ദില്ലിയില് നടന്ന പൊലീസ് അതിക്രമവുമായി ബന്ധപ്പെട്ട് കേന്ദ്ര ആഭ്യന്തര മന്ത്രി അമിത് ഷാ പ്രസ്താവന നടത്തണമെന്ന ആവശ്യത്തില് ഉറച്ചുനിന്ന് പ്രതിപക്ഷം ഇന്നും പാര്ലമെന്റില് പ്രതിഷേധം കടുപ്പിക്കും. രാജ്യസഭയില് നടന്ന പരീക്ഷാ ഭേദഗതി ബില് ചര്ച്ചയ്ക്കിടയിലും അമിത് ഷായുടെ രാജി ആവശ്യപ്പെട്ട് പ്രതിപക്ഷം പ്രതിഷേധം ശക്തമാക്കിയിരുന്നു.
എഫ്സിആര്എ അടക്കമുള്ള വരാനിരിക്കുന്ന സുപ്രധാന ബില്ലുകളുടെ ചര്ച്ചകളിലും ശക്തമായ പ്രതിഷേധം അറിയിക്കാനാണ് പ്രതിപക്ഷ കക്ഷികളുടെ തീരുമാനം. ഇന്നലെ പരീക്ഷാ ഭേദഗതി ബില്ലിന്മേലുള്ള ചർച്ചയോട് സഹകരിക്കാൻ പ്രതിപക്ഷം ആദ്യഘട്ടത്തില് തീരുമാനിച്ചിരുന്നു.
തുടര്ന്ന് രാജ്യസഭയിൽ മല്ലികാർജുന ഖാർഗെ അടക്കമുള്ളവരുടെ നേതൃത്വത്തിലുള്ള ചർച്ചകൾക്കിടെ വലിയ ബഹളമാണ് അരങ്ങേറിയത്. എന്നാല് ബില്ല് വോട്ടിനിടുന്നതിന് തൊട്ടുമുമ്പ് പ്രതിപക്ഷം ഒന്നടങ്കം സഭയില് നിന്ന് ഇറങ്ങിപ്പോയി.
എങ്കിലും ഡിഎംകെ സഭ പൂര്ണ്ണമായി ബഹിഷ്കരിക്കാന് തയ്യാറായില്ല. വോട്ടെടുപ്പിൽ പങ്കെടുത്ത ഡിഎംകെ അംഗങ്ങൾ ചില ഭേദഗതികളും നിര്ദ്ദേശിക്കുകയുണ്ടായി.
തുടര്ന്ന് കേന്ദ്രമന്ത്രി ജിതേന്ദ്ര സിങ് നല്കിയ മറുപടിക്ക് പിന്നാലെ, പ്രതിപക്ഷത്തിന്റെ അസാന്നിധ്യത്തിലാണ് പരീക്ഷാ ഭേദഗതി ബില്ല് രാജ്യസഭ പാസാക്കിയത്. ഈ ബില്ല് പാസായതിനെ സാമൂഹ്യമാധ്യമങ്ങളിലൂടെ പങ്കുവെച്ച വീഡിയോയിലൂടെ പ്രധാനമന്ത്രി നരേന്ദ്ര മോദി പ്രശംസിച്ചിരുന്നു.
ഇതിനിടയില്, ഇന്ന് കൂടുതല് നിയമനിര്മ്മാണ നടപടികള് സംബന്ധിച്ച ആലോചനകള് സര്ക്കാരിന്റെ ഭാഗത്തുനിന്നും ഉണ്ടാകുമെന്നാണ് ലഭിക്കുന്ന സൂചനകള്. ഇതിന്റെ ഭാഗമായി ഉച്ചയ്ക്ക് കേന്ദ്ര മന്ത്രിസഭാ യോഗം ചേരുന്നുണ്ട്.
അടുത്തയാഴ്ച ചില പ്രധാനപ്പെട്ട ബില്ലുകൾ കൂടി പാർലമെന്റിന്റെ പരിഗണനയ്ക്ക് കൊണ്ടുവരുമെന്ന് സര്ക്കാര് ഇതിനകം സൂചിപ്പിച്ചിട്ടുണ്ട്.
ഇതില് എഫ്സിആര്എ ബില്ലും ഉള്പ്പെടാനാണ് സാധ്യത. കൂടാതെ, മണ്ഡല പുനർനിർണയവുമായി ബന്ധപ്പെട്ടും വനിതാ സംവരണത്തിനുമുള്ള സുപ്രധാന ബില്ലുകൾ സര്ക്കാര് വീണ്ടും അവതരിപ്പിക്കുമോ എന്നതും രാഷ്ട്രീയ കേന്ദ്രങ്ങളില് ഉറ്റുനോക്കപ്പെടുന്നുണ്ട്.
എങ്കിലും ഡിഎംകെയുമായി ധാരണയിലെത്തിയാല് മാത്രമേ അത്തരം ബില്ലുകള് സുഗമമായി പാസാക്കാന് സര്ക്കാരിന് സാധിക്കൂ. മറുഭാഗത്ത്, ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ ബിജെപി അവകാശ ലംഘന നോട്ടീസ് നല്കിയിട്ടുണ്ട്.
ഈ വിഷയം സഭയില് കനത്ത ചര്ച്ചയാക്കണമെന്നും ഭരണപക്ഷം ആവശ്യപ്പെടും. സഭാ മര്യാദകള് ലംഘിച്ചു എന്ന് ചൂണ്ടിക്കാണിച്ചുകൊണ്ട് അനുരാഗ് താക്കൂർ ആണ് ഈ അവകാശ ലംഘന നോട്ടീസ് സമര്പ്പിച്ചിട്ടുള്ളത്.
ദില്ലിയിലെ പൊലീസ് നടപടിയും അയോധ്യ സംഭാവനക്കൊള്ളയും അടക്കമുള്ള വിഷയങ്ങള് ഉന്നയിച്ച് ഇന്ത്യ മുന്നണി അടിയന്തര പ്രമേയത്തിന് നോട്ടീസും നല്കിയിട്ടുണ്ട്. മറ്റൊരു സംഭവത്തില്, കോക്റോച്ച് ജനത പാർട്ടി (സിജെപി) സമരവുമായി ബന്ധപ്പെട്ട് രജിസ്റ്റര് ചെയ്ത 13 കേസുകൾ ദില്ലി സര്ക്കാര് പിന്വലിച്ചിട്ടുണ്ട്.
ആകെ 15 എഫ്ഐആറുകളാണ് ഈ വിഷയത്തില് ദില്ലി പൊലീസ് രജിസ്റ്റര് ചെയ്തിരുന്നത്. എന്നാല് ക്രിമിനൽ പശ്ചാത്തലമുള്ള വ്യക്തികള്ക്കെതിരെയുള്ള അന്വേഷണം തുടരുമെന്ന് അധികൃതര് അറിയിച്ചു.
ഇതിനിടെ, സമരത്തിനിടയില് പ്രധാനമന്ത്രിയെ അധിക്ഷേപിച്ചുവെന്നാരോപിച്ച് ഫരീദാബാദ് സ്വദേശിനിയായ ഒരു യുവതിക്കെതിരെയും പുതിയ കേസ് രജിസ്റ്റർ ചെയ്തിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
