സിന്ധു നദീജല കരാർ: ഇന്ത്യയ്‌ക്കെതിരെ ഭീഷണിയുമായി പാക് മന്ത്രി മുസാദിക് മാലിക്

ഇന്ത്യയ്‌ക്കെതിരെ വീണ്ടും പ്രകോപനപരമായ പ്രസ്താവനയുമായി പാകിസ്ഥാന്‍റെ കാലാവസ്ഥാ വ്യതിയാന വകുപ്പ് മന്ത്രി മുസാദിക് മാലിക് രംഗത്തെത്തി. സിന്ധു നദീജല കരാർ പ്രകാരം പാകിസ്ഥാന് അവകാശപ്പെട്ട

ജലവിഹിതത്തിന്മേൽ അവകാശവാദം ഉന്നയിക്കുന്നവർക്ക് നേരെ ഗുരുതരമായ ഭീഷണിയാണ് അദ്ദേഹം മുഴക്കിയത്. സിന്ധു നദീജലവുമായി ബന്ധപ്പെട്ട് പാകിസ്ഥാൻ്റെ വിഹിതം തട്ടിയെടുക്കാൻ ശ്രമിക്കുന്നവരുടെ ‘കൈകൾ വെട്ടിമാറ്റും’ എന്ന് മന്ത്രി വാർത്താസമ്മേളനത്തിൽ പറഞ്ഞു.

2025-ൽ 25 പേരുടെ മരണത്തിനിടയാക്കിയ പഹൽഗാം ഭീകരാക്രമണത്തിന് പിന്നാലെ, പതിറ്റാണ്ടുകൾ പഴക്കമുള്ള സിന്ധു നദീജല കരാർ ഇന്ത്യ താൽക്കാലികമായി നിർത്തിവെച്ചിരുന്നു. ഈ തീരുമാനത്തിന് പിന്നാലെയാണ് പാക് മന്ത്രിയുടെ ഭാഗത്തുനിന്നും ഇത്തരമൊരു പ്രതികരണം ഉണ്ടായിരിക്കുന്നത്.

പാകിസ്ഥാൻ്റെ ജലവിഹിതം ഇന്ത്യ നിയന്ത്രിക്കാൻ ശ്രമിക്കുകയാണെന്നും തങ്ങളുടെ വിഹിതം തടസ്സപ്പെടുത്താൻ ആരെയും അനുവദിക്കില്ലെന്നും അദ്ദേഹം വ്യക്തമാക്കി. ഇക്കാര്യത്തെക്കുറിച്ച് പരാമർശിക്കവെ, ‘അയൽരാജ്യത്തെ പ്രധാനമന്ത്രിയാണ് ഈ ജലത്തിന്റെ ടാപ്പ് നിയന്ത്രിക്കുന്നത്.

പാകിസ്ഥാനിലേക്ക് ഒരു തുള്ളി വെള്ളം പോലും ഒഴുക്കില്ലെന്നാണ് അദ്ദേഹം പറയുന്നത്’ എന്ന് മാലിക് പറഞ്ഞതായി പാക് മാധ്യമമായ ‘ഡോൺ’ റിപ്പോർട്ട് ചെയ്തു. രാജ്യത്തെ 40-50 ശതമാനം ജനങ്ങളും കൃഷിയെ ആശ്രയിച്ച് കഴിയുന്നവരാണെന്നും, ഭക്ഷ്യസുരക്ഷയെയും തൊഴിൽ മേഖലയെയും സമ്പദ്‌വ്യവസ്ഥയെയും ഇത് പ്രതികൂലമായി ബാധിക്കുമെന്നും അദ്ദേഹം കൂട്ടിച്ചേർത്തു.

മന്ത്രിയുടെ വാക്കുകൾ ഇങ്ങനെ: ‘ഞങ്ങൾ ഞങ്ങളെത്തന്നെ സംരക്ഷിക്കും… ഞങ്ങൾ ഇത് വെറുതെ പ്രഖ്യാപിക്കുക മാത്രമല്ല ചെയ്യുന്നത്, ഞങ്ങളുടെ ജലവിഹിതത്തിന്മേൽ ആരെങ്കിലും കൈവെച്ചാൽ ആ കൈകൾ ഞങ്ങൾ വെട്ടിമാറ്റുമെന്ന് തെളിയിച്ചിട്ടുമുണ്ട്’. കരാറുകൾക്ക് അപ്പുറം അന്താരാഷ്ട്ര കൺവെൻഷനുകളുടെ അടിസ്ഥാനത്തിൽ നദികൾ ഒഴുകേണ്ടതുണ്ടെന്നും, ഇക്കാര്യം വരാനിരിക്കുന്ന കോൺഫറൻസിൽ ഉന്നയിക്കുമെന്നും അദ്ദേഹം വ്യക്തമാക്കി.

അതേസമയം, പാകിസ്ഥാൻ വാർത്താവിനിമയ മന്ത്രി അത്താഉള്ള തരാർ ഈ വാർത്താസമ്മേളനത്തിൽ പങ്കെടുത്തുകൊണ്ട് കരാർ നിയമപരമായി നിലനിൽക്കുന്നതാണെന്നും അത് ഏകപക്ഷീയമായി റദ്ദാക്കാനോ ഭേദഗതിയോ സാധ്യമല്ലെന്നും വാദിച്ചു. പാക് പ്രധാനമന്ത്രി ഷെഹ്ബാസ് ഷെരീഫും, ചീഫ് ഓഫ് ഡിഫൻസ് ഫോഴ്‌സും ആർമി ചീഫുമായ ഫീൽഡ് മാർഷൽ അസിം മുനീറും വെള്ളത്തെ രാജ്യത്തിന്റെ ജീവനാടിയായി കാണുന്നവരാണെന്നും അദ്ദേഹം ആവർത്തിച്ചു.

കേന്ദ്ര ജലവിഭവ മന്ത്രി സി ആർ പാട്ടീൽ അടുത്തിടെ നടത്തിയ പ്രസ്താവനയാണ് പാകിസ്ഥാന്റെ ഭാഗത്തുനിന്നുള്ള ഈ രൂക്ഷമായ പ്രതികരണങ്ങൾക്ക് വഴിതുറന്നത്. അടുത്ത ഒന്നര-രണ്ട് വർഷത്തിനുള്ളിൽ സിന്ധു നദിയിലെ ഇന്ത്യയുടെ വിഹിതം പൂർണ്ണമായും വിനിയോഗിക്കുമെന്നും ഇന്ത്യയ്ക്കുള്ള ഒരു തുള്ളി വെള്ളം പോലും പാകിസ്ഥാനിലേക്ക് ഒഴുക്കില്ലെന്നും അദ്ദേഹം നേരത്തെ വ്യക്തമാക്കിയിരുന്നു.

ജമ്മു കശ്മീരിലെ പഹൽഗാമിൽ 26 സിവിലിയന്മാരുടെ മരണത്തിന് ഇടയാക്കിയ ഭീകരാക്രമണത്തിന് ശേഷമാണ് 1960-ൽ വേൾഡ് ബാങ്കിന്റെ മധ്യസ്ഥതയിൽ ഒപ്പുവെച്ച ഈ കരാർ ഇന്ത്യ താൽക്കാലികമായി മരവിപ്പിച്ചത്. പാക് മണ്ണിൽ നിന്നുള്ള ഭീകരവാദ ശൃംഖലകളെ നിയന്ത്രിക്കാതെ കരാർ പുനഃസ്ഥാപിക്കില്ലെന്ന ഉറച്ച നിലപാടിലാണ് ഇന്ത്യ.