സഹകരണ മേഖലയിൽ പുതിയ വിമാന സർവീസ്: ‘കോ-കേരളം’ പദ്ധതിക്ക് തുടക്കമാകുന്നു

കേരളത്തിൽ കുറഞ്ഞ ചെലവിൽ വേഗത്തിലുള്ള ആഭ്യന്തര വിമാന യാത്രകൾ ലക്ഷ്യമിട്ട് പുതിയ വിമാന കമ്പനി ആരംഭിക്കുന്നതിനുള്ള പ്രാരംഭ നടപടികൾ തുടങ്ങിയതായി എംവിആർ കാൻസർ സെന്റർ ആൻഡ് റിസർച് ഇൻസ്റ്റിറ്റ്യൂട്ട് ചെയർമാൻ സി.എൻ.വിജയകൃഷ്ണൻ അറിയിച്ചു. സഹകരണ മേഖലയുടെ പങ്കാളിത്തത്തോടെ ആരംഭിക്കുന്ന ഈ സംരംഭത്തിന് ‘കോ–കേരളം’ എന്നാണ് പേര് നൽകിയിരിക്കുന്നത്.

പ്രധാന സവിശേഷതകൾ
സിയാൽ (CIAL) മാതൃകയിൽ രൂപീകരിക്കുന്ന ഈ കമ്പനി, ആദ്യഘട്ടത്തിൽ രണ്ട് വിമാനങ്ങൾ പാട്ടത്തിനെടുത്താണ് പ്രവർത്തനം ആരംഭിക്കുക. നെടുമ്പാശേരി കേന്ദ്രീകരിച്ച് കരിപ്പൂർ, കണ്ണൂർ, മംഗളൂരു, ബെംഗളൂരു, ചെന്നൈ, കോയമ്പത്തൂർ, മധുര എന്നീ നഗരങ്ങളെ ബന്ധിപ്പിച്ചാകും സർവീസ്.

ഭാവിയിൽ വിമാനങ്ങളുടെ എണ്ണം നാലിൽ നിന്ന് ആറായി ഉയർത്താനും പദ്ധതിയുണ്ട്. ഭരണഘടനയും പ്രവർത്തനവും
സഹകരണ മേഖലയുടെ പൂർണ്ണ പിന്തുണയോടെ ആരംഭിക്കുന്ന പദ്ധതിയുടെ ചെയർമാനായി മുഖ്യമന്ത്രിയും വൈസ് ചെയർമാനായി സഹകരണ മന്ത്രിയും പ്രവർത്തിക്കും.

ഇതിനായി 200 സഹകരണ സംഘങ്ങൾ ചേർന്ന് ഓരോ സംഘവും രണ്ട് കോടി രൂപ വീതം നിക്ഷേപം സമാഹരിക്കും. നിലവിൽ സഹകരണ വകുപ്പും സർക്കാരും പദ്ധതിയിൽ അതീവ താൽപ്പര്യം പ്രകടിപ്പിച്ചിട്ടുണ്ടെന്നും, സർക്കാർ അനുമതി ലഭിക്കുന്നതോടെ അന്തിമ നടപടികളിലേക്ക് കടക്കുമെന്നും സി.എൻ.വിജയകൃഷ്ണൻ വ്യക്തമാക്കി.

ടിക്കറ്റ് നിരക്കും തൊഴിലവസരങ്ങളും
സാധാരണക്കാർക്ക് താങ്ങാവുന്ന നിരക്കിൽ, അതിവേഗ ട്രെയിനുകൾക്ക് സമാനമായ തുകയ്ക്ക് വിമാനയാത്ര സാധ്യമാക്കുകയാണ് പദ്ധതിയുടെ ലക്ഷ്യം. 3500 രൂപ മുതൽ 7000 രൂപ വരെയാകും ടിക്കറ്റ് നിരക്ക്.

യാത്ര പുറപ്പെടുന്നതിന് ഒരു മണിക്കൂർ മുൻപുവരെ ഒഴിവുള്ള സീറ്റുകൾ കുറഞ്ഞ നിരക്കിൽ ലഭ്യമാക്കുന്ന സംവിധാനവും ഇതിലുണ്ടാകും. കൂടാതെ, പദ്ധതിയുടെ ഭാഗമായി ഏവിയേഷൻ ഇൻസ്റ്റിറ്റ്യൂട്ട് ഉൾപ്പെടെയുള്ളവ സ്ഥാപിക്കുകയും ചെയ്യും.

ഈ സംരംഭത്തിലൂടെ ആദ്യഘട്ടത്തിൽ തന്നെ 200 പേർക്ക് തൊഴിൽ നൽകാൻ സാധിക്കും. ടൂറിസം വികസനം
വിനോദസഞ്ചാര മേഖലയ്ക്ക് കരുത്ത് പകരുന്നതിന്റെ ഭാഗമായി മൂന്നാർ, പത്തനംതിട്ട, വയനാട് എന്നിവിടങ്ങളിൽ ചെറിയ വിമാനത്താവളങ്ങൾ നിർമിക്കാനും അവിടങ്ങളിലേക്ക് സർവീസ് നടത്താനും ലക്ഷ്യമിടുന്നുണ്ടെന്ന് അദ്ദേഹം കൂട്ടിച്ചേർത്തു.