രാജ്യത്ത് പോളിമർ കറൻസി നോട്ടുകൾ വരുന്നു; 10, 20 രൂപയുടെ പ്ലാസ്റ്റിക് നോട്ടുകൾ പരീക്ഷണാടിസ്ഥാനത്തിൽ പുറത്തിറക്കാൻ കേന്ദ്ര അനുമതി

രാജ്യത്ത് 10, 20 രൂപ മൂല്യമുള്ള പോളിമർ അഥവാ പ്ലാസ്റ്റിക് കറൻസി നോട്ടുകൾ പരീക്ഷണാടിസ്ഥാനത്തിൽ വിപണിയിലെത്തിക്കാൻ കേന്ദ്രസർക്കാർ അനുമതി നൽകി. ആദ്യഘട്ടത്തിൽ 10, 20 രൂപ വിഭാഗങ്ങളിലായി 100 കോടി വീതം പ്ലാസ്റ്റിക് നോട്ടുകൾ പുറത്തിറക്കാനാണ് തീരുമാനം.

ലോക്‌സഭയിൽ എഴുതി നൽകിയ മറുപടിയിലൂടെ കേന്ദ്ര ധനകാര്യ സഹമന്ത്രി പങ്കജ് ചൗധരി ആണ് ഈ നിർണ്ണായക വിവരം ഔദ്യോഗികമായി സ്ഥിരീകരിച്ചത്. ആകെ 3,000 കോടി രൂപയുടെ നോട്ടുകളാണ് ഈ പദ്ധതിയുടെ ഭാഗമായി വിപണിയിലെത്തിക്കുന്നത്.

നിലവിലുള്ള പേപ്പർ നോട്ടുകൾക്കൊപ്പം സമാന്തരമായിട്ടായിരിക്കും പുതിയ പ്ലാസ്റ്റിക് നോട്ടുകളുടെ പ്രചാരണം. സാധാരണ പേപ്പർ നോട്ടുകൾ പൂർണ്ണമായി പിൻവലിക്കാൻ നിലവിൽ സർക്കാരിന്റെ ഭാഗത്തുനിന്ന് തീരുമാനമൊന്നും എടുത്തിട്ടില്ലെന്നും അധികൃതർ വ്യക്തമാക്കിയിട്ടുണ്ട്.

ഓസ്‌ട്രേലിയ, ബ്രിട്ടൻ, കാനഡ, തായ്‌ലൻഡ്, സിംഗപ്പൂർ തുടങ്ങി ലോകത്തെ 60-ഓളം രാജ്യങ്ങളിൽ പോളിമർ നോട്ടുകൾ ഇതിനോടകം തന്നെ വിജയകരമായി ഉപയോഗിച്ചുവരുന്നുണ്ട്. 1988-ൽ ഓസ്‌ട്രേലിയയാണ് ലോകത്ത് ആദ്യമായി ഇത്തരം നോട്ടുകൾ അവതരിപ്പിച്ചത്.

പരീക്ഷണ ഘട്ടത്തിന്റെ വിജയവും പോരായ്മകളും വിലയിരുത്തിയ ശേഷം ഇന്ത്യയിലുടനീളം ഇവ വ്യാപിപ്പിക്കുന്ന കാര്യത്തിൽ റിസർവ് ബാങ്ക് അന്തിമ തീരുമാനം കൈക്കൊള്ളും. എന്തുകൊണ്ട് പോളിമർ നോട്ടുകൾ? * ആയുസും കൂടുതൽ ഈടും: സാധാരണ പേപ്പർ നോട്ടുകളെ അപേക്ഷിച്ച് പോളിമർ നോട്ടുകൾക്ക് രണ്ടുമുതൽ ആറിരട്ടി വരെ അധിക ആയുസുണ്ട്.

കൈമാറ്റം ചെയ്യപ്പെടുമ്പോൾ പെട്ടെന്ന് കീറിപ്പോകില്ലെന്നതും വെള്ളത്തിലും ഈർപ്പത്തിലും നശിക്കില്ലെന്നതും ഇവയുടെ പ്രധാന പ്രത്യേകതയാണ്.
* പ്രിന്റിംഗ് ചിലവ് കുറയ്ക്കാം: പ്ലാസ്റ്റിക് നോട്ട് നിർമ്മിക്കാൻ ആദ്യഘട്ടത്തിൽ ചിലവ് കൂടുതലാണെങ്കിലും, വർഷങ്ങളോളം കേടുകൂടാതെ നിൽക്കുന്നതിനാൽ വീണ്ടും അച്ചടിക്കേണ്ടി വരുന്ന തുകയും വിതരണച്ചിലവും വൻതോതിൽ ലാഭിക്കാൻ സാധിക്കും.
* ഇക്കോ ഫ്രണ്ട്ലി: അന്താരാഷ്ട്ര നാണയ നിധിയുടെ (IMF) പഠനപ്രകാരം, പ്ലാസ്റ്റിക് നോട്ടുകൾ ആഗോളതാപന സാധ്യത (Global Warming Potential) 32 ശതമാനവും നിർമ്മാണ ഊർജ്ജ ഉപഭോഗം 30 ശതമാനവും കുറയ്ക്കുന്നു.
* സുരക്ഷിതം, പുനരുപയോഗം: വ്യാജനോട്ടുകളുടെ വ്യാപനം തടയാൻ സഹായിക്കുന്ന അത്യാധുനിക സുരക്ഷാ ഫീച്ചറുകൾ ഇവയിൽ ഉൾപ്പെടുത്താൻ കഴിയും. കൂടാതെ, പഴകി നശിക്കുമ്പോൾ ഇവ റീസൈക്കിൾ ചെയ്ത് മറ്റ് പ്ലാസ്റ്റിക് ഉൽപ്പന്നങ്ങളാക്കി മാറ്റാനും സാധിക്കും.