ഓപ്പറേഷൻ തൂഫാൻ: ലഹരിക്കെതിരെ അതിർത്തികളിൽ അദൃശ്യ മതിൽ തീർക്കാൻ പൊലീസ്

സംസ്ഥാനത്തെ ലഹരി കടത്തിനും വിപണനത്തിനുമെതിരെ പൊലീസ് നടപ്പിലാക്കി വരുന്ന ഓപ്പറേഷൻ തൂഫാൻ–ദ് നാർക്കോ ഹണ്ട് നിർണായകമായ ഒരു ഘട്ടത്തിലൂടെയാണ് കടന്നുപോകുന്നത്. ലഹരി ശൃംഖലയിലെ താഴേത്തട്ടിലുള്ള കണ്ണികളെ തകർക്കാൻ സാധിച്ചുവെങ്കിലും, ഈ മാഫിയയുടെ വേരുകൾ ഇനിയും പൂർണ്ണമായി അറുത്തുമാറ്റാനുണ്ടെന്ന തിരിച്ചറിവിലാണ് അന്വേഷണ ഏജൻസികൾ.

കേരളീയ യുവത്വത്തെ ലക്ഷ്യമിട്ടുള്ള ലഹരി കടത്തിനെ പ്രതിരോധിക്കാൻ അതിർത്തികളിൽ കൂടുതൽ ശക്തമായ ഒരു സുരക്ഷാ സംവിധാനം അഥവാ അദൃശ്യമായ ഒരു ‘അണക്കെട്ട്’ തന്നെ നിർമിക്കാനാണ് പൊലീസിന്റെ തീരുമാനം. കഴിഞ്ഞ ഒരു മാസത്തെ പ്രവർത്തനങ്ങൾ
സംസ്ഥാനത്തേക്കുള്ള ലഹരിയുടെ കുത്തൊഴുക്ക് തടയാൻ യാതൊരു വിള്ളലുകളും ഇല്ലാത്ത ശക്തമായ പ്രതിരോധ സംവിധാനം രൂപപ്പെടുത്തുകയാണ് ഓപ്പറേഷന്റെ രണ്ടാംഘട്ട

ലക്ഷ്യം. ലഹരിയുടെ പ്രധാന വിതരണ കേന്ദ്രമായി മാറുന്ന കൊച്ചി നഗരം കേന്ദ്രീകരിച്ച് പ്രത്യേക നിരീക്ഷണം ഏർപ്പെടുത്തുമെന്ന് ഈ ഓപ്പറേഷന് നേതൃത്വം നൽകുന്ന ഉദ്യോഗസ്ഥർ വ്യക്തമാക്കി.

ലഹരി മാഫിയകൾ ട്രെയിനുകൾ, ലക്ഷ്വറി ബസുകൾ, ചരക്ക് ലോറികൾ എന്നിവയ്ക്ക് പുറമെ പാൽ, പച്ചക്കറി വാഹനങ്ങളെയും തങ്ങളുടെ ആവശ്യങ്ങൾക്കായി ദുരുപയോഗം ചെയ്യുന്നതായി കണ്ടെത്തിയിട്ടുണ്ട്. കുറിയർ സർവീസുകൾ വഴിയും, ശരീരഭാഗങ്ങളിൽ ഒളിപ്പിച്ചും ലഹരി കടത്തുന്ന പ്രവണത വർധിച്ചുവരികയാണ്.

ആഡംബര കാറുകളിൽ കടത്തുകയായിരുന്ന രാസലഹരി പിടികൂടിയതും, നഗരങ്ങളിലെ ഹോട്ടലുകളിൽ ലഹരി ഉപയോഗത്തിനായി മുറികൾ വാടകയ്ക്കെടുക്കുന്നതുമായ സംഭവങ്ങൾ പൊലീസ് വെളിപ്പെടുത്തുന്നു. വർക്ക് ഷോപ്പുകളിലേക്ക് വരുന്ന കുറിയർ പാക്കറ്റുകളിൽ കഞ്ചാവ് ഒളിപ്പിച്ചുകടത്താനുള്ള മാഫിയയുടെ ശ്രമം ഇത്തരത്തിൽ ലഭിച്ച രഹസ്യ വിവരത്തെത്തുടർന്ന് തകർക്കാൻ സാധിച്ചു.

ഉന്നത ഇടപെടലുകൾക്കുള്ള അന്ത്യം
ലഹരി മാഫിയയ്ക്ക് രാഷ്ട്രീയ പിൻബലമുണ്ടെന്ന ആരോപണങ്ങൾ തുടക്കത്തിൽ തന്നെ അന്വേഷണ ഉദ്യോഗസ്ഥർക്ക് ബോധ്യപ്പെട്ടിരുന്നു. പ്രതികളെ പിടികൂടുമ്പോൾ സ്റ്റേഷനുകളിലേക്ക് എത്തുന്ന ശുപാർശകളും, വിവിഐപികളുടെയും സിനിമാ മേഖലയിലെ പ്രമുഖരുടെയും ഇടപെടലുകളും അന്വേഷണത്തിന് തടസ്സമായി നിന്നിരുന്നു.

എന്നാൽ, ആഭ്യന്തരമന്ത്രിയുടെ നേരിട്ടുള്ള ഇടപെടലിനെത്തുടർന്ന് ഇത്തരം സമ്മർദ്ദങ്ങൾക്ക് വഴങ്ങേണ്ടതില്ലെന്ന കർശന നിർദേശം ഉദ്യോഗസ്ഥർക്ക് ലഭിച്ചത് പ്രവർത്തനങ്ങളിൽ വലിയ മാറ്റമുണ്ടാക്കി. രഹസ്യവിവരങ്ങൾ ചോരാതെ സൂക്ഷിക്കാൻ കഴിഞ്ഞതോടെയാണ് ലഹരി വിൽപനക്കാരുടെ വിവരങ്ങൾ പൊലീസിന് കൃത്യമായി ലഭിച്ചു തുടങ്ങിയത്.

തൂഫാൻ കെയർ പദ്ധതി
ലഹരി ഉപയോഗം തടയുന്നതിനായി വിവിധ വകുപ്പുകളെ ഏകോപിപ്പിച്ച് ബോധവൽക്കരണ പരിപാടികൾ ഊർജിതമാക്കിയിട്ടുണ്ട്. പൊലീസ്, എക്സൈസ്, ആരോഗ്യം, തദ്ദേശഭരണം തുടങ്ങിയ വകുപ്പുകളുടെ സംയുക്ത സഹകരണത്തോടെ ‘തൂഫാൻ വോറിയേഴ്സ്’, ‘തൂഫാൻ കെയർ’ എന്നീ പദ്ധതികൾ നടപ്പിലാക്കുന്നു.

വിദ്യാർഥികൾക്കും പൊതുജനങ്ങൾക്കും ശാസ്ത്രീയമായ കൗൺസലിങ്ങും പുനരധിവാസവും ലഭ്യമാക്കുകയാണ് ഇതിന്റെ ലക്ഷ്യം. ലഹരിയെക്കുറിച്ചുള്ള വിവരങ്ങൾ കൈമാറാൻ താഴെ പറയുന്ന നമ്പറുകളിൽ ബന്ധപ്പെടാവുന്നതാണ്:
തൂഫാൻ ഹെൽപ്പ് ലൈൻ: 94979 79794, 94979 27797
യോദ്ധാവ് വാട്സാപ് നമ്പർ: 99959 66666