കേന്ദ്ര മന്ത്രിസഭാ പുനഃസംഘടനയുമായി ബന്ധപ്പെട്ട് ഡൽഹിയിൽ തിരക്കിട്ട രാഷ്ട്രീയ നീക്കങ്ങൾ പുരോഗമിക്കുന്നതായി സൂചന.
സിജെപി സമരം തണുപ്പിക്കുന്നതിന്റെ ഭാഗമായി നിലവിലെ വിദ്യാഭ്യാസ മന്ത്രി ധർമേന്ദ്ര പ്രധാനിന് പകരം നിർമല സീതാരാമനെ പുതിയ വിദ്യാഭ്യാസ മന്ത്രിയാക്കാനുള്ള സാധ്യതകൾ പരിശോധിച്ചുവരികയാണ്. സമവായ ചർച്ചകളുടെ ഭാഗമായി നിരവധി നിർദേശങ്ങളാണ് പ്രധാനമന്ത്രി നരേന്ദ്ര മോദിയുടെ പരിഗണനയിലുള്ളത്.
സിജെപി സമരത്തെ തുടർന്ന് മുൻപ് നിശ്ചയിച്ചിരുന്ന മന്ത്രിസഭാ പുനഃസംഘടനയിൽ അവസാന ഘട്ട തിരുത്തലുകൾ വരുത്തേണ്ടി വന്നിട്ടുണ്ട്.
ഇതിൽ ഏറ്റവും പ്രധാനം ധർമേന്ദ്ര പ്രധാനിന്റെ വകുപ്പു മാറ്റമാണ്. നേരത്തെ മന്ത്രിമാരായ ധർമേന്ദ്ര പ്രധാനും പരിസ്ഥിതി മന്ത്രി ഭൂപേന്ദ്ര യാദവും സംഘടനാ പ്രവർത്തനങ്ങളിലേക്ക് തിരികെ പോകുമെന്നും മുൻ മന്ത്രി അനുരാഗ് ഠാക്കൂർ തിരിച്ചെത്തുമെന്നുമുള്ള സൂചനകൾ ഉണ്ടായിരുന്നു.
എന്നാൽ പ്രധാനയെ ഇപ്പോൾ മന്ത്രിസ്ഥാനത്തുനിന്ന് പൂർണ്ണമായി ഒഴിവാക്കുന്നത് സിജെപി സമരത്തിന് മുന്നിൽ സർക്കാർ മുട്ടുമടക്കിയെന്ന തെറ്റായ സന്ദേശം നൽകുമെന്ന ആശങ്ക പ്രധാനമന്ത്രിക്കുണ്ട്. അതിനാൽ അദ്ദേഹത്തിന്റെ മാറ്റം വകുപ്പുമാറ്റത്തിൽ മാത്രമായി ഒതുങ്ങിയേക്കാനാണ് സാധ്യത.
പുതിയ ബിജെപി അധ്യക്ഷൻ നിതിൻ നബീന്റെ സംഘടനാ ടീം രൂപവൽക്കരിക്കുന്നതിനും, എൻഡിഎ മുന്നണിയിലേക്ക് അടുത്തിടെ കടന്നുവന്ന കക്ഷികൾക്ക് മന്ത്രിസ്ഥാനം നൽകുന്നതിനുമാണ് പുനഃസംഘടന പ്രധാനമായും ലക്ഷ്യമിടുന്നത്. ഈ മാറ്റങ്ങളുടെ ഭാഗമായി മന്ത്രി ജോർജ് കുര്യൻ തന്റെ സ്ഥാനം ഒഴിഞ്ഞിരുന്നു.
കഴിഞ്ഞയാഴ്ച 17 ഉന്നത ഉദ്യോഗസ്ഥരെ മാറ്റി നിയമിച്ചത് ഈ പുനഃസംഘടനയ്ക്ക് മുന്നോടിയായുള്ള നടപടിയാണെന്നാണ് വിലയിരുത്തപ്പെടുന്നത്. ശക്തികാന്ത ദാസ് ധനമന്ത്രിയാകുമോ?
ധനമന്ത്രി സ്ഥാനത്തേക്ക് മുൻ ആർബിഐ ഗവർണർ ശക്തികാന്ത ദാസിന്റെ പേര് സജീവ പരിഗണനയിലുണ്ട്.
രഘുറാം രാജന് ശേഷം ആർബിഐ ഗവർണർ പദവി അലങ്കരിച്ച വ്യക്തിയാണ് ശക്തികാന്ത ദാസ്. ആ ചുമതല ഒഴിഞ്ഞ ശേഷം അദ്ദേഹം പ്രധാനമന്ത്രിയുടെ പ്രിൻസിപ്പൽ സെക്രട്ടറിയായി സേവനം അനുഷ്ഠിച്ചു വരികയാണ്.
മോദിയുടെ വിശ്വസ്തനും സാമ്പത്തിക കാര്യങ്ങളിൽ വിദഗ്ധനുമാണ് അദ്ദേഹം. അതേസമയം, വാണിജ്യ മന്ത്രി പീയൂഷ് ഗോയലിന്റെ പേരും ഈ സ്ഥാനത്തേക്ക് ചർച്ചയിലുണ്ട്.
അന്തരിച്ച മുൻ മന്ത്രി അരുൺ ജയ്റ്റ്ലിയുടെ വിയോഗത്തെ തുടർന്ന് മുൻപ് പീയൂഷ് ഗോയൽ ധനവകുപ്പിന്റെ അധിക ചുമതല വഹിച്ചിരുന്നു. മന്ത്രിസഭയിലേക്ക് എഎപിയിൽ നിന്നും അടുത്തിടെ എത്തിയ രാഘവ് ഛദ്ദ മന്ത്രിയാകാൻ സാധ്യതയുണ്ടെന്ന സൂചനകളുമുണ്ട്.
കൂടാതെ, ശിവസേന നേതാവും മഹാരാഷ്ട്ര ഉപമുഖ്യമന്ത്രിയുമായ ഏകനാഥ് ഷിൻഡെയുടെ മകൻ ഡോ. ശ്രീകാന്ത് ഷിൻഡെയും മന്ത്രിസഭയിൽ ഇടംനേടിയേക്കാം.
അടുത്തിടെ ഉദ്ധവ് താക്കറെ വിഭാഗത്തിൽനിന്ന് 6 പേരെ ഷിൻഡെയുടെ നേതൃത്വത്തിൽ എൻഡിഎയിലെത്തിച്ചിരുന്നു. ഒപ്പം ടിഎംസിയിൽ നിന്നും പാർട്ടിമാറി എത്തിയവർക്കും മന്ത്രിസ്ഥാനം ലഭിച്ചേക്കുമെന്ന് കരുതുന്നു.
ജെഡിയു നേതാവ് നിതീഷ് കുമാറിനും കൂടുതൽ പരിഗണന നൽകുന്നതും സർക്കാരിന്റെ പരിഗണനയിലുണ്ട്. അമിത് ഷാ ഉപപ്രധാനമന്ത്രിയാകുമോ?
പുനഃസംഘടനയുമായി ബന്ധപ്പെട്ട
ചർച്ചകളിൽ ഏറ്റവും പ്രധാനപ്പെട്ട ചർച്ചകളിൽ ഒന്ന് ഉപപ്രധാനമന്ത്രി പദവിയാണ്.
ആഭ്യന്തര മന്ത്രി അമിത് ഷാ ഉപപ്രധാനമന്ത്രിയാകുമെന്ന ഊഹാപോഹങ്ങൾ ഡൽഹി രാഷ്ട്രീയത്തിൽ ശക്തമാണ്. ഇത് യാഥാർത്ഥ്യമായാൽ അത് ബിജെപിയുടെ ഭാവി നേതൃനിരയിലേക്കുള്ള കൃത്യമായ ചൂണ്ടുപലകയായി മാറും.
ഈ വിഷയത്തിൽ ആർഎസ്എസിന്റെ നിലപാട് നിർണായകമായിരിക്കും. ബംഗാൾ പിടിച്ചെടുത്തതും ടിഎംസി, എഎപി തുടങ്ങിയ പ്രതിപക്ഷ പാർട്ടികളെ പിളർത്തിയതും പാർട്ടിയിൽ അമിത് ഷായുടെ സ്വാധീനം വലിയ തോതിൽ വർദ്ധിപ്പിച്ചിരുന്നു.
എന്നാൽ ഇതിനിടയിൽ അയോധ്യ സ്വർണക്കൊള്ളയുമായി ബന്ധപ്പെട്ട വാർത്തകൾ പുറത്തുവന്നത് ഈ നീക്കങ്ങളുടെ വേഗത കുറച്ചതായും റിപ്പോർട്ടുകൾ സൂചിപ്പിക്കുന്നു.
വാജ്പേയി സർക്കാരിന്റെ അവസാന വർഷങ്ങളിൽ മുതിർന്ന നേതാവ് എൽ.കെ. അഡ്വാനിയെ ഉപപ്രധാനമന്ത്രിയായി നിയമിച്ചിരുന്നു എന്നത് ഇവിടെ ശ്രദ്ധേയമാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
