പുതിയ ഭരണസമിതി അധികാരമേറ്റ് 6 മാസവും 4 ദിവസവും പിന്നിടുമ്പോൾ തിരുവനന്തപുരം കോർപറേഷൻ ആസ്ഥാനം സംഘർഷഭരിതമായി. ഹൈക്കോടതി ഉത്തരവിനെത്തുടർന്ന് 19 ബിജെപി കൗൺസിലർമാർ നടത്തിയ സത്യപ്രതിജ്ഞാ ചടങ്ങ് ചട്ടവിരുദ്ധമാണെന്ന് ആരോപിച്ചാണ് എൽഡിഎഫിന്റെ 16 കൗൺസിലർമാർ പ്രതിഷേധവുമായി രംഗത്തെത്തിയത്.
രാവിലെ 10.30-ഓടെ മേയറുടെ ഓഫിസിനു മുന്നിലെത്തിയ ഇവർ, മേയറുടെ സ്ഥിരം പ്രവേശനകവാടം ഉപരോധിച്ചു. ഉച്ചയ്ക്ക് 12.10-ഓടെ കോർപറേഷനിലെത്തിയ മേയർ വി.വി.രാജേഷ്, ബിജെപി കൗൺസിലർമാർക്കൊപ്പം തന്റെ ചേംബറിലേക്ക് നീങ്ങി.
പ്രതിഷേധക്കാർ തടഞ്ഞുവച്ചിരുന്ന വഴിയിലൂടെ തന്നെ പ്രവേശിക്കാൻ മേയർ തീരുമാനിച്ചതോടെ സ്ഥിതിഗതികൾ വഷളായി. കൗൺസിലർമാർക്കിടയിലൂടെ കടന്നുപോകാൻ ശ്രമിച്ച മേയറെ എൽഡിഎഫ് അംഗങ്ങൾ തടഞ്ഞതോടെ ഉന്തും തള്ളുമുണ്ടായി.
ഇതിനിടയിൽ നിലത്തുവീണ മേയർക്ക് എഴുന്നേൽക്കാൻ സാധിച്ചില്ല. ഈ സംഘർഷത്തിനിടെ സന്ദർശകർക്കായി ഇട്ടിരുന്ന കസേരയുടെ വക്കിലിടിച്ച് സ്ഥിരം സമിതി അധ്യക്ഷയും എൽഡിഎഫ് അംഗവുമായ സിന്ധു ശശിക്ക് നെറ്റിയിൽ പരിക്കേറ്റു.
തുടർന്ന് പൊലീസ് എത്തിയാണ് സ്ഥിതി നിയന്ത്രണവിധേയമാക്കിയത്. സംഭവം നടന്ന അരമണിക്കൂറിനുള്ളിൽ മേയർ ചികിത്സ തേടി.
വിവിധ കൗൺസിലർമാരും ആശുപത്രിയിൽ ചികിത്സ തേടിയവരിൽ ഉൾപ്പെടുന്നു. ഡപ്യൂട്ടി മേയർ ജി.എസ്.ആശാനാഥ്, മരാമത്ത് സ്ഥിര സമിതി അധ്യക്ഷ ജി.എസ് മഞ്ജു, ബിജെപി കൗൺസിലർമാരായ ആർ.സി.ബീന, ജയാ രാജീവ്, പി.എസ്.മിനി, വി.ജി.ഗിരികുമാർ, ദീപ എസ്.നായർ, എസ്.എസ്.ശ്രുതി, എൽഡിഎഫ് അംഗങ്ങളായ വഞ്ചിയൂർ പി.ബാബു, കെ.ശ്രീകുമാർ, ആർ.പി.ശിവജി, എസ്.എസ്.സിന്ധു, രാഖി രവികുമാർ, ആർ.വീണ കുമാരി, ടി.കെ രഞ്ജിത്ത് എന്നിവരാണ് പരിക്കേറ്റവരിൽ ഉൾപ്പെടുന്നത്.
കോർപറേഷൻ ചരിത്രത്തിൽ പ്രതിഷേധത്തിനിടെ മേയർക്ക് പരിക്കേൽക്കുന്നത് ഇത് രണ്ടാം തവണയാണ്. 2018-ൽ അന്നത്തെ മേയറായിരുന്ന വി.കെ.പ്രശാന്തിന് കൗൺസിൽ യോഗത്തിനുശേഷമുണ്ടായ സംഘർഷത്തിൽ പരിക്കേറ്റിരുന്നു.
അന്ന് കഴുത്തിന് പരിക്കേറ്റ അദ്ദേഹം മൂന്ന് ദിവസം മെഡിക്കൽ കോളേജ് ആശുപത്രിയിൽ ചികിത്സയിൽ കഴിഞ്ഞു. ഇന്നലെയുണ്ടായ സംഘർഷത്തിൽ കണങ്കാലിന് പരിക്കേറ്റ മേയർ വി.വി.രാജേഷ് ചികിത്സയ്ക്കുശേഷം വൈകിട്ടോടെ ആശുപത്രി വിട്ടു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
