ലണ്ടൻ നഗരത്തിൽ സാധാരണക്കാരനായി ശൈഖ് മുഹമ്മദ് ബിൻ റാഷിദ് അൽ മക്തൂം; വീഡിയോ വൈറൽ

ഔദ്യോഗിക തിരക്കുകളിൽ നിന്നും പൂർണ്ണമായും മാറിനിൽക്കുന്ന യുഎഇ ഭരണാധികാരിയുടെ പുതിയ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നു. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം ലണ്ടനിൽ സാധാരണക്കാരിലൊരാളായി സമയം ചെലവഴിക്കുന്നതിന്റെ ദൃശ്യങ്ങളാണ് ഇപ്പോൾ ശ്രദ്ധ നേടിയിരിക്കുന്നത്.

വേനൽ അവധിക്കാലത്തോടനുബന്ധിച്ച് ലണ്ടനിലെ പ്രശസ്തമായ ‘ഷാങ്ഹായ് മി’ റെസ്റ്റോറന്റിൽ ഉച്ചഭക്ഷണത്തിനെത്തിയപ്പോഴാണ് ഈ അപൂർവ്വ നിമിഷങ്ങൾ ക്യാമറയിൽ പതിഞ്ഞത്. അതികഠിനമായ ഔദ്യോഗിക പദവികളുടെ വട്ടങ്ങൾ ഒഴിവാക്കി വളരെ ലളിതമായ വേഷവിധാനത്തോടെയാണ് അദ്ദേഹം ഇവിടെയെത്തിയത്.

റെസ്റ്റോറന്റിലെത്തിയ അദ്ദേഹത്തിന് ജീവനക്കാരും മറ്റ് സന്ദർശകരും ചേർന്ന് ഊഷ്മളമായ സ്വീകരണമാണ് നൽകിയത്. സ്ഥാപനത്തിലെ ജീവനക്കാരെയും സഹയാത്രികരായ അതിഥികളെയും അദ്ദേഹം പ്രത്യേകമായി അഭിവാദ്യം ചെയ്തു.

റെസ്റ്റോറന്റിലേക്ക് പ്രവേശിക്കുന്നതിന് മുമ്പും ശേഷവും അവിടെയുണ്ടായിരുന്ന സാധാരണക്കാരുമായും ജീവനക്കാരോടും തികഞ്ഞ പുഞ്ചിരിയോടെ കുശലാന്വേഷണം നടത്താനും അവർക്കൊപ്പം ഫോട്ടോകൾക്ക് പോസ് ചെയ്യാനും ശൈഖ് മുഹമ്മദ് സമയം കണ്ടെത്തി. ലണ്ടനിലെ മേഫെയറിന്റെ ഹൃദയഭാഗത്തായി സ്ഥിതി ചെയ്യുന്ന ഷാങ്ഹായ് മി, മികച്ച പാൻ -ഏഷ്യൻ വിഭവങ്ങൾക്ക് ഏറെ പേരു കേട്ട

ഇടമാണ്. അദ്ദേഹത്തിന്റെ ഏറ്റവും പ്രിയപ്പെട്ട

ഭക്ഷണശാലകളിൽ ഒന്നാണിത്. ലണ്ടനിലെ ഈ ശാഖ കൂടാതെ ദുബായിലെ വിവിധ ഷാങ്ഹായ് മി ശാഖകളിലും അദ്ദേഹം മുൻപും പലതവണ സന്ദർശനം നടത്തിയിട്ടുണ്ട്.

ലോകമെമ്പാടുമുള്ള ഏറ്റവും ജനകീയരായ ഭരണാധികാരികളുടെ മുൻനിരയിലാണ് ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ സ്ഥാനം. ദുബായിലെ ഷോപ്പിംഗ് മാളുകളിലും മറ്റ് പൊതുസ്ഥലങ്ങളിലും സാധാരണക്കാരായ പ്രവാസികൾക്കും സ്വദേശികൾക്കുമൊപ്പം യാതൊരുവിധ സുരക്ഷാ വലയങ്ങളുടെയും അകമ്പിയില്ലാതെ അദ്ദേഹം ഇടപഴകുന്ന ചിത്രങ്ങളും ദൃശ്യങ്ങളും ഇതിനുമുൻപും പുറത്തുവന്നിട്ടുണ്ട്.

വേനൽക്കാല അവധിക്കായി വിദേശ രാജ്യങ്ങളിൽ എത്തുമ്പോഴും തികച്ചും സാധാരണക്കാരനായി ജനങ്ങൾക്കിടയിലേക്ക് ഇറങ്ങിച്ചെല്ലുന്ന അദ്ദേഹത്തിന്റെ ഈ ശൈലി പ്രവാസികൾ ഉൾപ്പെടെയുള്ളവർക്കിടയിൽ ഏറെ പ്രശംസ പിടിച്ചുപറ്റാറുണ്ട്.