ഗൂഗിൾ വോയിസ് സെർച്ച് സംവിധാനത്തിൽ വിപുലമായ മാറ്റങ്ങളുമായി പുതിയ ഇന്റർഫേസ് അവതരിപ്പിച്ച് ഗൂഗിൾ. നേരത്തെ പലരും അവഗണിച്ചിരുന്ന ഈ സെർച്ച് ഫീച്ചറിനെ കൂടുതൽ കാര്യക്ഷമമാക്കുന്ന തരത്തിലാണ് ഡിസൈനിലും പ്രവർത്തനത്തിലും മാറ്റങ്ങൾ വരുത്തിയിരിക്കുന്നത്.
ഈ മാസം തുടക്കത്തിൽ തന്നെ ഇതിന്റെ സൂചനകൾ ലഭ്യമായിരുന്നുവെങ്കിലും, ഇപ്പോൾ ഇത് എല്ലാവർക്കുമായി ലഭ്യമാക്കിയതായി സ്ഥിരീകരിച്ചിട്ടുണ്ട്. നേരത്തെ വോയിസ് സെർച്ച് ഉപയോഗിക്കുമ്പോൾ സംസാരത്തിനിടയിൽ ചെറിയൊരു ഇടവേളയുണ്ടായാൽ സെർച്ച് തനിയെ അവസാനിക്കുന്ന സ്ഥിതിയുണ്ടായിരുന്നു.
എന്നാൽ പുതിയ അപ്ഡേറ്റിലൂടെ ഈ പോരായ്മ പരിഹരിച്ചു. പുതിയ ഇന്റർഫേസിൽ ഉൾപ്പെടുത്തിയിരിക്കുന്ന നീലനിറത്തിലുള്ള ‘ഓട്ടോ സെർച്ച്’ (auto search) ബട്ടൺ ഉപയോഗിച്ച് ഉപയോക്താക്കൾക്ക് തങ്ങളുടെ സൗകര്യത്തിനനുസരിച്ച് തിരയൽ നിയന്ത്രിക്കാൻ സാധിക്കും.
ഇത് തിരക്കിട്ട് സംസാരിക്കേണ്ട സാഹചര്യം ഒഴിവാക്കുന്നു.
ഈ മാറ്റത്തിന് പുറമെ, അധികമായി ഉൾപ്പെടുത്തിയ നാല് പുതിയ ബട്ടണുകളും വോയിസ് സെർച്ചിന്റെ പ്രവർത്തനക്ഷമത വർദ്ധിപ്പിക്കുന്നു.
– സെർച്ച് മോഡ്: സാധാരണ ഗൂഗിൾ സെർച്ച് രീതിയിൽ പ്രവർത്തിക്കുന്നു.
– ലൈവ്: ജെമിനി ലൈവ് (Gemini Live) ഇന്റർഫേസിലേക്ക് മാറി ഗൂഗിൾ ആപ്പുമായി നിരന്തരം ആശയവിനിമയം നടത്താൻ സഹായിക്കുന്നു.
– സോങ് റെക്കഗ്നിഷൻ: പാട്ടുകൾ തിരിച്ചറിയാനുള്ള സംവിധാനം കൂടുതൽ കൃത്യതയോടെ പ്രവർത്തിക്കുന്നു. ബഹളമുള്ള സ്ഥലങ്ങളിൽ പോലും ഇത് മികച്ച രീതിയിൽ പ്രവർത്തിക്കും.
– ട്രാൻസ്ലേറ്റ്: കേൾക്കുന്ന വാക്കുകളെ തത്സമയം മറ്റൊരു ഭാഷയിലേക്ക് വിവർത്തനം ചെയ്യാൻ ഇത് സഹായിക്കുന്നു.
ഈ സൗകര്യങ്ങൾ നേരത്തെ ഗൂഗിൾ ആപ്പിൽ ഉണ്ടായിരുന്നെങ്കിലും ഉപയോക്താക്കൾക്ക് പലതും ശ്രദ്ധയിൽപ്പെട്ടിരുന്നില്ല. എന്നാൽ പുതിയ ഇന്റർഫേസ് ഡിസൈനിലൂടെ ഈ ഫീച്ചറുകൾ കൂടുതൽ ദൃശ്യപരമാക്കിയതോടെ ആർക്കും എളുപ്പത്തിൽ ഇത് ഉപയോഗിക്കാൻ സാധിക്കും.
ഒരു ആപ്പ് വഴി തന്നെ വിവരങ്ങൾ തിരയാനും, വിവർത്തനം ചെയ്യാനും, പാട്ടുകൾ തിരിച്ചറിയാനും, കൃത്രിമ ബുദ്ധിയുമായി സംവദിക്കാനും കഴിയുന്നത് വോയിസ് സെർച്ചിനെ കൂടുതൽ മികച്ചൊരു സംവിധാനമാക്കി മാറ്റുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
