സ്മാർട്ട്ഫോൺ വിപണിയിൽ ആശങ്ക; പുതിയ ഫോൺ വാങ്ങുന്നതിൽ നിന്ന് പിൻവാങ്ങി ഉപയോക്താക്കൾ

പുതിയ സ്മാർട്ട്ഫോൺ ലോഞ്ചുകളും അഞ്ച് വർഷം മുൻപുള്ള ആകാംഷകളും ഇപ്പോൾ പഴയതുപോലെയല്ലെന്ന് റിപ്പോർട്ടുകൾ. മുൻകാലങ്ങളിൽ ഉണ്ടായിരുന്ന ആവേശമെല്ലാം ഇപ്പോൾ വിപണിയിൽ നിന്ന് അപ്രത്യക്ഷമായിക്കൊണ്ടിരിക്കുകയാണ്.

വിലവർദ്ധനവും പുതിയ സാങ്കേതികവിദ്യകളുടെ കാര്യത്തിലുള്ള കോസ്റ്റ് കട്ടിംഗും ഉപയോക്താക്കളെ ആശങ്കപ്പെടുത്തുന്ന പ്രധാന ഘടകങ്ങളായി മാറുന്നു. സ്മാർട്ട്ഫോൺ വ്യവസായത്തിൽ വരാനിരിക്കുന്ന മാറ്റങ്ങൾ പലതും വിപണിക്ക് അനുകൂലമല്ലെന്നതാണ് യാഥാർത്ഥ്യം.

അതിനാൽ തന്നെ നിർമ്മാതാക്കൾ ആവശ്യമായ വലിയൊരു മാറ്റം വരുത്തുന്നത് വരെ പുതിയ ഫോണുകൾ സ്വന്തമാക്കാൻ താൽപ്പര്യപ്പെടുന്നില്ലെന്ന നിലപാടിലാണ് ഉപയോക്താക്കളിൽ പലരും. സ്മാർട്ട്ഫോൺ നവീകരണ പ്രവർത്തനങ്ങളുടെ വേഗത സമീപകാലത്തായി കുറഞ്ഞിരുന്നു.

പ്രോസസ്സറുകളുടെ വേഗത വർഷം തോറും വർദ്ധിക്കുന്നുണ്ടെങ്കിലും, ഫ്ലാഗ്ഷിപ്പ് ഫോണുകൾ പോലും വേഗത കുറഞ്ഞ് പിന്നോട്ട് പോകുന്നു എന്ന തോന്നൽ ഇപ്പോൾ ഉപയോക്താക്കൾക്കില്ല. പ്രശസ്തമായ ഗൂഗിളിന്റെ ചിപ്പുകൾ പോലും ക്വാൽകോമിന്റെ മികച്ച ചിപ്പുകളേക്കാൾ വളരെ പിന്നിലാണെന്ന അഭിപ്രായമുണ്ടെങ്കിലും, ദൈനംദിന ഉപയോഗത്തിൽ അവയ്ക്ക് യാതൊരുവിധ വേഗതക്കുറവും അനുഭവപ്പെടുന്നില്ല.

ഡിസ്പ്ലേകളുടെ കാര്യമെടുത്താലും ബജറ്റ് ഫോണുകളിൽ പോലും മികച്ച റെസല്യൂഷനും ഹൈ റിഫ്രഷ് റേറ്റും നൽകാൻ കമ്പനികൾക്ക് സാധിക്കുന്നുണ്ട്. എന്നാൽ ഈ രംഗത്തെ വികസന പ്രവർത്തനങ്ങൾ ഇപ്പോൾ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയിലേക്ക് മാത്രമായി ചുരുങ്ങിക്കൊണ്ടിരിക്കുകയാണ്.

ഹാർഡ്‌വെയർ രംഗത്തെ നൂതനത്വങ്ങളുടെ കുറവ് പരിഹരിക്കാൻ കമ്പനികൾ ഇപ്പോൾ സോഫ്റ്റ്‌വെയറിനെയാണ് കൂടുതലായി ആശ്രയിക്കുന്നത്. പുതിയ ഫോണുകളുടെ പ്രധാന വിൽപ്പന ഘടകമായി എഐ സാങ്കേതികവിദ്യ മാറിക്കഴിഞ്ഞു.

എഐ ഫീച്ചറുകൾ മികച്ച രീതിയിൽ പ്രവർത്തിക്കണമെങ്കിൽ കൂടുതൽ റാമും ഫിസിക്കൽ സ്റ്റോറേജും ആവശ്യമാണ്. ഇത് ഘടകങ്ങളുടെ വില വർദ്ധിക്കുന്നതിനും മൊത്തത്തിലുള്ള ഇലക്ട്രോണിക്സ് വിപണിയിൽ വിലക്കയറ്റത്തിനും കാരണമാകുന്നുണ്ട്.

വിലക്കയറ്റം തടയാനായി ഫോണിന്റെ ഗുണനിലവാരം കുറയ്ക്കുകയോ അല്ലെങ്കിൽ വില ഉയർത്തുകയോ ചെയ്യുക എന്ന രണ്ട് വഴികളാണ് പ്രധാനമായും കമ്പനികൾക്ക് മുന്നിലുള്ളത്. സാംസങ് കമ്പനി പോലും അവരുടെ ഗാലക്സി എസ്27 ഡിവൈസുകൾക്കായി കുറഞ്ഞ ചിലവിലുള്ള ഡിസ്പ്ലേകൾ കണ്ടെത്താൻ ശ്രമങ്ങൾ നടത്തിയിട്ടുണ്ട്.

ഈ പ്രതിസന്ധികൾക്കിടയിലും പ്രതീക്ഷ നൽകുന്ന ഒരേയൊരു മേഖല ബാറ്ററിയുടെ സാങ്കേതികവിദ്യയാണ്. അമേരിക്കൻ ബ്രാൻഡുകൾ വർഷങ്ങളായി അവഗണിച്ച ബാട്ടറി രംഗത്ത് മാറ്റങ്ങൾ വരുത്തേണ്ട

സമയം അതിക്രമിച്ചിരിക്കുന്നു. സാംസങ് ഗാലക്സി എസ് അൾട്രാ ഫോണുകൾ 2020 ൽ അവതരിപ്പിച്ച അതേ 5,000mAh ബാറ്ററിയാണ് ഇപ്പോഴും ഉപയോഗിക്കുന്നത്.

സ്മാർട്ട്ഫോൺ ലോകത്ത് ആറ് വർഷം എന്നത് വളരെ നീണ്ട കാലയളവാണ്.

എന്നാൽ ചൈനീസ് കമ്പനികൾ ഈ രംഗത്ത് വലിയ മുന്നേറ്റങ്ങൾ നടത്തിക്കഴിഞ്ഞു. സാംസങ്ങിന്റെ ഗാലക്സി സെഡ് ഫോൾഡ് 8 അൾട്രാ ഫോണിൽ സിലിക്കൺ-കാർബൺ ബാറ്ററി ഉൾപ്പെടുത്തിയിരിക്കുന്നത് ഈ മാറ്റത്തിന്റെ തുടക്കമായാണ് വിലയിരുത്തപ്പെടുന്നത്.

പുതിയ ബാട്ടറി സാങ്കേതികവിദ്യകൾ വ്യാപകമാകുന്നതുവരെ പുതിയ ഫോണുകൾ വാങ്ങുന്നതിൽ അർത്ഥമില്ലെന്ന നിലപാടിലാണ് ഉപയോക്താക്കൾ.