കൊച്ചിയിൽ കുരുമുളക് അവധി വ്യാപാരം പുനരാരംഭിച്ചു: എൻസിഡിഇഎക്സ് പുതിയ ചുവടുവെപ്പിലേക്ക്

ഒരു പതിറ്റാണ്ടിന്റെ ഇടവേളയ്ക്ക് ശേഷം കമോഡിറ്റി എക്സ്ചേഞ്ചായ എൻസിഡിഇഎക്സ് കുരുമുളകിന്റെ അവധി വ്യാപാരം ഔദ്യോഗികമായി പുനരാരംഭിച്ചു. സുഗന്ധവ്യഞ്ജന വ്യാപാരത്തിന്റെ പരമ്പരാഗത ആസ്ഥാനമായ കൊച്ചിയെ അടിസ്ഥാനമാക്കിയാണ് ഇനി വിലനിർണ്ണയവും വ്യാപാര നടപടികളും നടക്കുക.

ആഗോളതലത്തിൽ കുരുമുളകിന് നിലവിൽ അവധി വ്യാപാര സൗകര്യങ്ങൾ ലഭ്യമല്ലാത്ത സാഹചര്യത്തിലാണ് ഇന്ത്യയുടെ ഈ സുപ്രധാന നീക്കം. പ്രധാന വിവരങ്ങൾ
ഈ മാസം 15 മുതൽ പുതിയ കരാറുകൾ വിപണിയിൽ ലഭ്യമാകും.

ഫെബ്രുവരി ഒഴികെ വർഷത്തിലെ എല്ലാ മാസങ്ങളിലും കരാറുകൾ നിലവിലുണ്ടാകും. ഓഗസ്റ്റ്, സെപ്റ്റംബർ, ഒക്ടോബർ, നവംബർ മാസങ്ങളിൽ കാലാവധി തീരുന്ന കരാറുകളാണ് തുടക്കത്തിൽ ലഭ്യമാകുക.

വ്യാപാരത്തിനായി ഒരു മെട്രിക് ടൺ (1,000 കിലോഗ്രാം) ആണ് കുറഞ്ഞ അളവായി നിശ്ചയിച്ചിരിക്കുന്നത്. 10 പൈസയായിരിക്കും ടിക് സൈസ്.

കൊച്ചിയിൽ നിന്ന് 65 കിലോമീറ്റർ ചുറ്റളവിൽ ഇതിനായി പ്രത്യേക വെയർഹൗസ് സൗകര്യം സജ്ജീകരിക്കും. വിപണി സ്ഥിതിവിവരക്കണക്കുകൾ
ഇന്ത്യയുടെ ആകെ കുരുമുളക് ഉൽപാദനത്തിൽ 69.2 ശതമാനവുമായി കർണാടകയാണ് മുന്നിൽ.

കേരളത്തിന്റെ പങ്ക് 23.9 ശതമാനമാണ്. രാജ്യത്തെ ആകെ ഉൽപാദനം ഏകദേശം 60,000 മെട്രിക് ടണ്ണാണ്.

നിലവിൽ 25,000 മെട്രിക് ടൺ കുരുമുളക് ഇന്ത്യ ഇറക്കുമതി ചെയ്യുന്നുണ്ട്. ആഗോളതലത്തിൽ ഉൽപാദനം 6 ലക്ഷം മെട്രിക് ടണ്ണാണെന്നും, നിലവിൽ വിയറ്റ്നാമാണ് വില നിർണ്ണയത്തിൽ നിർണ്ണായക സ്വാധീനം ചെലുത്തുന്നതെന്നും എൻസിഡിഇഎക്സ് മാനേജിങ് ഡയറക്ടർ ഡോ.

അരുൺ രാസ്തെ വ്യക്തമാക്കി. ഭാവിയിൽ ഏലം, റബർ എന്നിവയിലും വ്യാപാരം ആരംഭിക്കാൻ പദ്ധതിയുണ്ടെന്നും അദ്ദേഹം കൂട്ടിച്ചേർത്തു.

ഹർ ഘർ ഇൻവെസ്റ്റർ ക്യാംപെയ്ൻ
സാധാരണക്കാരെയും ചെറുകിട സംരംഭകരെയും ലക്ഷ്യമിട്ട് ‘ഹർ ഘർ ഇൻവെസ്റ്റർ’ എന്ന പദ്ധതിക്കും കൊച്ചിയിൽ തുടക്കമായി.

‘ഇക്വിറ്റി ഫോർ ഭാരത്’ ദൗത്യത്തിന്റെ ഭാഗമായാണ് ഇത് നടപ്പിലാക്കുന്നത്. എൻസിഡിഇഎക്സിന്റെ വിശ്വാസ്യത ഇക്വിറ്റി വിപണിയിലേക്കും വ്യാപിപ്പിക്കുകയാണെന്ന് ചീഫ് ഓഫ് ഇക്വിറ്റി ടോജോ ബാനർജി പറഞ്ഞു.

ഇതിനായി മ്യൂച്വൽ ഫണ്ട് പ്ലാറ്റ്‌ഫോം സജ്ജമാക്കിയിട്ടുണ്ട്. സെബിയുടെ അനുമതിയോടെ ഇക്വിറ്റി, ഇക്വിറ്റി ഡെറിവേറ്റീവ്സ് മേഖലകളിലേക്കും പ്രവർത്തനങ്ങൾ വ്യാപിപ്പിക്കാനുള്ള തയ്യാറെടുപ്പിലാണ് സ്ഥാപനം.