കുണ്ടറയിൽ വിദ്യാർഥികളെ കാണാതായ സംഭവവുമായി ബന്ധപ്പെട്ട് ചോദ്യം ചെയ്യാനായി പൊലീസ് കസ്റ്റഡിയിലെടുത്ത സ്വകാര്യ ബസ് ഡ്രൈവർ ചികിത്സയിലിരിക്കെ മരണപ്പെട്ട സംഭവത്തിൽ ഗുരുതര ആരോപണങ്ങൾ ഉയരുന്നു.
പൊലീസിന്റെ ക്രൂരമായ മർദനത്തെത്തുടർന്നാണ് മരണം സംഭവിച്ചതെന്നാണ് പ്രധാന ആരോപണം. ഈ പശ്ചാത്തലത്തിൽ വിഷയം ജില്ലാ ക്രൈംബ്രാഞ്ച് അന്വേഷിക്കുന്നതിന് സർക്കാർ ഔദ്യോഗികമായി ഉത്തരവിട്ടു.
പെരുമ്പുഴ കുളത്തിൻകര കടയിൽ വീട്ടിൽ സിയാദ് (36) ആണ് കഴിഞ്ഞ 24 നു തിരുവനന്തപുരം മെഡിക്കൽ കോളജ് ആശുപത്രിയിൽ വെച്ച് മരണമടഞ്ഞത്. കുണ്ടറ– കൊല്ലം റൂട്ടിലോടുന്ന സ്വകാര്യ ബസിലെ ഡ്രൈവറായിരുന്നു അദ്ദേഹം.
സിയാദിനെ പൊലീസ് ക്രൂരമായി മർദിച്ചുവെന്ന് വെളിപ്പെടുത്തുന്ന ശബ്ദസന്ദേശം അടുത്തിടെ വ്യാപകമായി പ്രചരിച്ചിരുന്നു. കഴിഞ്ഞ ജൂൺ 16നു സിയാദിന്റെ അയൽവാസികളും ഏഴാം ക്ലാസ് വിദ്യാർഥികളുമായ 2 കുട്ടികളെ കാണാതായതോടെയാണ് ഈ സംഭവവികാസങ്ങളുടെയെല്ലാം തുടക്കം.
തുടർന്ന് അന്വേഷണത്തിന്റെ ഭാഗമായി പൊലീസുകാർ എത്തിയപ്പോൾ, കുട്ടികളിൽ ഒരാളുടെ സഹോദരി സിയാദിനെതിരെ മൊഴി നൽകിയിരുന്നു. ഈ മൊഴിയുടെ അടിസ്ഥാനത്തിലാണ് അന്ന് അർധരാത്രിയോടെ സിയാദിനെ കസ്റ്റഡിയിലെടുത്തത്.
എന്നാൽ കുട്ടികളെ തൊട്ടടുത്ത ദിവസം തന്നെ കണ്ടെത്താൻ കഴിഞ്ഞതിനെ തുടർന്ന് സിയാദിനെ വിട്ടയക്കുകയും ചെയ്തിരുന്നു. തുടർന്ന് ശരീരത്തിന് അസ്വസ്ഥതകൾ അനുഭവപ്പെട്ടതിനെത്തുടർന്ന് ഈ മാസം 2നു സിയാദ് കുണ്ടറ താലൂക്കാശുപത്രിയിൽ ചികിത്സ തേടിയിരുന്നു.
എന്നാൽ രോഗം കൂടുതൽ ഗുരുതരമായതോടെ അദ്ദേഹത്തെ തിരുവനന്തപുരം മെഡിക്കൽ കോളജ് ആശുപത്രിയിലേക്ക് മാറ്റുകയായിരുന്നു. സിയാദിനെ കസ്റ്റഡിയിലെടുക്കാൻ എത്തിയ എസ്ഐ അതുൽ വസന്ത്, സിപിഒ എസ്.
ശ്രീജിത്ത് എന്നിവർ പൊലീസ് ജീപ്പിൽ വെച്ച് തന്നെ ക്രൂരമായി മർദിച്ചുവെന്നാണ് പുറത്തുവന്ന ശബ്ദസന്ദേശത്തിലുള്ളത്. അതേസമയം, ഈ സംഭവത്തിൽ തികച്ചും വ്യത്യസ്തമായ വിശദീകരണവുമായി പൊലീസും രംഗത്തെത്തിയിട്ടുണ്ട്.
ആശുപത്രികളിലെ ചികിത്സാ രേഖകളിലോ പോസ്റ്റ്മോർട്ടം വേളയിലോ ശരീരത്തിൽ മർദനമേറ്റതിന്റെയെന്ന രീതിയിലുള്ള യാതൊന്നും കണ്ടെത്താൻ കഴിഞ്ഞിട്ടില്ലെന്നാണ് പൊലീസ് വ്യക്തമാക്കുന്നത്. മഞ്ഞപ്പിത്തം മൂർഛിച്ചതും ശ്വാസകോശത്തിൽ നീർക്കെട്ട് ഉണ്ടായതുമാണ് മരണകാരണമെന്നാണ് പോസ്റ്റ്മോർട്ടത്തിന്റെ പ്രാഥമിക റിപ്പോർട്ടിൽ പറയുന്നതെന്നും പൊലീസ് വിശദീകരിക്കുന്നു.
