ഉയരുകയും തല സീലിങ്ങിൽ ഇടിക്കുകയും ചെയ്തതായി ദൃക്സാക്ഷികൾ പറഞ്ഞു. “ദയവായി സീറ്റ് ബെൽറ്റുകൾ ഇടൂ.
ആരും എഴുന്നേൽക്കരുത്” എന്ന് ക്യാബിൻ ക്രൂ അംഗങ്ങൾ ഭയചകിതരായ യാത്രക്കാർക്ക് മുന്നറിയിപ്പ് നൽകുന്നത് പുറത്തുവന്ന 30 സെക്കൻഡ് ദൈർഘ്യമുള്ള വിഡിയോ ദൃശ്യങ്ങളിൽ കേൾക്കാം. യാത്രക്കാരിയായ മിൻചെൻ വിമാനത്തിനുള്ളിലെ ഭയാനകമായ അനുഭവം സോഷ്യൽ മീഡിയയിൽ പങ്കുവെച്ചു.
“എന്റെ ജീവിതത്തിലെ ഏറ്റവും ദുസ്സഹമായ രണ്ടു മണിക്കൂറുകളായിരുന്നു അത്. സീറ്റ് ബെൽറ്റ് ഇൻഡിക്കേറ്റർ ഓഫ് ആണെങ്കിൽ പോലും വിമാനത്തിൽ യാത്ര ചെയ്യുമ്പോൾ എപ്പോഴും സീറ്റ് ബെൽറ്റ് ധരിക്കാൻ ദയവായി ശ്രദ്ധിക്കുക.
ആളുകൾ വായുവിലേക്ക് തെറിച്ചു വീഴുന്നതും തലയിടിച്ച് പരുക്കേൽക്കുന്നതും ഞാൻ നേരിട്ട് കണ്ടു” എന്ന് അവർ കുറിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
