തിരുവനന്തപുരം കോർപറേഷനിലെ ഭരണസമിതിക്കെതിരെ യുഡിഎഫ് കൊണ്ടുവരാൻ ഉദ്ദേശിക്കുന്ന അവിശ്വാസ പ്രമേയത്തെ പിന്തുണയ്ക്കുന്ന കാര്യത്തിൽ എൽഡിഎഫ് നിലപാട് വ്യക്തമല്ല. ഈ വിഷയത്തിൽ യുഡിഎഫ് തങ്ങളുമായി ചർച്ച നടത്തിയിട്ടില്ലെന്ന് സിപിഎം ജില്ലാ സെക്രട്ടറി വി.
ജോയ് വ്യക്തമാക്കി. യുഡിഎഫിനൊപ്പം ചേർന്ന് അവിശ്വാസ പ്രമേയം അവതരിപ്പിക്കണമോ എന്ന കാര്യത്തിൽ എൽഡിഎഫ് ഇതുവരെ ഒരു നയപരമായ തീരുമാനവും കൈക്കൊണ്ടിട്ടില്ലെന്നും, അത്തരമൊരു നിർദേശം നിലവിൽ പാർട്ടിയുടെ പരിഗണനയിലില്ലെന്നും അദ്ദേഹം കൂട്ടിച്ചേർത്തു.
ബിജെപി ഭരണസമിതിക്കെതിരെ ആര് അവിശ്വാസ പ്രമേയം കൊണ്ടുവന്നാലും അത് എതിർക്കേണ്ടതില്ലെന്നായിരുന്നു മുൻപ് വി. ശിവൻകുട്ടി പ്രതികരിച്ചിരുന്നത്.
ഈ സാഹചര്യത്തിൽ നാളെ നടക്കാനിരിക്കുന്ന കൗൺസിൽ യോഗം ഏറെ നിർണായകമാണ്. അതേസമയം, എൽഡിഎഫിന്റെ ഈ നിലപാടിനെതിരെ ശക്തമായ വിമർശനവുമായി യുഡിഎഫ് രംഗത്തെത്തി.
എൽഡിഎഫും ബിജെപിയും തമ്മിൽ രഹസ്യധാരണയുണ്ടെന്നും, കോർപറേഷനിലെ നിയമനങ്ങൾ റദ്ദാക്കുമെന്ന ഭയമാണ് എൽഡിഎഫിനെ പിന്തിരിപ്പിക്കുന്നതെന്നും യുഡിഎഫ് കൗൺസിലർ കെ. എസ്.
ശബരീനാഥൻ ആരോപിച്ചു. കോർപറേഷനിലെ ഭരണസ്തംഭനം ചൂണ്ടിക്കാട്ടിയാണ് യുഡിഎഫ് അവിശ്വാസ പ്രമേയത്തിന് നീക്കം നടത്തുന്നത്.
എന്നാൽ എൽഡിഎഫിന്റെ നിസ്സഹകരണവും സ്വതന്ത്ര കൗൺസിലർ സുധീഷ് കുമാറിന്റെ പിന്മാറ്റവും യുഡിഎഫ് നീക്കത്തിന് തിരിച്ചടിയായിട്ടുണ്ട്. 101 അംഗങ്ങളുള്ള കോർപറേഷനിൽ 50 സീറ്റുകളുള്ള ബിജെപിയാണ് ഒരു സ്വതന്ത്രന്റെ പിന്തുണയോടെ അധികാരം കൈയാളുന്നത്.
യുഡിഎഫിന് 20 സീറ്റും എൽഡിഎഫിന് 29 സീറ്റുമാണുള്ളത്. കൂടാതെ ഒരു യുഡിഎഫ് വിമതനും കൗൺസിലിലുണ്ട്.
ബിജെപി കൗൺസിലർ ആർ. സുഗതൻ കാപ്പ കേസിൽ ജയിലിലായ സാഹചര്യത്തിൽ, പ്രതിപക്ഷ കക്ഷികൾ ഒന്നിച്ചാൽ ഭരണപക്ഷത്തിന് ഭൂരിപക്ഷം നഷ്ടപ്പെടാൻ സാധ്യതയുണ്ടായിരുന്നു.
എന്നാൽ നിലവിലെ രാഷ്ട്രീയ സാഹചര്യങ്ങൾ അവിശ്വാസ പ്രമേയത്തിന്റെ വിജയസാധ്യതയ്ക്ക് മങ്ങലേൽപ്പിച്ചിരിക്കുകയാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
