ജന്തർ മന്തർ പ്രതിഷേധത്തിനിടെ പ്രധാനമന്ത്രിക്കെതിരെ മോശം പരാമർശം: മകൾക്ക് പുതുജീവൻ നൽകിയെന്ന് മാതാവ്, കേസ് പിൻവലിക്കണമെന്ന് അഭ്യർത്ഥന

ന്യൂഡൽഹി: ജന്തർ മന്തറിൽ നടന്ന പ്രതിഷേധ പരിപാടിക്കിടെ പ്രധാനമന്ത്രി നരേന്ദ്ര മോദിക്കെതിരെ അധിക്ഷേപകരമായ ഭാഷ പ്രയോഗിച്ച സംഭവത്തിൽ, പ്രതിയായ കൗമാരക്കാരിയുടെ മാതാവ് പ്രതികരണവുമായി രംഗത്തെത്തി. മകളുടെ തെറ്റിനെതിരെ നിയമനടപടികൾ സ്വീകരിക്കുന്നതിന് പകരം മാപ്പ് നൽകാൻ തയ്യാറായ പ്രധാനമന്ത്രിയുടെ നടപടിയെ അവർ പ്രകീർത്തിച്ചു.

തന്റെ മകൾക്ക് പുതിയൊരു ജീവിതം ലഭിച്ചുവെന്ന് വിശേഷിപ്പിച്ച മാതാവ്, വീഡിയോ സന്ദേശത്തിലൂടെ പ്രധാനമന്ത്രിക്ക് നന്ദി അറിയിച്ചു. “പ്രധാനമന്ത്രി മോദി ഈ രാജ്യത്തിന്റെ രാജാവാണ്.

അദ്ദേഹത്തിന്റെ മുന്നിൽ ഞങ്ങൾ ഒന്നുമല്ല. തന്നെ ഇത്രയധികം വേദനിപ്പിച്ച പെൺകുട്ടിയോട് ക്ഷമിച്ച അദ്ദേഹം വളരെ മാന്യമായ കാര്യം ചെയ്തു.

കൂപ്പുകൈകളോടെ ഞാൻ അദ്ദേഹത്തിനു നന്ദി പറയുന്നു. ഇന്ന് എന്റെ മകളുടെ ജന്മദിനമാണ്, അവൾക്ക് ലഭിച്ച ഏറ്റവും വലിയ സമ്മാനം പ്രധാനമന്ത്രി മോദിയിൽ നിന്നാണ്.

അദ്ദേഹം അവൾക്ക് പുതുജീവൻ നൽകി. എന്റെ മകൾക്ക് ഇന്ന് ഒരു പുതിയ ജീവിതം ലഭിച്ചു” എന്ന് അവർ വ്യക്തമാക്കി.

മകളുടെ ഭാവിയെക്കരുതി തനിക്കെതിരെ ചുമത്തിയിരിക്കുന്ന കേസ് പിൻവലിക്കണമെന്നും മാതാവ് അഭ്യർത്ഥിച്ചു. സംഭവത്തിന് പിന്നാലെ കുടുംബം വലിയ തോതിലുള്ള സൈബർ ആക്രമണങ്ങൾക്ക് വിധേയരായെന്നും അവർ ചൂണ്ടിക്കാട്ടി.

കൂടാതെ, പതിനെട്ട് വയസ്സിൽ താഴെയുള്ളവർക്ക് ഇൻസ്റ്റഗ്രാം, ഫേസ്ബുക്ക് തുടങ്ങിയ സമൂഹമാധ്യമങ്ങളിൽ നിയന്ത്രണം ഏർപ്പെടുത്തണമെന്ന നിർദ്ദേശവും അവർ പ്രധാനമന്ത്രിക്ക് മുന്നിൽ വെച്ചു. സംഭവത്തിന്റെ പശ്ചാത്തലം:
ജന്തർ മന്തറിൽ സിജെപി നടത്തിയ പ്രതിഷേധത്തിനിടെയാണ് നോയിഡ സ്വദേശിയായ കൗമാരക്കാരി പ്രധാനമന്ത്രിക്കെതിരെ വിവാദപരമായ പരാമർശങ്ങൾ നടത്തിയത്.

ഈ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ പൊലീസ് കേസെടുക്കുകയായിരുന്നു. ഇതിനു പിന്നാലെ, തന്റേത് ഗുരുതരമായ തെറ്റാണെന്നും ഇത് തന്റെ ആദ്യത്തെയും അവസാനത്തെയും തെറ്റാണെന്നും വ്യക്തമാക്കി പെൺകുട്ടി വീഡിയോ സന്ദേശം പങ്കുവെച്ചിരുന്നു.

തന്റെ വീഡിയോയ്ക്ക് മറുപടിയായി, മോശമായി സംസാരിച്ച പെൺകുട്ടിയോട് താൻ ക്ഷമിക്കുന്നുവെന്ന് പ്രധാനമന്ത്രിയും പരസ്യമായി പ്രതികരിച്ചിരുന്നു.