കോട്ടയം ജില്ലയുടെ ചരിത്രത്തിലെ തന്നെ ഏറ്റവും വലിയ ലഹരിവേട്ടകളിലൊന്ന് പൊൻകുന്നത്ത് നടന്നു. ബെംഗളൂരുവിൽ നിന്ന് കാറിൽ ലഹരിമരുന്നുമായി എത്തിയ ചങ്ങനാശേരി സ്വദേശികളാണ് ജില്ലാ പൊലീസ് മേധാവിയുടെ നേതൃത്വത്തിലുള്ള പ്രത്യേക സ്ക്വാഡിന്റെയും പൊൻകുന്നം പൊലീസിന്റെയും പിടിയിലായത്.
250 ഗ്രാം എംഡിഎംഎ ആണ് പ്രതികളിൽ നിന്ന് പിടിച്ചെടുത്തത്. ഇതിന് വിപണിയിൽ ഏകദേശം 12.5 ലക്ഷം രൂപ വിലമതിക്കുമെന്ന് പൊലീസ് അറിയിച്ചു.
പിടിയിലായവർ
പെരുന്ന ഒലച്ചുകുഴിയിടം സ്വദേശി എൻ.ബി. നിബിൻ (38), തൃക്കൊടിത്താനം പള്ളിപ്പറമ്പിൽ ഹാഷിം മൻസിലിൽ ഹാഷിം ലബ്ബ (29) എന്നിവരെയാണ് ആദ്യം പിടികൂടിയത്.
ഇവരിൽ നിന്ന് ലഹരിമരുന്ന് വാങ്ങാനായി ചങ്ങനാശേരിയിൽ കാത്തുനിന്ന ജെയ്ത്ത് (കണ്ണൻ) എന്നയാളെയും പിന്നീട് അറസ്റ്റ് ചെയ്തു. ലഹരിമരുന്ന് വാങ്ങാനായി പണം നൽകി പ്രതികളെ ബെംഗളൂരുവിലേക്ക് അയച്ചത് ജെയ്ത്ത് ആണെന്ന് അന്വേഷണത്തിൽ വ്യക്തമായി.
സിനിമാറ്റിക് പിന്തുടരൽ
രഹസ്യവിവരത്തെ തുടർന്ന് കുട്ടിക്കാനം മുതൽ പൊലീസ് സംഘം പ്രതികളുടെ കാറിനെ പിന്തുടരുകയായിരുന്നു. ലഹരി സംഘത്തിന് സംശയം തോന്നാതിരിക്കാൻ പൊലീസ് അഞ്ച് വ്യത്യസ്ത വാഹനങ്ങളിലായാണ് പിന്തുടർച്ച നടത്തിയത്.
പ്രതികൾ സഞ്ചരിച്ച വാഹനം മുണ്ടക്കയത്ത് എത്തിയപ്പോൾ വേഗത വർധിപ്പിച്ചു. 35–ാം മൈലിലും മുണ്ടക്കയത്തും വെച്ച് തടയാൻ ശ്രമിച്ചെങ്കിലും പ്രതികൾ വെട്ടിച്ച് കടക്കാൻ ശ്രമിച്ചു.
ഒടുവിൽ കൊല്ലം – ഡിണ്ടിഗൽ ദേശീയപാതയിലെ പൊൻകുന്നം ടൗണിൽ വെച്ച് രണ്ട് പൊലീസ് ജീപ്പുകൾ കുറുകെയിട്ട് ഗതാഗതം തടസ്സപ്പെടുത്തിയാണ് സംഘത്തെ കുടുക്കിയത്. വാഹനത്തിൽ നിന്ന് പുറത്തിറങ്ങാൻ പ്രതികൾ വിസമ്മതിച്ചതോടെ, പൊലീസുകാർ കാറിന്റെ പിൻവശത്തെ ചില്ല് തകർത്ത് ഇവരെ പുറത്തെടുക്കുകയായിരുന്നു.
വർക്ഷോപ്പിൽ എത്തിച്ച് കാറിന്റെ റൂഫ് പാനൽ ഉൾപ്പെടെ ഇളക്കി നടത്തിയ വിദഗ്ധ പരിശോധനയിലാണ് കാറിന്റെ ഡോറുകൾക്കിടയിൽ ഒളിപ്പിച്ച നിലയിൽ എംഡിഎംഎ കണ്ടെത്തിയത്. ഈ വർഷം മാർച്ച് 6-ന് കടുത്തുരുത്തിയിൽ 147.08 ഗ്രാം എംഡിഎംഎ പിടികൂടിയതിന് പിന്നാലെയാണ് ജില്ലയിൽ ഇത്രയും വലിയൊരു ലഹരിവേട്ട
നടന്നിരിക്കുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
