തോട്ടയ്ക്കാട് ഇരവുചിറ വെട്ടിത്താനം വീട്ടിൽ താമസിക്കുന്ന വി.ജെ.ഫിലിപ്പിന്റെ യാത്രാസ്വാതന്ത്ര്യം മോട്ടർ വാഹന വകുപ്പിന്റെ പിടിപ്പുകേട് മൂലം പ്രതിസന്ധിയിലാകുന്നു. പോളിയോ ബാധിച്ചതിനെത്തുടർന്ന് വലതുകാലിന് സ്വാധീനക്കുറവുള്ള ഫിലിപ്പിന്, സ്വന്തമായി വാഹനം ഓടിക്കാനുള്ള അനുമതി ലഭിക്കുന്നതിനായി അധികൃതരെ സമീപിച്ചിട്ട് മാസങ്ങളായിട്ടും പരിഹാരമില്ല.
2007-ൽ ഡ്രൈവിങ് ലൈസൻസ് സ്വന്തമാക്കിയ ഫിലിപ്, ജലഅതോറിറ്റിയുടെ കോട്ടയം ഓഫിസിൽ ഉദ്യോഗസ്ഥനായിരുന്ന കാലയളവിൽ ചങ്ങനാശേരി ജോയിന്റ് ആർടി ഓഫിസിൽ റജിസ്റ്റർ ചെയ്ത രണ്ട് കാറുകൾ ഉപയോഗിച്ചിരുന്നു. കാലിന്റെ പരിമിതികൾക്കനുസരിച്ച് മാറ്റങ്ങൾ വരുത്തിയ ആ വാഹനങ്ങൾക്ക് അന്നൊക്കെ നിയമപരമായ ‘ഇൻവാലിഡ് ക്യാരേജ് സർട്ടിഫിക്കറ്റ്’ ലഭിച്ചിരുന്നു.
എന്നാൽ ഒരു വർഷം മുൻപ് പുതിയ കാർ വാങ്ങിയതോടെയാണ് പ്രശ്നങ്ങൾ തുടങ്ങിയത്. നിലവിലെ സർക്കാർ ഉത്തരവുകൾ പ്രകാരം, വലതുകാലിന് പരിമിതിയുള്ളവർക്ക് കാറിന്റെ ഇടതുവശത്ത് പ്രത്യേക ആക്സിലറേറ്റർ ഘടിപ്പിച്ച് വാഹനം ഓടിക്കാൻ അനുവാദമുണ്ട്.
ഈ നിയമപ്രകാരം വാഹനം ക്രമീകരിച്ച് സർട്ടിഫിക്കറ്റിനായി ചങ്ങനാശേരി ആർടി ഓഫിസിൽ അപേക്ഷ നൽകിയെങ്കിലും ഉദ്യോഗസ്ഥർ അത് നിഷേധിച്ചു. വാഹനം ഉയർന്ന കരുത്തുള്ളതാണെന്ന വിചിത്രമായ വാദമാണ് അധികൃതർ ഉയർത്തുന്നത്.
നേരത്തെ ഗതാഗത വകുപ്പ് മന്ത്രിക്കു പരാതി നൽകിയെങ്കിലും നടപടികൾ വൈകി. തുടർന്ന് ചാണ്ടി ഉമ്മൻ എംഎൽഎ മുഖേന പുതിയ ഗതാഗത വകുപ്പ് മന്ത്രിക്കും നിവേദനം സമർപ്പിച്ചിരുന്നു.
എങ്കിലും നിലവിലെ സാഹചര്യത്തിൽ ഒരു മാറ്റവും ഉണ്ടായിട്ടില്ല. നിലവിൽ സ്കൂട്ടറിൽ യാത്ര ചെയ്യുന്നത് ഫിലിപ്പിന്റെ ആരോഗ്യസ്ഥിതിയെ ഗുരുതരമായി ബാധിക്കുന്നുണ്ട്.
നീതിപൂർവമായ ഇടപെടലിലൂടെ യാത്രാപ്രതിസന്ധിക്ക് പരിഹാരം കാണുമെന്ന പ്രതീക്ഷയിലാണ് അദ്ദേഹം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
