നിയമസഭാ തിരഞ്ഞെടുപ്പ് പ്രചാരണ സാമഗ്രികളുടെ പേരിൽ ബിജെപിയിൽ വൻ സാമ്പത്തിക ക്രമക്കേടെന്ന് ആരോപണം

സംസ്ഥാന നിയമസഭാ തിരഞ്ഞെടുപ്പ് പ്രചാരണത്തിനായി പാർട്ടി പതാകകളും അനുബന്ധ സാമഗ്രികളും നിർമിച്ച വകയിൽ ബിജെപി സംസ്ഥാന സെക്രട്ടറി 31 ലക്ഷം രൂപ കമ്മിഷൻ കൈപ്പറ്റിയെന്ന വെളിപ്പെടുത്തലുമായി ശബ്ദരേഖ പുറത്ത്. പ്രചാരണ സാമഗ്രികൾ നിർമിച്ച കരാറുമായി ബന്ധപ്പെട്ട

ഇടനിലക്കാരനും പ്രചാരണ സമിതിയിൽ ഉൾപ്പെട്ട മറ്റൊരു നേതാവും തമ്മിലുള്ള സംഭാഷണമാണ് ഇപ്പോൾ ചർച്ചയായിരിക്കുന്നത്.

ആകെ 1.62 കോടി രൂപയുടെ കരാർ തുകയിൽ 31 ലക്ഷം രൂപ കമ്മിഷനായി നൽകണമെന്ന ധാരണയാണ് സെക്രട്ടറിയുമായി ഉണ്ടായിരുന്നതെന്ന് ശബ്ദരേഖയിൽ പറയുന്നു. കരാറുകാരന് ലഭിക്കാനുള്ള 4.65 ലക്ഷം രൂപ ബാക്കി നിൽക്കെ, സെക്രട്ടറി തുക മുഴുവൻ മുൻകൂറായി കൈപ്പറ്റുകയായിരുന്നു.

തിരഞ്ഞെടുപ്പിന് ശേഷം പണം നൽകാം എന്ന് ഉറപ്പുനൽകിയെങ്കിലും, നിലവിൽ സെക്രട്ടറി ഫോൺ കോളുകളോട് പ്രതികരിക്കുന്നില്ലെന്ന് ഇടനിലക്കാരൻ വെളിപ്പെടുത്തുന്നു. കമ്പനിക്ക് മറുപടി നൽകാൻ കഴിയാത്ത അവസ്ഥയിലാണെന്നും അദ്ദേഹം സംഭാഷണത്തിൽ സൂചിപ്പിക്കുന്നു.

ഈ വിഷയത്തിന് പുറമെ ബിജെപി സംസ്ഥാന ഘടകത്തിൽ 12 കോടിയോളം രൂപയുടെ തട്ടിപ്പ് നടന്നതായാണ് പുതിയ ആരോപണങ്ങൾ ഉയരുന്നത്. പ്രധാനപ്പെട്ട

ചില ക്രമക്കേടുകൾ താഴെ പറയുന്നവയാണ്: ∙ കേന്ദ്ര കമ്മിറ്റി സൗജന്യമായി നൽകിയ പതാകകളും തോരണങ്ങളും ഉണ്ടായിരുന്നിട്ടും, സമാനമായ സാമഗ്രികൾക്കായി 1.62 കോടി രൂപ ചെലവഴിച്ചു.
∙ പ്രചാരണ കട്ടൗട്ടുകൾ നൽകിയതിലൂടെ രണ്ട് വ്യക്തികൾ 5 ലക്ഷം രൂപ കമ്മിഷൻ കൈപ്പറ്റി.
∙ സൗജന്യമായി ലഭിച്ച പതാകകൾ സംസ്ഥാന നേതാവൊരാൾ നിയോജകമണ്ഡലം കമ്മിറ്റികൾക്ക് 2 ലക്ഷം രൂപയ്ക്ക് മറിച്ചുവിറ്റു.
∙ പ്രധാനമന്ത്രി നരേന്ദ്ര മോദി പങ്കെടുത്ത റോഡ് ഷോയുടെ പ്ലക്കാർഡ് നിർമാണത്തിൽ 8 ലക്ഷം രൂപയുടെ അഴിമതി നടന്നു.
∙ സമൂഹമാധ്യമ വിഭാഗത്തിൽ പ്രവർത്തിക്കുന്ന യുവ നേതാവ് അടുത്തിടെ 36 ലക്ഷം രൂപയുടെ വാഹനം വാങ്ങിയത് വിവാദമായിട്ടുണ്ട്.
∙ തിരുവനന്തപുരം ബേക്കറി ജംക്‌ഷനു സമീപമുള്ള ഹോട്ടലിൽ 30 മുറികൾ ബുക്ക് ചെയ്തെങ്കിലും, പകുതി മുറികൾ ഉപയോഗിക്കാതെ തന്നെ മുഴുവൻ വാടകയും നൽകി പണം തട്ടിയെടുത്തു.
∙ പ്രചാരണത്തിനായി വാടകയ്ക്കെടുത്ത വാഹനങ്ങളിൽ പകുതിയും ഉപയോഗിക്കാതെ മുഴുവൻ വാടകയും ഈടാക്കി കമ്മിഷൻ കൈപ്പറ്റിയതായും ആരോപണമുണ്ട്.