ഹരിയാനയിൽ നിർണായക മന്ത്രിസഭാ തീരുമാനങ്ങൾ; ഇവി വാഹനങ്ങൾക്ക് നികുതിയിളവും അഗ്നിവീരർക്ക് സംവരണവും

ചണ്ഡീഗഡ്: ഹരിയാനയിൽ മുഖ്യമന്ത്രി നയാബ് സിംഗ് സൈനിയുടെ നേതൃത്വത്തിലുള്ള സർക്കാർ ഒട്ടനവധി സുപ്രധാന പ്രഖ്യാപനങ്ങൾ നടത്തി. സംസ്ഥാനത്തെ മന്ത്രിസഭായോഗമാണ് ജനക്ഷേമകരവും പുരോഗമനാത്മകവുമായ ഈ തീരുമാനങ്ങൾക്ക് അംഗീകാരം നൽകിയത്.

ഇലക്ട്രിക്, ഹൈബ്രിഡ് വാഹനങ്ങൾക്ക് സമ്പൂർണ നികുതിയിളവ് പ്രഖ്യാപിച്ചതോടൊപ്പം, അഗ്നിപഥ് പദ്ധതി പൂർത്തിയാക്കുന്നവർക്ക് സർക്കാർ സർവീസിൽ സംവരണം ഏർപ്പെടുത്താനും തീരുമാനമായിട്ടുണ്ട്. സംസ്ഥാനത്ത് പരിസ്ഥിതി സൗഹൃദ ഗതാഗതം പ്രോത്സാഹിപ്പിക്കുന്നതിന്റെ ഭാഗമായി, 30 ലക്ഷം രൂപ വരെ വിലവരുന്ന ഇലക്ട്രിക്, ഹൈബ്രിഡ് വാഹനങ്ങൾ വാങ്ങുമ്പോൾ മോട്ടോർ വാഹന നികുതി പൂർണമായും ഒഴിവാക്കും.

ഔദ്യോഗിക വിജ്ഞാപനം പുറത്തുവരുന്ന തീയതി മുതൽ തന്നെ ഈ പുതിയ നയം പ്രാബല്യത്തിൽ വരും. തൊഴിൽ മേഖലയിലും സുപ്രധാന ചുവടുവെപ്പുകളാണ് സർക്കാർ നടത്തിയിരിക്കുന്നത്.

നാല് വർഷത്തെ സേവനം പൂർത്തിയാക്കി മടങ്ങിയെത്തുന്ന അഗ്നിവീരർക്ക് ഗ്രൂപ്പ് സി, ഡി തസ്തികകളിലെ നേരിട്ടുള്ള നിയമനങ്ങളിൽ 20 ശതമാനം സംവരണം അനുവദിക്കാൻ മന്ത്രിസഭ തീരുമാനിച്ചു. രാജ്യത്തിനായി സേവനം അനുഷ്ഠിച്ചെത്തുന്ന യുവാക്കളുടെ തൊഴിൽ സുരക്ഷ ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.

കൂടാതെ, ഗ്രാമങ്ങളിലെ ‘മുസ്തർക്ക മൽകാൻ’ ഭൂമിയിലും, മുനിസിപ്പൽ-മുനിസിപ്പൽ കോർപ്പറേഷൻ പ്രദേശങ്ങളിലും 20 വർഷത്തിലേറെയായി താമസിച്ചുപോരുന്നവർക്ക് ഉടമസ്ഥാവകാശം നൽകാൻ മന്ത്രിസഭ പച്ചക്കൊടി കാട്ടി. ഇതിനായി ഹരിയാന ലാൻഡ് റെവന്യൂ (ഭേദഗതി) ബിൽ 2024-ന് അംഗീകാരം നൽകിയിട്ടുണ്ട്.

വിദ്യാഭ്യാസ രംഗത്ത് വലിയ കുതിച്ചുചാട്ട ലക്ഷ്യമിട്ടുകൊണ്ട് പുതിയ സർവകലാശാലകളും കേന്ദ്രങ്ങളും സ്ഥാപിക്കാനും തീരുമാനമായി.

റെവാരി ജില്ലയിൽ പുതിയ സംസ്ഥാന സർവകലാശാല സ്ഥാപിക്കുന്നതാണ് ഇതിൽ പ്രധാനം. കുരുക്ഷേത്രയിലെ ശ്രീ കൃഷ്ണ ആയുഷ് സർവകലാശാലയുടെ പ്രാദേശിക കേന്ദ്രം പഞ്ച്കുള ജില്ലയിലെ ഫേദുപൂർ ഗ്രാമത്തിലും, കൈതാലിലെ മഹർഷി വാൽമീകി സംസ്‌കൃത സർവകലാശാലയുടെ കീഴിലുള്ള ഗുരുകുൽ വിദ്യാപീഠം സോനിപതിലെ മറ്റിൻഡു ഗ്രാമത്തിലും ആരംഭിക്കും.

ഹരിയാന രജിസ്ട്രേഷൻ ആൻഡ് റെഗുലേഷൻ ഓഫ് ട്രാവൽ ഏജന്റ്സ് ബിൽ 2024, ഹരിയാന സ്റ്റേറ്റ് പ്രോസിക്യൂഷൻ (ഗ്രൂപ്പ് ബി) സർവീസ് (ഭേദഗതി) റൂൾസ് 2024 എന്നിവയ്ക്കും യോഗം അനുമതി നൽകി.