ആദിമ പ്രപഞ്ചത്തിലെ ‘ചുവന്ന ഉരുളക്കിഴങ്ങ്’ ഗാലക്സിയെ നിയന്ത്രിക്കുന്ന അതിവലിപ്പമുള്ള ബ്ലാക്ക് ഹോൾ കണ്ടെത്തി

പ്രപഞ്ചത്തിന്റെ ശൈശവ ദശയിലുള്ള ഒരു വിചിത്ര ഗാലക്സിയെ സ്വാധീനിക്കുന്ന അതിവലിപ്പമുള്ള ബ്ലാക്ക് ഹോളിനെ ജ്യോതിശാസ്ത്രജ്ഞർ തിരിച്ചറിഞ്ഞു. ചന്ദ്ര എക്സ്-റേ ബഹിരാകാശ ദൂരദർശിനി ഉപയോഗിച്ച് നടത്തിയ നിരീക്ഷണങ്ങളിലാണ് ഔദ്യോഗികമായി എംക്യുഎൻ01 ജെ004131.9-493704 എന്നറിയപ്പെടുന്നതും, ശാസ്ത്രലോകത്ത് “ചുവന്ന ഉരുളക്കിഴങ്ങ്” (Red Potato) എന്ന് വിളിപ്പേരുള്ളതുമായ ഗാലക്സിയെക്കുറിച്ചുള്ള നിർണായക വിവരങ്ങൾ പുറത്തുവന്നത്.

ഭൂമിയിൽ നിന്ന് ഏകദേശം 1170 കോടി പ്രകാശവർഷം അകലെയാണ് ഈ പ്രപഞ്ച ഘടകം സ്ഥിതി ചെയ്യുന്നത്. പ്രപഞ്ചത്തിന് വെറും 200 കോടി വർഷം മാത്രം പ്രായമുണ്ടായിരുന്ന കാലഘട്ടത്തിലുള്ള ഈ ഗാലക്സിയെ ആദ്യം കണ്ടെത്തിയത് ജെയിംസ് വെബ് ബഹിരാകാശ ദൂരദർശിനിയാണ്.

ഇതിന്റെ അസാധാരണമായ രൂപമാണ് ‘റെഡ് പൊട്ടറ്റോ’ എന്ന പേര് ലഭിക്കാൻ കാരണമായത്. ആദ്യകാല പ്രപഞ്ചത്തിൽ ഗാലക്സികൾ രൂപപ്പെട്ട

വലിയ കോസ്‍മിക് ശൃംഖലയിലാണ് ഇത് നിലകൊള്ളുന്നത്. തണുത്തതും സാന്ദ്രവുമായ വാതകത്തിന്റെ ഒരു വലിയ ശേഖരത്തിനുള്ളിലാണ് ഈ ഗാലക്സി കാണപ്പെടുന്നത്.

സാധാരണയായി ഇത്തരം സാഹചര്യങ്ങളിൽ പുതിയ നക്ഷത്രങ്ങൾ വൻതോതിൽ രൂപപ്പെടേണ്ടതാണ്. എന്നാൽ പ്രതീക്ഷിച്ച രീതിയിലുള്ള നക്ഷത്ര രൂപീകരണം ഇവിടെ നടക്കുന്നില്ലെന്നതാണ് ശാസ്ത്രജ്ഞരെ അദ്ഭുതപ്പെടുത്തിയത്.

ഇതിന് കാരണം സമീപത്തുള്ള ഒരു അതിവലിപ്പമുള്ള തമോദ്വാരമാണെന്നാണ് പുതിയ പഠനം വ്യക്തമാക്കുന്നത്. ഈ തമോദ്വാരത്തിൽ നിന്ന് പുറപ്പെടുന്ന ശക്തമായ ജെറ്റുകൾ ചുറ്റുമുള്ള വാതകത്തെ ഇളക്കിമറിക്കുകയും ചൂടാക്കുകയും ചെയ്യുന്നു.

ഇതുമൂലം വാതകം തണുത്ത് ചുരുങ്ങാനും പുതിയ നക്ഷത്രങ്ങൾ രൂപപ്പെടാനും കഴിയാതെ വരുന്നു. “നക്ഷത്രങ്ങൾ നമ്മൾ പ്രതീക്ഷിച്ച രീതിയിൽ രൂപപ്പെടുന്നില്ല.

അതിന്റെ കാരണം അന്വേഷിച്ചപ്പോഴാണ് ഈ കോസ്‍മിക് അടുക്കളയിൽ ഒരു പാചകക്കാരൻ ഉണ്ടാകാമെന്ന് കണ്ടെത്തിയത്,” എന്ന് മിലാൻ-ബിക്കോക്ക സർവകലാശാലയിലെ ഗവേഷകനായ വെയ്‌ചെൻ വാങ് വ്യക്തമാക്കി. ഏകദേശം രണ്ട് ലക്ഷം പ്രകാശവർഷം അകലെയുള്ള മറ്റൊരു ഗാലക്സിയിലാണ് ഈ തമോദ്വാരം സ്ഥിതി ചെയ്യുന്നത്.

അതേസമയം, ആ ഗാലക്സിയിൽ സജീവമായി പുതിയ നക്ഷത്രങ്ങൾ രൂപപ്പെടുന്നുമുണ്ട്. തമോദ്വാരത്തിന്റെ ജെറ്റുകൾ ‘റെഡ് പൊട്ടറ്റോ’ ഗാലക്സിയിലെ വാതകത്തെ നിരന്തരം ഇളക്കുകയാണെങ്കിൽ, പുതിയ നക്ഷത്രങ്ങൾ രൂപപ്പെടാൻ ആവശ്യമായ വസ്‍തുക്കൾ ലഭിക്കുന്ന വേഗത കുറയുമെന്ന് ഗവേഷകർ വിലയിരുത്തുന്നു.

നക്ഷത്ര രൂപീകരണം കുറഞ്ഞ ഗാലക്സികൾക്ക് ചുറ്റുമുള്ള വാതകങ്ങളുടെ സ്വഭാവം പഠിക്കുന്ന ആദ്യകാല ഗവേഷണങ്ങളിൽ ഒന്നാണിത്. സമീപ ഗാലക്സികൾ പരസ്പരം എങ്ങനെ സ്വാധീനിക്കുകയും അവയുടെ വളർച്ചയെ മാറ്റുകയും ചെയ്യുന്നു എന്നതിനെക്കുറിച്ചുള്ള കൂടുതൽ വിവരങ്ങൾ ഈ കണ്ടെത്തൽ നൽകുമെന്നാണ് പ്രതീക്ഷിക്കുന്നത്.

“ഈ ഗാലക്സി വലിയ ശാസ്ത്രീയ ചോദ്യങ്ങൾക്ക് ഉത്തരം കണ്ടെത്താൻ സഹായിക്കുന്ന വിവരങ്ങളുടെ ചെറിയ അടയാളങ്ങൾ നൽകുകയാണ്,” എന്ന് ഗവേഷകൻ ആൻഡ്രിയ ട്രാവാസിയോ പറഞ്ഞു. ഈ സുപ്രധാന ഗവേഷണ ഫലങ്ങൾ ജൂലൈ 7ന് അസ്ട്രോണമി ആൻഡ് ആസ്ട്രോഫിസിക്സ് ജേണലിലാണ് പ്രസിദ്ധീകരിച്ചത്.